نەمىس مامانى كيىكتەردىڭ قىرىلۋىنا «پروتوننىڭ» تىكەلەي اسەرى جوق ەكەنىن ايتتى

استانا. قازاقپارات - «كيىكتەردىڭ قىرىلۋىنا «پروتون» زىمىراندارىنىڭ تىكەلەي اسەرى جوق». فرانكفۋرت زوولوگيالىق قوعامىنىڭ وكىلى شتەفان تسۋتەر «استانا» تەلەارناسىنا بەرگەن سۇحباتىندا وسىلاي دەدى.

عالىم ولەكسەلەردىڭ سىناماسى ەلىمىزدىڭ ءۇش وڭىرىندە دە ارام قاتقان جانۋارلاردىڭ ءبىر ىندەتتەن قىرىلعانىن كورسەتتى دەيدى. ايتۋىنشا، بۇل - ينفەكتسيالىق اۋرۋ. سونداي-اق، تسۋتەر قاجەت بولعان جاعدايدا كيىكتەر قىرىلعان جەرلەردەن الىنعان سىناما ەۋروپاعا جونەلتىلەتىنىن ايتتى.

«ءبىز، بەلگىلى اقپاراتقا سۇيەنسەك، مۇنداي نۇسقا ورىنسىز. ويتكەنى كيىكتەر ءبىر ەمەس، بىرنەشە ايماقتا قىرىلىپ جاتىر. ال راكەتالار قۇلاعان ايماقتار مۇلدەم باسقا»، - دەيدى ول.

دەگەنمەن، ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى باعدات ازبايەۆ: «اۋىل شارۋاشىلىعى مينيسترلىگى ماماندارى بارلىق ۆەرسيالاردى ەگجەي-تەگجەيلى تەكسەرەدى، - دەيدى. ەشبىر ۆەرسيا نازاردان تىس قالمايدى. جۇمىس توبى قۇرىلدى. ينفەكتسيانى، وزگە دە نۇسقالاردى قاراستىرامىز، زەرتتەپ، انىعىنا كوز جەتكىزەمىز».