ءجۇز جاستان اسقان سوعىس ارداگەرىنە جاڭادان ءتىس شىعا باستادى

استانا. قازاقپارات- قىزىلوردا وبلىسى جاڭاقورعان اۋدانىندا ۇلى وتان سوعىسىنىڭ ارداگەرىنە جاڭادان ءتىس شىعا باستادى. بۇگىندە اقساقال جەرگىلىكتى جۇرتقا تانىمال بولىپ، تاڭ قالدىرىپ ءجۇر. بۇل ازداي ونىڭ شاشتارى قارايىپ، جاسارىپ بارا جاتقانعا ۇقسايدى.

 101 جاسقا كەلگەن ۇلى وتان سوعىسىنىڭ ارداگەرى ءجۇنىس قابەكەنوۆتىڭ بويىندا بار مۇنداي ەرەكشە قاسيەت بۇگىندە بۇكىل حالىقتى تاڭ قالدىرىپ وتىر.

 اقساقالدىڭ ايتۋىنشا، كۇرەك تىسىنەن باسقا تىستەرى ەرتە ءتۇسىپ قالعان ەكەن. ال جاڭاسىن سالدىرۋعا اۋىرسىنىپتى. ءبىراق كۇتپەگەن جەردەن بىرنەشە ءتىسى شىققان.

ءجۇنىس اقساقال مۇنى سالاۋاتتى ءومىر سالتىن ۇستانۋمەن بايلانىستىرادى. ويتكەنى ول جامان ادەتتەردەن بويىن ادا ۇستاپ، سپورتتى سەرىك ەتىپ كەلگەن. ەشكىمگە جامانشىلىق تىلەمەي، ادال بولۋ دا بۇعان اسەر ەتۋى مۇمكىن دەيدى. تاعى ءبىر تاڭقالارلىعى ارداگەردىڭ شاشتارىنىڭ ءتۇسى دە قارايعان.

مامانداردىڭ ايتۋىنشا، بۇل وتە سيرەك كەزدەسەتىن قۇبىلىس. بىرنەشە جىلدىق ەڭبەك تاجىريبەسى بار ءتىس دارىگەرلەرى دە بۇرىن- سوڭدى مۇنداي جاعدايعا تاپ بولماعانىن ايتىپ، تاڭدانىپ وتىر.

 تىرشىلىك يەسىنىڭ دامۋ ەرەكشەلىكتەرىن زەرتتەيتىن انتروپولوگ- عالىمدار قارتايعاندا اعزا جاڭارا باستايتىندىعىن ايتادى. پايىمداۋلارىنشا، ادام 200 جىل جاساۋى كەرەك. ءبىراق ناشار ەكولوگيانىڭ اسەرى مەن سالاۋاتتى ءومىر سالتىن ساقتانباۋىنان 100 جاسقا دا جەتپەيتىن كورىنەدى. ال ەگدە جاسقا كەلىپ، ءتىسى شىققاندار وسى قاعيدانىڭ ءبىر ايقىن دالەلى جانە وزگەلەرگە ۇلگى بولارلىقتاي جاعداي دەپ وتىر.

«31-ارنا»