ق ر پرەزيدەنتى: الەمدىك ساياساتتا رەسەيدىڭ ءرولى ايرىقشا
«رەسەيدىڭ الەمدەگى الار ورنى ەرەكشە، ونىمەن ساناسۋ كەرەك. بۇل ءومىر شىنايلىعى، مۇنى الەم قالىپتى قابىلداۋى ءتيىس. ەكىنشى جاعىنان، رەسەيدىڭ ءوزى دە الەمدىك دەرجاۆا رەتىندە بۇعان سايكەس كەلۋى كەرەك.
ەل گاز بەن مۇنايعا باي بولعان سوڭ ۇلى دەرجاۆاعا اينالا المايدى، ايتپەسە ساۋد ارابياسى دا ءوزىن ۇلى دەرجاۆا دەپ سانار ەدى، مەملەكەت الەمدىك ىستەرگە اتسالىسقان سوڭ سونداي ەل بولادى. ول ءۇشىن الەمدە بولىپ جاتقان ماسەلەلەردى شەشۋگە، بۇكىل جەر بەتىندە بەيبىتشىلىكتىڭ ورناۋىنا ۇلەسىن قوسۋى ءتيىس»، - دەدى ن. نازاربايەۆ.
قازاقستان پرەزيدەنتى رەسەيدىڭ الەمدىك ساياساتتاعى ايرىقشا ءرولىن اتاپ ءوتتى.
«بۇل تۇرعىدا رەسەيدىڭ ءرولى باعا جەتپەس جانە ونى الەم ەلدەرى ءتۇسىنۋى كەرەك. وسى داعدارىستان رەسەي تەزىرەك شىعۋعا نيەتتى جانە مەن دە وعان تىلەكتەسپىن»، - دەپ اتاپ ءوتتى مەملەكەت باسشىسى.
ەۋرازيا قۇرىلىعىنداعى سان ءتۇرلى ەلدەردى بىرىكتىرەتىن ەكونوميكالىق جوبالار ەكونوميكالىق تۇراقتىلىققا قالاي اكەلەدى دەگەن ساۋالعا وراي ن. نازاربايەۆ ەكونوميكا قاشاندا بەيبىتشىلىككە باستايتىنىن ايتتى.
«ەكونوميكا ءارقاشان دا بەيبىتشىلىككە الىپ كەلەدى. ەگەر مەملەكەت كورشىلەس ەلدەرمەن ساۋدا- ساتتىقتى جۇرگىزىپ، ۇلكەن تاۋار اينالىمعا قول جەتكىزسە، بۇل تۇرعىدا وسى ۇدەرىستەگى ەلدەر كورشىسىنىڭ جاعدايى جاقسى بولعانىن قالايدى. جانە كەرىسىنشە، سول كورشىلەس ەل بىزدە ءبارى جاقسى بولعانىن قالايدى. ەكونوميكا ەلدەردى بىرىكتىرەدى»، - دەدى ن. نازاربايەۆ.
«ءبىز ۋكراينادان بايقاپ وتىرعان جاعداي - بۇل نونسەنس. بولماۋى ءتيىس جاعداي ورىن الدى. مەن بۇل جاعدايدان ءوتۋىمىز كەرەك دەپ سانايمىن. مۇنى نەعۇرلىم تەزىرەك شەشسەك، سوعۇرلىم جاقسى بولادى»، - دەدى ەلباسى.
قازاقستان پرەزيدەنتى ۋكراينانىڭ ورىن العان داعدارىستان شىعاتىنىنا سەنىم ءبىلدىردى.
«ۋكراينا - ءبىزدىڭ دوسىمىز، ءبىز ءبىر- ءبىرىمىزدى جاقسى تۇسىنەمىز. ءبىز بۇل ەل ءۇشىن قانداي كەڭىستىك بولساق، ۋكراينا دا ءبىز ءۇشىن سونداي كەڭىستىك. مۇنى ءبىز تۇسىنۋگە ءتيىسپىز. ءبارى ورنىنا كەلەدى. بارلىق تاراپتاردى بۇل پروبلەمانى شەشۋدە ۋاعدالاستىققا كەلىپ، حالىقتارىمىزدىڭ يگىلىگى ءۇشىن ارى قاراي جىلجۋعا شاقىرامىن»، - دەپ تۇيىندەدى ن. نازاربايەۆ.
قازاقستان پرەزيدەنتى باتىس ەلدەرى مەن رەسەي اراسىنداعى ءوزارا سانكسيالار ساياسات پەن ەكونوميكانىڭ ارالاسىپ كەتۋىنىڭ ناتيجەسى ەكەنىنە نازار اۋداردى. بۇل جاعدايدان رەسەي عانا ەمەس، وزگە ەلدەر دە زارداپ شەگىپ وتىرعانىن ايتتى.
ن. نازاربايەۆ ۋكراينا توڭىرەگىندەگى احۋالدى شەشۋ ءۇشىن قاجەتتى بارلىق كۇش- جىگەرىن جۇمساپ وتىرعانىن اتاپ ءوتتى.
«مەنەن ارااعايىندىق ەتۋدى وتىنگەندە ۋاقىتتى دا، كۇشىمدى دە ايامايمىن، كەزدەسۋلەر وتكىزىپ، تاراپتاردى كەلىسسوزدەرگە شاقىرامىن. بۇل جاعدايدا ەل باسشىلارى كەزدەسە وتىرىپ، ىمىرالاسۋ ارقىلى ورتاق ءتىل تابا الادى. شەشىلمەيتىن ماسەلە كورىپ تۇرعانىم جوق. مەن قازىر رەسەيلىك تە، ۋكراينالىق تا تاراپتىڭ ماسەلەنى شەشىپ، پايدا بولعان قاراما- قايشىلىق ءتۇيىنىن تارقاتاتىن كەزەڭ جەتكەنىن بايقاپ وتىرمىن. مۇنىڭ تەزىرەك بولعانى كەرەك، ەۋروپالىق كوشباسشىلار دا وسىنى قالايدى. قازىرگى ۋاقىت وسىنداي قادام ءۇشىن قولايلى»، - دەدى ق ر پرەزيدەنتى.
