ەۋرازيالىق ەكونوميكالىق وداقتا ءبىرىڭعاي ۆاليۋتا بولمايدى - ق ر ۇلتتىق ەكونوميكا مينيسترلىگى
استانا. قازاقپارات - ەۋرازيالىق ەكونوميكالىق وداق اياسىندا ۆاليۋتالىق وداق قۇرۋ تاقىرىبىن تالقىلامايمىز.
بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر ۇلتتىق ەكونوميكا ۆيتسە- ءمينيسترى تيمۋر جاقسىلىقوۆ وسىلاي ءمالىم ەتتى.
«بۇگىندە اقپاراتتىق كەڭىستىكتەگى وزەكتى تاقىرىپتاردىڭ ءبىرى قازاقستاننىڭ ەۋرازيالىق ەكونوميكالىق وداق ەلدەرىمەن ۆاليۋتالىق ىنتىماقتاستىعىنا بايلانىستى بولىپ وتىر.
وسى ورايدا قازاقستان ە ا ە و اياسىندا ءبىرىڭعاي جانە ۇلت ۇستىلىك ۆاليۋتانى ەنگىزۋ مۇمكىندىگىن جوققا شىعارۋ بويىنشا ايقىن ءارى جۇيەلى ۇستانىمعا نەگىزدەلگەن. بۇل ماسەلەلەردى ءبىز تالقىلامايمىز جانە كۇن تارتىبىندەگى تاقىرىپتا دا قامتىلماعان»، - دەدى ءمينيستردىڭ ورىنباسارى.
وسى ورايدا ول ەۋرازيالىق ەكونوميكالىق وداق شارتىندا ۆاليۋتالىق وداقتى قالىپتاستىرۋ تۋرالى جاعداي، ءبىرىڭعاي ۇلت ءۇستى ۆاليۋتانى قۇرۋ قاراستىرىلماعانىن جانە وسىنداي جۇمىستار جۇرگىزىلمەيتىندىگىن اتاپ ءوتتى.
ونىڭ سوزىنە قاراعاندا، ە ا ە و اياسىندا 2025 - جىلعا دەيىن قارجىلىق نارىقتا رەتتەۋ سالاسىندا تەك زاڭنامالاردى ۇيلەستىرۋ قاراستىرىلعان، الايدا وندا مونەتارلىق نەمەسە ۆاليۋتالىق وداق تۋرالى ەشقانداي دا ماسەلە كوتەرىلمەگەن.
ەستەرىڭىزگە سالا كەتەيىك، ناۋرىز ايىندا ر ف پرەزيدەنتى ۆلاديمير پۋتين بولاشاقتا ۆاليۋتالىق وداقتى قالىپتاستىرۋ مۇمكىندىگىن قاراستىرۋدى ۇسىنعان بولاتىن.
اۆتور: رۋسلان عابباسوۆ
