نۇرسۇلتان نازاربايەۆتىڭ تاڭعى اس ءمازىرى قانداي؟

استانا. قازاقپارات - كەشە ەلوردادا «استانانىڭ اق داستارحانى» اتتى جاڭا كىتاپتىڭ تانىتىمى ءوتتى. وندا اقوردا اسپازدارى ءبىراز قۇپيامەن بولىسكەن.  ايتۋلارىنشا، شەتەلدىك اسا مارتەبەلى مەيمانداردىڭ وزدەرى پرەزيدەنت سارايى اسپازدارىنان كەي تاعامنىڭ رەتسەپتىن دە سۇرايتىن كورىنەدى.

رەسمي كەزدەسۋلەردىڭ بەيرەسمي تۇسىنا اقوردالىقتار ەرەكشە دايىندالادى. ونىڭ قىر- سىرى مىنا كىتاپتا كەڭىنەن باياندالعان. ءيا، داستارحان باسىندا ساياساتكەلەر شەشىلىپ، قارىم- قاتىناستى بەكىتە تۇسەدى. ءبىر داستارحاننان ءدام تاتىپ، تاباقتاس بولۋدىڭ ءمان- ماڭىزى زور. مارتەبەلى مەيمانداردىڭ اس ءمازىرى الدىن الا تاپسىرىس بويىنشا ازىرلەنەدى.

 كەشە عانا «توتال» پرەزيدەنتىن قوناق قىلىپ، بىرەر كۇندە تۇركيا باسشىسىن كۇتەتىن اقوردا اسپازدارىنىڭ جۇمىسى تىم قاۋىرت. ەلىمىزدىڭ باس اسحاناسىندا 7 جىل باس اسپاز بولعان ارتەم كانسيەۆ  بۋرابايداعى تەحنيكۋمدى ءتامامداعان. پرەزيدەنت اسحاناسىندا كوكتەن تۇسكەن ەشكىم جوق. ءبارى - ەلىمىزدەگى كوللەدج تۇلەكتەرى. البەتتە، ءوز ءىسىنىڭ ۇزدىكتەرى ىرىكتەلگەن، - دەيدى.

سودان بولسا كەرەك، بىردە اقوردادا جايىلعان داستارحان باسىندا ق ح ر ءتوراعاسى شي جينپيڭ وتقا پىسىرىلگەن الماعا ەرەكشە ءدام بەرىپ تۇرعان قوسپانىڭ قۇپياسىن سۇراپتى. اسپازدار  ول ۆانيل ەكەنىن ايتقان سوڭ، قىتاي باسشىسى وزىمەن بىرگە 30 پاكەت ۆانيل الا كەتكەن. (ۆانيل - وسىمدىك. ۆانيلدىڭ شىققان جەرى مەكسيكا، ۆانيل قولمەن توزاڭداتىلادى. جەمىسى پىسپەي- اق جينالا بەرەدى)  قازاقى قۋىرداقتان اۋىز تيگەن دميتري مەدۆەديەۆتىڭ ۇستەمە بەرۋدى سۇراعانىن، پۋتيننىڭ پالاۋدى ماقتاعانىن - كۋلينار- ماماندار كاسىبي جەڭىسىمىز دەپ سانايدى.

 نۇربول قارجاۋوۆ، «قاراوتكەل» ر م ك ۇيىمداستىرۋ، باقىلاۋ جانە كادر ءبولىمىنىڭ باستىعى:

 بۇل كىتاپتا تەك قانا اسپازدىق ونەر عانا ەمەس، اسپازدىق فيلوسوفيانىڭ ساياساتپەن ساباقتاسۋ جاعى دا كورسەتىلگەن. جانە تەك ءوزىمىزدىڭ اسپازداردىڭ ونەرلەرى عانا ەمەس، الەمدىك مايتالمانداردىڭ ونەرى جان- جاقتى اشىلىپ، كورسەتىلەدى.

 ال پرەزيدەنتتىڭ سەرگەك ءجۇرۋىنىڭ سىرى نەدە؟ نۇرسۇلتان نازاربايەۆ اس تاڭداۋدا ۇلتتىق تاعامدارعا باسىمدىق بەرەدى. اقوردادا تارتىلاتىن جىلقى ەتى كوكشەتاۋدا بورداقىلانعان مالدان. سونداي- اق، پرەزيدەنت كەسپە كوجەنى ۇناتادى دەيدى. ال كۇندەلىكتى تاڭعى اس ءمازىرى مىناداي: بوتقا، سۇزبە، ىرىمشىك جانە جاڭعاقتار. البەتتە، شاي. پرەزيدەنتتىڭ اس مازىرىندە فۋا- گرا نە وزگە دە جەڭسىك اس تۇرلەرى اتىمەن جوق، - دەيدى اسپازدار.

 اقوردانىڭ اس مازىرىندە ۇلتتىق تاعامداردىڭ بولۋى - بۇلجىماس ەرەجە. مىسالى، جەنت نەمەسە قوسپا دەيمىز، تالقاننان جاسالعان تاعام سىيلى قوناقتارعا مىناداي ەرەكشە تۇردە، شوكولاد قۇيىلعان قالپىندا تارتىلادى. ال قايناتىلعان سارى ىرىمشىك كادىمگى اۋىل رەتسەپتىمەن ازىرلەنەدى ەكەن.

 بۇعان دەيىن قۇپيا بولىپ كەلگەن قىزىق دەرەكتەرگە تولى كىتاپ جاقىندا ساتىلىمىعا شىعادى. وندا اقوردا اسپازدارىنىڭ جەكە رەتسەپتتەرى دە جاريالانعان.

 ءمولدىر باقىت- قىزى

«استانا» تەلەارناسى