ايماقتارداعى سۋ تاسقىنىنا بايلانىستى تۋىنداعان پروبلەمالار تولىق شەشىلەدى - ن. نازاربايەۆ

استانا. قازاقپارات - سۋ باسۋ جاعدايىنان تۋىنداعان پروبلەمالار شەشىلەدى.

بۇل تۋرالى بۇگىن استانادا تىلشىلەرگە بەرگەن سۇحباتىندا ق ر پرەزيدەنتى نۇرسۇلتان نازاربايەۆ ءمالىم ەتتى.

بيىل كەيبىر وڭىرلەردە قيىن جاعداي تۋىنداعانىنا، ياعني قازاقستاننىڭ ءبىرقاتار وبلىسىندا اۋا- رايىنىڭ كۇرت جىلىنۋىنان قار تەز ەرىپ، سۋ تاسقىنىنىڭ بولۋىنا بايلانىستى ەلباسى: «ءبىز 15 مىڭ ادامدى قاۋىپسىز جەرگە كوشىردىك. ارينە، مال، تۇرعىن ءۇي، ماتەريالدىق شىعىن بار. ءبىز ول جايىندا بىلەمىز. وسى ورايدا 5,5 مىڭ ادام مەن 1,5 مىڭ تەحنيكا سۋ باسۋدان زارداپ شەككەن ادامدارعا كومەك كورسەتۋدە»، - دەدى.

سونىمەن قاتار، مەملەكەت باسشىسى ابىروي بولعاندا سۋ تاسقىنى سالدارىنان ادام شىعىنى بولماعانىن ايتا كەلە، بۇل تۇرعىدا توتەنشە جاعدايلار قىزمەتكەرلەرى، قۇتقارۋ قىزمەتتەرى ەرەن ەڭبەك ەتىپ جاتقاندىعىن اتاپ ءوتتى.

«قۇتقارۋ قىزمەتتەرىنە ءوز اتىمنان ۇلكەن العىس ايتامىن. وبلىس اكىمدەرىمەن ۇنەمى بايلانىستامىن. قاراعاندى وبلىسىنا 1 ميلليارد تەڭگە ءبولىندى. قازىرگى كەزدە سۋ دەڭگەيى تومەندەپ كەلەدى. وسى پروبلەمانى شەشەمىز، الاڭداۋدىڭ رەتى جوق. بارلىق ءتيىستى شارالار قاداعالانىپ جاتىر. وسى ماسەلەنى شەشۋدە بارلىق كۇشتەر مەن مۇمكىندىكتەر بار»، - دەدى پرەزيدەنت.

مەملەكەت باسشىسى اقمولا جانە پاۆلودار وبلىستارىندا بىرنەشە اۋىلداردى سۋ باسقاندىعىنا توقتالا كەلە، بۇل تۇرعىدا وسى ەلدى مەكەندەردىڭ تۇرعىندارى كومەكتەن تىس قالمايتىندىعىن قاداپ ايتتى.

اۆتور: رۋسلان عابباسوۆ