11:06, 21 - مامىر 2015 | GMT +5
قازاقستان بەيجىڭ-استانا-قازان-ماسكەۋ ماگيسترالىنىڭ قۇرىلىسىنا اتسالىسۋى ىقتيمال
استانا. قازاقپارات - قازاقستان بەيجىڭ-استانا-قازان-ماسكەۋ ماگيسترالىنىڭ قۇرىلىسى جوباسىنا اتسالىسپاق.
بۇل تۋرالى بۇگىن استانا ەكونوميكالىق فورۋمىنىڭ پانەلدىك سەسسياسىندا ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ءمالىم ەتتى.
«قازاقستاندا بەيجىڭ-استانا-قازان-ماسكەۋ ماگيسترالىنىڭ قۇرىلىسى جوباسى بار. مەنىڭشە، بۇل جوبا بولاشاقتا جۇزەگە اسۋى ىقتيمال»، - دەدى ب. ساعىنتايەۆ.
ۆيتسە-پرەمەر سونىمەن قاتار قازاقستان، رەسەي ارقىلى ەۋروپاعا باعىتتالعان مۋلتيمودالدى كولىكتىك ءدالىز تۋرالى باياندادى. ونىڭ ۇستىنە قورعاستان قازاقستان ارقىلى اقتاۋ پورتىنا دەيىن، ارى قاراي كاسپي تەڭىزى ارقىلى ازەربايجانعا، گرۋزياعا تارتىلاتىن كولىكتىك جوبا دا قولعا الىنۋدا.
«وسى ماقساتتا ق ر پرەزيدەنتى قازاقستان اۋماعى بويىمەن اقتاۋ پورتىنا دەيىن جول سالۋدى تاپسىرعان بولاتىن»، - دەدى ب. ساعىنتايەۆ.
اۆتور: جاسۇلان جولدىبايەۆ
