الماتىدا تانىمال اكتەر مەن ونىڭ ايەلى تەاتردا ءولى كۇيىندە تابىلدى

استانا. قازاقپارات - عابيت مۇسىرەپوۆ اتىنداعى بالالار جانە جاسوسپىرىمدەر تەاترى قارا جامىلدى.

كيەلى ونەر شاڭىراعىندا ون بەس جىلدان بەرى قىزمەت ەتىپ كەلە جاتقان بەلگىلى اكتەر مۇحيتدين شىنتايەۆ پەن جۇبايى اكتريسا گاۋحار شاريپانىڭ قانعا بوككەن ءمايىتى كەشە كەشكىسىن اكتەرلەردى بوياندىراتىن بولمەدەن تابىلدى، - دەپ حابارلايدى «31 ارنا».

تەلەارنا تىلشىلەرىنىڭ مالىمەتىنشە، الدىن الا بولجام بويىنشا، ەرلى-زايىپتى اراسىندا جانجال تۋىنداسا كەرەك. سونىڭ بارىسىندا كۇيەۋى ايەلىنە پىشاق جاراقاتىن سالىپ، ارتىنشا ءوز-وزىنە قول جۇمساۋى مۇمكىن. قۇپيا ءولىمنىڭ ناقتى سەبەبى تەك قۇزىرلى ورگانداردىڭ ارنايى تەكسەرىسىنەن كەيىن بەلگىلى بولماق. بەيبىت كۇندە ەكى ارىپتەسىنەن ايىرىلعان ونەر ۇجىمى ءالى ءوز-وزدەرىنە كەلە الماي وتىر.

ومىردە دە، ونەردە دە بىرگە كەلە جاتقان مۇحيتدين شىنتايەۆ پەن گاۋحار شاريپا ارعى دۇنيەگە دە بىرگە كەتتى. ارىپتەستەرى ەرلى-زايىپتىنى سوڭعى رەت كەشەگى رەپيتيتسيادان بىرگە شىققاندارىن عانا كورگەنىن ايتادى. ەكەۋى كەشە عانا دايىندىقتان شىققان ادامدار. جارقىن ءبارى كۇلىپ جۇرگەن ادامدار سونىڭ اراسىندا ساعات ءۇش پەن ءتورتتىڭ كەزىندە بولعان نارسە دەيدى. مۇحيت پەن گاۋحار كوزى تىرىسىندە «ونەردەگى اكەمىز» دەپ اتاپ كەتكەن تەاتر اقساقالى تۇرسىن قۇراليەۆ تە ءالى ءوز-وزىنە كەلە الار ەمەس. كوڭىلدەرىنىڭ مۇڭايعانىن، قۇلازىعان كەزدەرىن وسى ۋاقىتقا دەيىن كورسەتكەن ەمەس دەيدى.

تالانتتى جاستاردىڭ تاعدىرى وسى اكتەرلەردى بوياندىراتىن بولمەنىڭ ىشىندە قيىلعان. ءبىراق، مۇحيت شىنتايەۆتىڭ ءوز جارىنا پىشاق سالۋى مۇمكىن بولاتىنداي قانداي كۇيزەلىسكە تۇسكەنىن ەشكىم بىلمەيدى. ارىپتەستەرىنىڭ ايتۋىنشا، تەاتردان دا ەشقانداي تەپەرىش كورگەن ەمەس. كوزى تىرىسىندە ون شاقتى سپەكتاكلدە باستى ءرولدى سومداپ، كينو سالاسىندا دا باعى جانعان اكتەر. ەرلى-زايىپتىنىڭ تەاتر ساحناسىنداعى ەڭ سوڭعى قويىلىمى «بۇلبۇلدار ءتۇنى» اتتى سپەكتاكل ەكەن.

قازىرگى ۋاقىتتا بىرنەشە دەرەك بويىنشا قىلمىستىق ءىس قوزعالدى. الايدا، ناقتى دايەكسىز تۇسىنىكتەمە بەرۋگە باتپاعان قۇزىرلى ورگان قىزمەتكەرلەرى قۇپيا ءولىمنىڭ سىرىن تەك ارنايى تەكسەرىستەن كەيىن اشاتىندارىن ايتتى.

عابيت مۇسىرەپوۆ اتىنداعى بالالار جانە جاسوسپىرىمدەر تەاترىندا 15 جىل بويى ءارتۇرلى رولدەردى سومداعان مۇحيتدين شىنتايەۆ پەن گاۋحار ءشارىپوۆانىڭ دەنەسى ەرتەڭ قارا جەردىڭ قوينىنا تابىستالادى. وتىزدان اسقان شاقتارىندا ومىرمەن قوش ايتىسقان ەرلى- زايىپتىنىڭ ارتىندا 2 بالاسى قالدى.