دۋلات يسابەكوۆتىڭ «باقىت قۇسى» قويىلىمى ەلوردالىق كورەرمەندەردىڭ شىنايى قوشەمەتىنە بولەندى
بۇل قويىلىمعا بىرنەشە ۇلت پەن ۇلىستاردىڭ وكىلدەرى بەيبىت تە باقىتتى عۇمىر كەشىپ جاتقان قازاق ەلىنىڭ بۇگىنگى كەزەڭى ارقاۋ بولعان.
كورمەگەن ادام ساياسي دراما شىعار دەپ ويلاۋى مۇمكىن. الايدا، ءاربىر شىعارماسىندا تەرەڭ ءمان، ۇتىمدى ويلار مەن تاپقىر ازىلدەردى كەلتىرە بىلەتىن شەبەر جازۋشى دۋلات يسابەكوۆتىڭ بۇل تۋىندىسى دا كورەرمەندەردىڭ جۇرەگىنە جول تاپتى.
دراما ومىرلىك جارى قايتىس بولىپ، قوس ۇلىنا تاربيە بەرىپ وتىرعان ءباتيما اپايدىڭ كوتەرىڭكى كوڭىل كۇيىنەن باستالادى. بۇل شاڭىراقتىڭ كورشىلەرى ورىس، نەمىس جانە وزبەك ۇلتىنىڭ وكىلدەرى ەكەن. ەپيزود بارىسىندا كورشى ورىس جىگىتىنىڭ رەسەيگە كوشكەلى جاتقانى كورسەتىلەدى. وسى جەردە بىرنەشە اتاسى تۋىپ- وسكەن، شاڭىراقتىڭ اكەسى ۆاسيلي قازاقستاننان باسقا جاققا كوشكىسى كەلمەيتىنىن مالىمدەيدى. ال نەمىس ۇلتىنىڭ وكىلى كارل نەيمان بولسا، 1941 - جىلى نەمىستەردى قازاقستانعا كوشىرگەن كەزدە، قازاقتار جارتى ناندى ءبولىپ بەرگەنىن ەسكە الدى.
«باقىت قۇسى - ادامدارعا جاقسىلىق سىيلايتىن قاسيەتتى قۇس. ول كەيدە جەكە ادامنىڭ باسىنا، كەيدە تۇتاس ەلدىڭ باسىنا قونادى» دەگەن قاناتتى ءسوز ايتىلادى. قازاقستاننىڭ بۇگىنگى جەتىستىكتەرى، باقىت قۇسى قونعان شاعى ءسوز بولادى.
وسى درامادا قازاق جىگىتى بەكتۇر كارىستىڭ قىزى نەللي كيمگە عاشىق بولادى. تەرەڭىنە ۇڭىلسەك، كيم وتباسى ول قىزدى دۇنيەگە كەلگەندە اسىراپ العان ەكەن. ءسويتىپ، ول كارىس وتباسىندا تاربيەلەنگەن، ءبىراق قازاق مەكتەبىن بىتىرگەن قازاقتىڭ قىزى بولىپ شىعادى.
قويىلىمدا مايرا ومار، داۋرەن سەرعازين، رومان چەحونادسكي، دەنيس اننيكوۆ، رومان تسوي، انتونينا پياك، ايدانا سىربەكوۆالار باستى رولدەردى شەبەر سومدادى.
دراما كەيىپكەرلەرىنىڭ تىنىس- تىرشىلىگى قازاق اندەرىمەن ءورىلىپ وتىردى.
درامانىڭ قويۋشى رەجيسسەرى قازاقستان رەسپۋبليكاسىنىڭ ەڭبەك سىڭىرگەن قايراتكەرى نۇرقانات جاقىپباي، قويۋشى سۋرەتشى قانات ماقسۇتوۆ. كومپوزيتورى قازاقستان رەسپۋبليكاسىنىڭ ەڭبەك سىڭىرگەن قايراتكەرى ارىستانبەك مۇحامەدي ۇلى.
قويىلىم سوڭىندا ساحناعا كوتەرىلگەن جازۋشى، دراماتۋرگ دۋلات يسابەكوۆ ارتىستەرمەن بىرگە ەلوردالىق كورەرمەندەرگە العىسىن ءبىلدىردى.
بۇل قويىلىمدى قازاقستان حالقى اسسامبلەياسىنىڭ 20 جىلدىعى اياسىندا قازاقستان رەسپۋبليكاسى مادەنيەت جانە سپورت مينيسترلىگى مەن قازاقستان ۇلتتار تەاترى ۇجىمى ۇيىمداستىرعان.
ەڭ باستىسى، وسى ليريكالىق دراما كورەرمەندەردىڭ ىستىق ىقىلاسىنا بولەندى.
اۆتور: ايدىن بايمەن
