قىرعىزستاننان اكەلىنەتىن اۆتوكولىكتەرگە شەكتەۋ قويۋ تۋرالى ءتۇسىندىرىلدى

استانا. قازاقپارات - ق ر ينۆەستيتسيالار جانە دامۋ ۆيتسە- ءمينيسترى البەرت راۋ قىرعىزستان ە ا ە و- عا كىرگەن جاعدايدا وسى ەلدەن اۆتوكولىكتەر ەنگىزۋدى شەكتەۋ بويىنشا قانداي شارالار قابىلداناتىنى تۋرالى تۇسىنىكتەمە بەردى.

 «قىرعىزستاننان اۆتوكولىكتەر كىرگىزۋ ءبىز ءۇشىن ايتارلىقتاي ماڭىزدى، ويتكەنى بۇل قىرعىز رەسپۋبليكاسىنىڭ ەۋرازيالىق ەكونوميكالىق وداققا ەنۋىنە قاتىستى تالقىلانعان ماسەلەلەردىڭ ءبىرى بولىپ تابىلادى. ولاردىڭ وزدەرىندە كولىك ءوندىرىسى بولماعاندىقتان، وتپەلى كەزەڭگە رۇقسات بەرۋدى سۇراعان بولاتىن. وتپەلى كەزەڭنىڭ شارتى بويىنشا 10 جىل شاماسىندا وتكىزىلەتىن اۆتوكولىكتەرگە سالىق سالىنباۋى قاجەت، سونىمەن قاتار، ولارعا 2014 - جىلدىڭ قاڭتارىنان باستاپ كىرگىزىلگەن اۆتوكولىكتەردى بىزگە نەمەسە رەسەيگە اكەلگىلەرى كەلسە، وندا كەدەن وداعىنىڭ قولدانىستاعى زاڭنامالارى بويىنشا سالىق سالىنادى»، - دەدى ا. راۋ و ك ق بريفينگىندە.

ونىڭ ايتۋىنشا، سوڭعى جىلدارى قىرعىزستان ءوز تەرريتورياسىنا 100 مىڭنان استام اۆتوكولىك كىرگىزگەن.

«بىرەۋلەر بۇل كولىكتەر سوسىن قايتادان ەكسپورتتالادى دەپ ويلاپ ءجۇر دەۋگە بولادى. كەدەندىك سالىقتان بولەك، ءبىز تاعى دا ەسكى كولىكتەر قاپتاپ كەتپەۋىنە مۇددەلىمىز. سوندىقتان ءبىزدىڭ ەلىمىزگە كىرگىزىلەتىن كولىكتەر كەدەن وداعىنىڭ تەحنيكالىق رەگلامەنتىنە جاۋاپ بەرە الاتىن بولۋى ءتيىس دەگەن شەشىم قابىلدانادى. ارينە، بۇل شامادان تىس تالاپتار ەمەس، بۇل تالاپتار قاۋىپسىزدىك شارالارىن قامتاماسىز ەتۋ ءۇشىن كەرەك»، - دەپ ءتۇسىندىردى ا. راۋ.

ونىڭ ايتۋىنشا، بۇل جەردە ەڭ الدىمەن كولىكتەردەگى قاۋىپسىزدىك جاستىقتارىنىڭ، اۆتوورىندىق ورناتۋ تەتىكتەرىنىڭ جانە باسقا دا قاجەتتى بولشەكتەرىنىڭ بولۋى قاداعالانادى دەگەن ءسوز.

 «بۇلاردىڭ بارلىعى بۇگىنگى كۇنى تەحنيكالىق رەگلامەنتپەن قاراستىرىلعان زاتتار. بۇل ءوز كەزەگىندە ەسكى- قۇسقى كولىكتەردىڭ شامادان تىس قاپتاپ كەتۋىن ءبىرشاما تەجەيدى. ونىڭ ۇستىنە ونداي كولىكتەر وزىمىزدە دە جەتىپ ارتىلادى»، - دەيدى ا. راۋ.

 اۆتور: ءابۋ- اسقار مەكەش ۇلى