قازاقستاندا تۇڭعىش رەت الپينيزم جانە قۇزعا ورمەلەۋ بويىنشا «تاۋداعى قوس سايىس» تۋرنيرى وتەدى - فوتو

استانا. قازاقپارات - بيىل قازاقستاندا العاش رەت ق ر قارۋلى كۇشتەرىنىڭ قۇراما كوماندالارى اراسىندا الپينيزم مەن قۇزعا ورمەلەۋدەن «تاۋداعى قوس سايىس» بويىنشا اشىق تۋرنير وتەدى.

بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.

اتالعان جارىس ەكى كەزەڭ بويىنشا وتەدى، ول - بولىمشەلەردىڭ كۇردەلى تاۋ بەدەرلەرىن يگەرۋ جانە 1000 مەترلىك «تىك شاقىرىم» بيىكتىكتەن ىلديعا قاراي جۇگىرۋ. بۇل ورايدا، ق ر  ق ك اسكەري قىزمەتشىلەرىنەن قۇرالعان كوماندا 2013 جانە 2014 - جىلدارى وتكەن جارىستاردا ت م د وكىلدەرى اراسىندا ءبىرىنشى ورىندى يەلەندى.

«الپينيزممەن جانە قۇزعا ورمەلەۋمەن اينالىساتىن قازاقستاندىق اسكەري قىزمەتشىلەر ناعىز بابىندا. اسكەري قىزمەتشىلەردىڭ تاۋداعى دايارلىق دەڭگەيى تاۋ بەدەرىنىڭ تەحنيكاسىن مەڭگەرە وتىرىپ، اسكەري قىزمەتشىلەر اراسىندا الپينيزم بويىنشا ءدارىس وقيتىن نۇسقاۋشى- ادىسكەرلەردىڭ  سانى جىلدان- جىلعا ارتىپ كەلەدى. اعىمداعى جىلى ولاردىڭ سانى 3,5 ەسەگە ءوستى»، - دەيدى وتكەن جىلعى جارىستىڭ جەڭىمپازى، جەتەكشى نۇسقاۋشى لەيتەنانت ۆاسيلي پيۆتسوۆ.

ايتا كەتەيىك، تاۋ دايارلىعى جاۋىنگەرلىك دايىندىقتىڭ اجىراماس بولىگى سانالادى. سونىمەن قاتار ول ەكى باعىتقا بولىنەدى. تاۋ دايارلىعىنىڭ ءبىرىنشى باعىتى - ارنايى الپينيستىك دايىندىق. ونىڭ اياسىندا اسكەريلەر تاۋ جوتالارى مەن بەدەرلەرىنە ورمەلەۋ تەحنيكاسىن مەڭگەرىپ، تاۋ شاڭعىسى كۋرسىن وقيدى. سونداي- اق، كوشكىنگە قارسى تۇرۋ دايىندىعى، تاۋلى ايماقتا قاۋىپسىزدىكتى ساقتاۋ جانە امان قالۋ داعدىلارىن ۇيرەنەدى.

ەكىنشى باعىت - تاۋلى ايماقتا جاۋىنگەرلىك ۇرىس جۇرگىزۋ دايىندىعى. تاۋ دايارلىعىنىڭ تولىق كۋرسىنان وتكەن اسكەري قىزمەتشىلەردىڭ اراسىندا نۇسقاۋشىلار مەكتەبىنە وقۋعا جىبەرىلەتىن كانديداتتارعا ىرىكتەۋ جۇرگىزىلەدى.

سونىمەن قاتار، تاۋ دايارلىعى كومانداسى اسكەري جانە كۇشتىك قۇرىلىمداردىڭ بارلىعىنا ورتاق تاۋ دايارلىعىن ۇيىمداستىرۋ تۇجىرىمداماسى بويىنشا جۇمىس جۇرگىزەدى.

وسىدان بىرنەشە جىل بۇرىن ق ر قورعانىس مينيسترلىگىنىڭ اسكەري قىزمەتشىلەرى تاۋ دايارلىعىنىڭ نۇسقاۋشىلارىمەن جۇمىس جانە تاۋ ەگەيلەرىن وقىتۋدا قولدانىلاتىن وقۋ ادىستەمەلىك قۇرال شىعاردى.