سيريا بەيبىتشىلىكتى قۇرۋدىڭ جاڭا كەزەڭىن باستان وتكەرۋدە - استاناداعى كەلىسسوزدەرگە قاتىسۋشى
بۇل تۋرالى بۇگىن استانادا سيريالىق وپپوزيتسيا وكىلدەرىنىڭ كەلىسسوزدەرىنەن كەيىنگى باسپا ءسوز ءماسليحاتىندا اتالعان ەلدىڭ ادام قۇقىقتارى سالاسىنداعى بەلسەندىسى امار ابدۋلحاميد ءمالىم ەتتى.
«بۇل كەزدەسۋدىڭ ماقساتى - سيريا ىشىندەگى وپپوزيتسيا وكىلدەرىنىڭ كەزدەسىپ، ءتيىستى ناتيجەگە قول جەتكىزۋ. ءبىز سيريادا بەيبىتشىلىكتى قۇرۋدىڭ جاڭا كەزەڭىن باستان وتكەرۋدەمىز. سيرياداعى زارداپ شەككەن حالىققا كومەك كورسەتۋ ماسەلەسى بويىنشا مامىلەگە كەلۋ ءۇشىن وپپوزيتسيا وكىلدەرىنىڭ ەلەۋلى بولىگىن قامتىپ، ورتاق تۇعىرنامانى قالىپتاستىرۋدى كوزدەپ وتىرمىز»، - دەدى ا. ابدۋلحاميد.
بۇگىندە سيريانىڭ بولاشاعىنا قاتىستى ەلدىڭ وپپوزيتسيالىق توپتارى اراسىندا استاناداعى كەزدەسۋ تۇرعىسىندا كوپتەگەن پىكىرلەر ايتىلىپ جاتقانىنا توقتالعان ول، «وسى جۇزدەسۋ بۇدان دا كەڭەيتىلگەن الاڭعا اينالىپ، باسقا دا ماسەلەلەردى قامتۋى مۇمكىن»، - دەدى.
سونىمەن قاتار ول سيريانىڭ وزگە دە وپپوزيتسيا وكىلدەرىمەن ديالوگقا دايىن ەكەندىكتەرىن اتاپ ءوتتى.
ەستەرىڭىزگە سالا كەتەيىك، وسى اپتانىڭ باسىندا استانادا سيريالىق وپپوزيتسيا وكىلدەرىنىڭ كەلىسسوزدەرى باستالدى. وسىعان دەيىن سيريانىڭ وپپوزيتسيالىق كۇشتەر توبى قازاقستانعا سيرياداعى داعدارىستى رەتتەۋ ماسەلەسى بويىنشا كەلىسسوزدەردە دەلدالدىق ەتۋ تۋرالى ءوتىنىشىن بىلدىرگەنى بەلگىلى.
وسى ەلدەگى اسا اۋىر گۋمانيتارلىق جاعدايعا الاڭداۋشىلىق ءبىلدىرىپ، ىشكى سيريالىق شيەلەنىستىڭ تەك بەيبىت جولمەن جانە سيريالىقتار وزدەرى عانا شەشۋى قاجەت دەگەن باعدارىن بەرىك ۇستانىپ، قازاقستان سيريا وپپوزيتسيالىق كۇشتەر وكىلدەرىنىڭ ديالوگى الاڭىن ۇسىنۋ شەشىمىن قابىلدادى جانە كەلىسسوزدەردىڭ ءساتتى ءوتۋى ءۇشىن قاجەتتى جاعداي جاسادى.
كەلىسسوزدەر جابىق ەسىك فورماتىندا ءوتتى. كەلىسسوزدەر قورىتىندىسى تاراپتار ساياسي شەشىم بويىنشا استانا دەكلاراتسياسىنا قول قويدى.
اۆتور: رۋسلان عابباسوۆ
