حانويدا قازاقستان مەن ۆەتنام اراسىنداعى ينۆەستيتسيالىق ىنتىماقتاستىق ماسەلەلەرى تالقىلاندى
بۇل تۋرالى ق ر س ءى م باسپا ءسوز قىزمەتىنەن حابارلادى.
كەزدەسۋ ۆەتنام سوتسياليستىك رەسپۋبليكاسىنىڭ پرەمەر-ءمينيسترى نگۋەن تان زۋنگتىڭ ءۇ. ج. مامىر اياعىندا قازاقستانعا جوسپارلانعان ساپارى قارساڭىندا ءوتتى، ال ساپاردىڭ بارىسىندا ەۋرازيالىق ەكونوميكالىق وداق پەن ۆەتنام سوتسياليستىك رەسپۋبليكاسى اراسىندا ەركىن ساۋدا ايماعى تۋرالى كەلىسىمگە قول قويۋ جوسپارلانۋدا.
تاراپتار ساۋدا-ەكونوميكالىق جانە ينۆەستيتسيالىق سالالارداعى ەكى جاقتى ىنتىماقتاستىقتىڭ قازىرگى احۋالى مەن كەلەشەگىن تالقىلادى. ورتاق قىزىعۋشىلىق تانىتاتىن ءتۇرلى سالالارداعى ىنتىماقتاستىقتى ودان ءارى نىعايتۋ بويىنشا ەكى جاقتى مۇددەلىلىك ءبىلدىرىلدى.
ەلشى ب. جۇماحانوۆ ەلدەرىمىز اراسىنداعى قازىرگى ەكونوميكالىق ءوزارا ارەكەتتەسۋدىڭ احۋالى ساياسي ىنتىماقتاستىقتىڭ جوعارى دەڭگەيىنە ساي كەلمەيتىنىن جانە ودان ءارى دامىتۋ ءۇشىن ۇلكەن الەۋەتكە يە ەكەنىن اتاپ ءوتتى.
قازاقستاندىق ديپلومات سۇحباتتاسىن قازاقستاننىڭ ينۆەستيتسيالىق تارتىمدىلىعىن جوعارىلاتۋ بويىنشا ۇكىمەت تاراپىنان قابىلدانعان نەگىزگى شارالارمەن تانىستىردى. وسى تۇرعىدا ينۆەستيتسيالىق ىنتىماقتاستىقتى ودان ءارى جاقسارتۋ جانە ۆەتنامدىق بيزنەس وكىلدەرىنە قازاقستاندا قولعابىس كورسەتۋ بويىنشا اشىق سۇحباتقا دايىندىق تاعى دا قۇپتالدى.
ءوز كەزەگىندە مينيستر قازاقستان مەن ۆەتنام اراسىنداعى ساۋدا تاجىريبەسى مول بولماعاندىعىن اتاپ ءوتىپ، ءتۇرلى ەكونوميكالىق الاڭداردا بيزنەس-فورۋم، كونفەرەنتسيا جانە ىنتىماقتاسۋدىڭ وزگە فورماتتارى نەگىزىندە ۆەتنامدىق بيزنەس وكىلدەرىن قازاقستانمەن، سونداي-اق قازاقستاندىق كاسىپكەرلەردى ۆەتناممەن كەڭىنەن تانىستىرۋ بويىنشا جۇمىستى جانداندىرۋدى ۇسىندى. ونىڭ پىكىرىنشە، ەۋرازيالىق ەكونوميكالىق وداق پەن ۆەتنام اراسىندا ەركىن ساۋدا ايماعى تۋرالى كەلىسىمگە قول قويۋ قازاقستان- ۆەتنام ىنتىماقتاستىعىن ودان ءارى تىعىز دامىتۋ ءۇشىن جاقسى نەگىز بولا الادى.
قازاقستان مەن ۆەتنام اراسىنداعى ساۋدا اينالىمى سوڭعى 5 جىل ىشىندە، نەگىزىنەن، قازاقستانعا اكەلىنگەن ۆەتنامدىق ەكسپورتى ارقاسىندا (2009 ج. - 88,379 ميلليون، ال 2014 ج. - 272 ميلليون دوللار) ءوسىپ كەلە جاتقان جاعىمدى سالدومەن سيپاتتالىپ، 3 ەسە جوعارىلادى.
2005-2013 ج ج. اراسىندا قازاقستاننىڭ ەكونوميكاسىنا تارتىلعان ۆەتنامدىق ينۆەستيتسيالار كولەمى 2,4 ميلليون ا ق ش دوللارىن قۇرادى، ال كورسەتىلگەن مەرزىمدە ۆەتنامعا قازاقستاندىق ينۆەستيتسيا تارتىلماعان.
