ءۇش قازاقستاندىق سولتۇستىك پوليۋسكە ەلىمىزدىڭ تۋىن تىكتى
باقىت كەرىمجانوۆ، سەرگەي بودروۆ پەن كونستانتين ورلوۆ بارنەو مۇزدى لاگەرىنەن سولتۇستىك پوليۋسكە دەيىن التى كۇن ءجۇردى. 130 شاقىرىمدى ءۇش قازاقستاندىق كۇنىنە 25 شاقىرىمنان ءجۇرىپ وتىردى. ەكسپەديتسيا مۇشەلەرىنىڭ ايتۋىنشا، باسقا ەلدەردىڭ شاڭعىشىلارىمەن سالىستىرعاندا بۇل رەكوردتىق كورسەتكىش.
ساپاردى ۇيىمداستىرۋشى قازاق گەوگرافيا قوعامى ءتوراعاسى نۇرلان ءابدۋوۆتىڭ ايتۋىنشا، الداعى ۋاقىتتا وتاندىق عالىمداردىڭ بۇدان دا ۇلكەن جوسپارلارى بار. 2016-جىلى تاۋىلسىزدىكتىڭ 25 جىلدىعىنا وراي ءتورت پوليۋس: ماگنيتتىك پوليۋس، سۋىق پوليۋسى، رۇقسات ەتىلمەگەن پوليۋس پەن وڭتۇستىك پوليۋسكە بارۋدى كوزدەپ وتىر. «ءبىزدىڭ ەڭ ۇلكەن ماقساتىمىز - جاڭا ستانتسيا اشۋ»، - دەدى نۇرلان ءابدۋوۆ.
ەسكە سالا كەتەيىك، قازاقستاننىڭ شاڭعى ەكسپەديتسياسى سولتۇستىك پوليۋسكە 31- ناۋرىزدا اتتاندى. جالپى قۇرامى التى ادامنان تۇراتىن توپ الماتىدان نورۆەگياعا ۇشقان. كەيىن شليتسبەرگەن ارالىنان بارنەوعا دەيىن جەتتى. ەكسپەديتسيانىڭ نەگىزگى ءبولىمى وسى جەردەن باستالدى.
«ءبىزدىڭ ماقساتىمىز - قازاقستاندى الەمگە مادەنيەت، عىلىم جانە گۋمانيتارلىق سالالاردا تانىمال ەتۋ. ەكسپەديتسيا قازاق حاندىعىنىڭ 550 جىلدىعىنا، قازاقستان كونستيتۋتسياسىنىڭ 20 جىلدىعىنا جانە دە جەڭىستىڭ 70 جىلدىعىنا ارنالدى»، - دەدى قازاق گەوگرافيالىق قوعامىنىڭ مۇشەسى تولەگەن تاستانبەكوۆ.
