ءۇش بالاسى ءۇش كۇيەۋدەن

استانا. قازاقپارات - زامان ازدى، ادام توزدى ما، بۇگىندە اينالاڭدا بولىپ جاتقان سۇمدىقتاردى كورە كورە، «كوسەم» بولىپ ەتىمىز ءولىپ كەتتى عوي.

ءتىپتى سەلت ەتپەيتىن بولدىق. بالا كەزىمىزدە اۋىلدا بىرەۋدىڭ قىزى ۇيىندە وتىرىپ تۋىپ قويىپتى دەگەندى ەستىسە بۇكىل ەل بەتىنە تۇكىرەتىن. قارا بەت دەپ. ول ۇيمەن ەشكىم ارالاسپايتىن.

ءتىپتى وسىنداي ماسقارالىققا شىداي الماي كوشىپ كەتكەندەردى دە كوز كوردى. ول كەزدە ار، ادامدىق، تازالىق دەگەن بولۋشى ەدى عوي. بۇگىندە بۇنىڭ بارىنە قوش ايتقان سياقتىمىز.

الىسقا بارماي-اق ءوز كورشىلەرىم جايلى ايتايىنشى. بەس قىزى بار كورشىم بار. ۇلكەنى جەلكىلدەپ كوز الدىمىزدا ءوستى. ءسۇپ-سۇيكىمدى قىز ەرتەڭگى كۇنى ءبىر ءۇيدىڭ بەسىگىن تەربەتىپ وتىرادى عوي، اتا-اناسى ايالاپ ۇزاتادى عوي دەپ ويلايتىنبىز. بوي جەتە سالىسىمەن الگى قىزىمىز كوشەنى بەرمەيتىن بولدى. ءتۇنى بويى تىنىشتىق جوق.

ىسقىرىقتان ۇيىقتاي المايمىز. تاپ ءبىر جابايى مىسىقتاردىڭ مەكەنى قۇساپ. ىزۋ-قيۋ ايتەۋىر تىنىشتىق جوق. ءسويتىپ جۇرگەندە الگى قىزىمىزدىڭ ءىشى شەرميىپ شىققانىن بايقادىق. وعان ۇيالاتىن قىز جوق، كوشەدە ءجۇر سوندا دا. شەشەسى بولسا قىزىنىڭ ارتىن جاۋىپ الەك.

«كۇيەۋ بالا استانادا جۇمىس ىستەيدى، كەلگەن سوڭ الىپ كەتەدى» دەدى. كۇيەۋ بالانى كووووپ كۇتتىك. ءبىراق كەلمەدى. سودان كورشى قىز ۇيدە وتىرىپ بوساندى. ۇيالۋ جوق، قورسىنۋ جوق، ءتىپتى شەشەسى شىلدەحانا ىستەپ قۋانىش كورىپ ءجۇر. «ماسقارا قىزدارىن قالاي تاربيەلەگەن؟» دەپ بەتىن شىمشىعاندار بولدى.

مۇنىمەن دە بىتپەپتى. ءبىر كۇنى الگى قىزىمىزدى ۇلكەن ماشينا مىنگەن ءبىر پولكوۆنيك اكەپ تاستايتىن بولدى. ءبىر جولى ءتىپتى الگى پولكوۆنيكپەن قىزدىڭ اكەسى ءوزى شىعىپ امانداسىپ تۇرعانىن كورىپ جاعامدى ۇستادىم. قىزى ۇياتسىز با دەسەك، ونى «تاربيەلەگەن» اكەسىنىڭ ءتۇرى مىناۋ بولسا...

شەشەسى عوي، جۇگىرىپ ءجۇر، «ول پولكوۆنيكتىڭ وتباسى بار ەكەن، قىزىمدى الداپ كەتىپتى» دەدى. داپ-دارداي ەركەكتىڭ وتباسى بولماۋى مۇمكىن ەمەستىگىن بىلمەي قالعان نوقالاي سياقتى. وبال-اي دەسكەندەر بولدى بىلمەگەندەرى. ال بىلگەندەرى... باسىن شايقادى.

پولكوۆنيكتەن ەستەلىك بولىپ تاعى ءبىر ۇل دۇنيەگە كەلدى. بۇگىندە شاپقىلاپ ءجۇر. كورشىنىڭ قىزى وسىمەن توقتايتىن شىعار دەسكەنبىز. جوق، كوشەنىڭ باس جاعىندا تۇراتىن اق باس شالدى قۇرىعىنا ءتۇسىرىپتى دەپ ەستىدىك.

جاسى جەتپىستەن اسىپ كەتكەن قۇتىرعان شالعا دا داۋا جوق ەكەن دەستىك. الگى شال ءۇي اپەرىپتى. سول سودان كورشى قىز كورىنبەيتىن بولدى. تاعى ءبىر جەتپىسباي جەلكىلدەپ ءوسىپ كەلەدى. ەرتەڭگى كۇنى قۇدا قۇداندالى بولار اۋ سوندا مىنا بالامنىڭ اكەسى، مىنا بالامنىڭ اكەسى... دەپ قالاي ايتار ەكەن؟ الدە ار-ۇيات جوق جەردە ۇيالىپ جۇرگەن بىزدىكى دە دۇرىس ەمەس شىعار، بالكىم؟!

ايحان

«الاش ايناسى»