اقتوبە وبلىسىندا «ءبىزدىڭ كۇشىمىز - بىرلىكتە!» حالىقارالىق فەستيۆالى ءوتتى
وعان مارتوك اۋدانىنىڭ مۋزىكالىق جانە ءبي ۇجىمدارىمەن قاتار رەسەي فەدەراتسياسىنىڭ ورىنبور وبلىسىنىڭ وكىلدەرى - قۋاندىق اۋدانىنان «رودنيچوك» ارداگەرلەر حالىق حورى جانە اقبۇلاق اۋدانىنان «سادكو» جانە «حوروشەە ناستروەنيە» ۆوكالدىق توپتارى قاتىستى. جەرگىلىكتى دوستىق ءۇيىنىڭ ەتنومادەني بىرلەستىكتەرى دە ۇلكەن كونسەرتتىك باعدارلاما ازىرلەدى.
شارا «دوستىق» حورەوگرافيالىق كومپوزيتسياسىمەن اشىلدى. اۋىل تۇرعىندارى مەن قوناقتارعا مارتوك اۋدانىنىڭ 8 ەتنومادەني بىرلەستىكتەرى، سونداي-اق كورشىلەس اقبۇلاقتىقتار ساندىك-قولدانبالى قولونەر بۇيىمدارى كورمەسىن ۇسىندى. دوستىق ءۇيى الدىنداعى ەتنوقالاشىقتا ۇلتتىق كيىم كيگەن شارا قوجايىندارى كيىز ۇيلەردە داستارحان جايىپ، حوش ءيىستى شايمەن جانە باۋىرساقتارمەن قوناقتارعا مەيماندوستىق كورسەتتى.
قازاقستان حالقىنىڭ بىرلىگى كۇنى مەن قازاقستان حالقى اسسامبلەياسىنىڭ 20 جىلدىعىنا وراي وتكەن سالتاناتتى شارادا جينالعانداردى مارتوك اۋدانىنىڭ اكىمى نۇرجاۋعان قالاۋوۆ، اقبۇلاق اۋدانى اكىمشىلىگى باسشىسىنىڭ ورىنباسارى گالينا چاشكوۆا، قۋاندىق اۋداندىق دەپۋتاتتار كەڭەسىنىڭ ءتوراعاسى الەكساندر گۋبانوۆ قۇتتىقتاۋ ءسوز سويلەدى.
ولار قازاقستاندا ۇلىسارالىق ديالوگتىڭ وزىندىك مودەلى قۇرىلعانىن جانە ونىڭ حالىقارالىق دەڭگەيدە قولداۋعا يە بولىپ وتىرعانىن اتاپ ءوتتى. سونىمەن قاتار قازاقستاندىق ءبىرتۇتاس شاڭىراق استىنا جينالعان بارلىق ۇلتتار مەن ۇلىستار وكىلدەرىنە دوستىق ءدڭى بەرىك بولىپ، بەيبىتشىلىك پەن بىرلىك جولىندا جاڭا تابىستارعا جەتۋلەرىنە ىزگى تىلەكتەر ايتىلدى.
مەرەكەلىك شارالار جىلى شىرايلى راۋىشتە كورەرمەندەردىڭ ىستىق ىقىلاسىمەن جانە قولداۋىمەن ءوتتى. مەرەكە قوناقتاردىڭ قاتىسۋىمەن ۆولەيبولشىلاردىڭ جولداستىق كەزدەسۋىمەن اياقتالدى.
