ەلباسى الماتىدا جاڭادان سالىنعان «الاتاۋ» كينو كونسەرت زالىن ارالاپ كوردى

الماتى. قازاقپارات - بۇگىن ەلباسى نۇرسۇلتان نازاربايەۆ الماتى قالاسىنىڭ الاتاۋ اۋدانىندا ورنالاسقان جاڭا «الاتاۋ» كينو كونسەرت زالىندا بولدى.

مۇندا پرەزيدەنتكە الماتى قالاسىنىڭ قوعامدىق كولىك سالاسىن مودەرنيزاتسيالاۋ جانە ەكولوگيالىق احۋالدى جاقسارتۋ ماقساتىندا ساتىپ الىنعان گازبەن جۇرەتىن اۆتوبۋستار مەن ەكو-تاكسيلەر كورسەتىلدى.

سونىمەن قاتار، مەملەكەت باسشىسى الماتى قالاسىنىڭ اكىمى احمەتجان ەسىموۆ پەن الاتاۋ اۋدانىنىڭ اكىمى باعدات مانزوروۆ جانە باسقا دا رەسمي تۇلعالارمەن بىرگە قالاعا جاڭادان قوسىلعان ناۋرىزباي اۋدانىن، سولتۇستىك اينالما جولىنىڭ تورابىن، قالالىق قوعامدىق مۋنيتسيپالدىق كولىك سالاسىن دامىتۋعا ارنالعان ستەندتەردى تاماشالادى.

بۇدان كەيىن ەلباسى الاتاۋ اۋدانىنىڭ تۇرعىندارىمەن كەزدەستى.

«الماتى جىلدان جىلعا كەڭەيىپ، كوركەيىپ كەلەدى. وسىدان ءبىراز جىل بۇرىن مىناۋ الماتىنىڭ وسى ءوڭىرىنىڭ الەۋمەتتىك جاعدايى وتە قيىن بولاتىن. سوندىقتان حالىقتىڭ جاعدايىن جاقسارتۋ ءۇشىن وسى الاتاۋ اۋدانىن اشقان بولاتىنبىز. مىنە، قازىر اۋدان ءوسىپ، وركەندەپ كەلە جاتىر. حالىق ريزا. مۇندا قىسقى ۋنيۆەرسياداعا قاجەتتى سپورت كەشەندەرى سالىنىپ جاتىر. الاتاۋ مادەنيەت ورتالىعى بوي كوتەردى. ەندى بولاشاقتا قالانىڭ ورتالىعىنداعى بارلىق ءوندىرىس ورىندارى وسى اۋدانعا كوشىرىلەتىن بولادى. سوندىقتان اۋداندا قازىر 150 مىڭنان اسا حالىق تۇراتىن بولسا، بولاشاقتا ولاردىڭ سانى تاعى 100 مىڭعا ارتۋى مۇمكىن»، - دەدى ەلباسى.

اۋدان تۇرعىندارى ءوز كەزەگىندە ن. نازاربايەۆتىڭ حالىق ءۇشىن جاساپ جاتقان كەلەلى ىستەرىنە وتە ريزا ەكەندىكتەرىن ايتىپ، ەلباسىنىڭ ساياساتىن ءبىراۋىزدان قولدايتىندىقتارىن ءبىلدىردى.

ايتا كەتەلىك، بيىلعى جىلى الاتاۋ اۋدانىندا 9 مەكتەپ، 2 بالاباقشا جانە 2 ەمحانا گازداندىرىلاتىن بولادى. سونىمەن قاتار، رىسقۇلوۆ داڭعىلى مەن ەمتسوۆ كوشەلەرىنىڭ قيىلىسىنا جاڭا جول ايرىعىن سالۋ جوسپارلانعان.

اۆتور: جاپپاربەرگەن ايبوتا