اللا قانداي قۇلدارىن سۇيەدى؟

استانا. قازاقپارات - اللا تاعالا بايلىقتى سۇيگەن دە، سۇيمەگەن دە قۇلىنا بەرەدى. ال يماندى تەك سۇيگەن قۇلىنا عانا بەرەدى.

ەگەر ءسىز يسلامنان باقىت تاۋىپ، پارىزدارىڭىزدى تۇگەندەپ جۇرسەڭىز - ءوز بويىمدا اللا سۇيگەن قۇلدىڭ ءبىر سيپاتى بار دەپ ەسەپتەي بەرىڭىز. عۇلامالار بۇل باقىتتى جاننىڭ تاعى دا بىرنەشە سيپاتىن كورسەتەدى:

1. اللا سۇيگەن قۇلىن دۇنيەگە بەرىلىپ كەتۋدەن قورعاپ تۇرادى.

2. قۇلىن كوركەم تۇردە باسقارادى. ونى حاق جولعا باستايدى، تۋرا ىستەرگە جەتەكتەيدى. اقىلىن نۇرلاندىرىپ، ءتىلىن زىكىرمەن تولتىرىپ، دەنە مۇشەلەرىن ءوزى سۇيگەن امالدارمەن شۇعىلداندىرىپ قويادى. وسىنىڭ ارقاسىندا پەندە اللاعا جاقىنداتاتىن ءاربىر نارسەدەن ۇستانىپ، ونىڭ اشۋىنا تيەتىن بارلىق ىستەن الىس بولادى. اللا ونىڭ ىشكى جانە سىرتقى دۇنيەسىن دۇرىستاپ، بەكەم ەتىپ قويادى.

3. بۇل ادام باسقالارمەن قارىم-قاتىناستا سىپايى ءارى جۇمساق كەلەدى. ءار ءىستى قيىنداتپاي، وڭاي جولمەن اتقارادى. اللا تاعالا بۇل پەندەسىنە جەردىڭ بەتىن جايدارلى ەتىپ قويادى. ياعني، ادامداردىڭ كوڭىلى سوعان بۇرىلىپ، ماقتاۋلار ايتىپ، ءىلتيپات ءبىلدىرىپ جاتادى.

5. سىناققا ۇشىرايدى. اقيقاتىندا، اللا ءبىر قاۋىمدى سۇيسە، سىناق جىبەرەدى. سونداي-اق، اللا تاعالا: «بىلىڭدەر! اقيقاتىندا، اللاعا جاقىن بولعاندارعا قورقىنىش جوق ءارى ولار قايعىرمايدى. ولار - يمانعا كەلگەن جانە تاقۋالىق ەتكەندەر» («يۋنۋس» سۇرەسى، 62-ايات) دەگەن. ياعني، اللانىڭ سۇيىكتى قۇلى كەز كەلگەن سىناقتى كۇلىپ قارسى الادى.

6. اللانىڭ سۇيىكتىسى بولعان قۇل ىزگى امال ۇستىندە جان تاپسىرادى. پايعامبارىمىز (س. ع. س.): «ەگەر قۇدىرەتتى اللام ءبىر قۇلىنا جاقسىلىقتى قالاسا، ونى ادامدار اراسىندا ماقتاۋ سوزدەرمەن ەسترتىپ قويادى. «ونىڭ بۇلاي ەسترتىلۋ سەبەبى نەدە؟» دەپ سۇراعان ادامعا: «اللا وعان ولەر الدىندا ءبىر ىزگى امالدى ءناسىپ ەتەدى. ونىڭ جانىن سول امال ۇستىندە الادى» دەپ ايتقان.

ءسۇيۋ، سۇيىكتى بولۋ باقىتىن، بۇل سەزىمدەردىڭ ۇلى جەمىسىن ءاربىر ادامعا تىلەگىمىز كەلەدى.

«الاش ايناسى»