سايلاۋدان كەيىن قولعا الىناتىن رەفورمالار قوعام تالقىسىنا ءتۇسۋى قاجەت - ايدوس سارىم

استانا. قازاقپارات - بەلگىلى قازاقستاندىق ساياساتتانۋشى ايدوس سارىم «ەڭ باستى ماسەلە - سايلاۋدان كەيىن قانداي ناتيجەلەرگە قول جەتكىزەتىنىمىز ماڭىزدى» دەپ سانايدى.

«مەنىڭ ويىمشا، قوعامنىڭ ىشىندە دە، ساراپشىلار قاتارىندا دا سايلاۋ ناتيجەسىنە ەشكىم اسا قاتتى تاڭقالعان دا جوق سياقتى، «ەرتەڭ بيلىككە كوممۋنيستەر كەلسە، نە بولادى» دەپ ۋايىمداماعان سياقتى»، - دەدى ول بۇگىن exit-poll ناتيجەلەرىنەن كەيىن قازاقستاندىق تىلشىلەرگە بەرگەن سۇحباتىندا.

- بۇل ءبىزدىڭ ەلدە قالىپتاسقان ساياسي جۇيەنىڭ قوعامدىق جانە ساياسي مادەنيەتتىڭ تىكەلەي كورسەتكىشى جانە ناتيجەسى دەپ تولىعىمەن ايتۋعا بولادى. ەستەرىڭىزگە سالا كەتەيىن، 1991-جىلى سايلاۋ كەزىندە نۇرسۇلتان نازاربايەۆ حالىقتىڭ 91 پايىزعا يە بولعان. ەلباسى وسى جولى دا ءوزىنىڭ كوشباسشى ەكەنىن دالەلدەدى. ەكىنشى جاعىنان بولاشاقتا نازاربايەۆتان باسقا ەشكىم 90 پايىز حالىق قولداۋىنا يە بولمايدى جانە بولماۋى دا ءتيىس دەپ سانايمىن. پرەزيدەنت ءوزىنىڭ و باستا بەلگىلەگەن ناتيجەسىنە قول جەتكىزدى جانە وسى ناتيجەنى ساقتاپ قالدى دەپ ايتۋعا بولادى».

ونىڭ ويىنشا، حالىق سايلاۋ بارىسىنا ەمەس، ساياسي ناۋقاننان كەيىنگى مەملەكەت باعىتىنا ۇلكەن ءمان بەرۋى تيىس.

«سايلاۋعا دەيىن ايتقان ۇستانىمىم دا بولدى، مەنىڭ ويىمشا، بۇل سايلاۋدا ەڭ باستىسى ول - سايلاۋ قالاي اياقتالادى دەگەن اڭگىمە ەمەس بولاتىن. سايلاۋ قالاي اياقتالاتىنىن جۇرت مەڭزەپ بولدى. باستى ماسەلە - وسى سايلاۋدان سوڭ نە بولادى، قانداي ناتيجەگە قول جەتەمىز. بۇگىن پرەزيدەنتىمىزدىڭ ءوزى سايلاۋ ۋچاسكەسىنە بارعان كەزدە ايتتى عوي، ەڭ باستى ماسەلەلەردىڭ ءبىرى - الدا قوعامدى قالاي ىلگەرى جىلجىتامىز، بۇل تۇرعىدا قانداي رەفورمالار كەرەك دەگەن 5 ماسەلە بويىنشا قوعامدىق مەملەكەتتىك كوميسسيا قۇرۋ جونىندە وي ايتتى.

ەستۋىمشە، ادىلەت مينيسترلىگىندە ارنايى مەملەكەتتىك، ۇكىمەتتىك شەشىمدەر قابىلدانىپ جاتىر ەكەن، سول قوعامدىق مەملەكەتتىك كوميسسيالاردىڭ نەمەسە توپتاردىڭ قۇرامى بەكىتىلىپ، الداعى كۇندەرى جاريالانۋ كەرەك دەپ ويلايمىن. سونىڭ ىشىندە قوعامدا ۇلكەن تالقىلاۋلار بولۋ كەرەك. ءبىزدىڭ قوعامعا قانداي رەفورما قاجەت، ساياسي پارتيالار تۋرالى، سايلاۋ تۋرالى، باسپا ءسوز بوستاندىعى زاڭناماسى قالاي وزگەرۋى كەرەك دەگەن تاقىرىپتار بويىنشا ۇلكەن تالقىلاۋلار ءجۇرۋ تيىس دەپ ەسەپتەيمىن. ءبىر جاعىنان قوعامنىڭ ىشىندە دە، ەكىنشى كوميسسيانىڭ اراسىندا. سول ارقىلى الداعى پارلامەنت سايلاۋى وتكەندە، سونىڭ نەگىزىندە قابىلداناتىن زاڭداردىڭ شەڭبەرى, سونىڭ باعىتى انىقتالىپ، سول ارقىلى قوعام الدىعا جىلجيتىنداي، ىلگەرى جۇرەتىندەي بولۋى كەرەك سياقتى»، - دەپ اتاپ ءوتتى ول.

ەسكە سالا كەتەيىك، بۇگىن، 27- ساۋىردە جاريالانعان exit-poll ناتيجەلەرى بويىنشا، كەزەكتەن تىس پرەزيدەنتتىك سايلاۋدا نۇرسۇلتان نازاربايەۆ 97,5 پايىز داۋىس جينادى.

اۆتور: جاسۇلان جولدىبايەۆ