يران سىرتقى ىستەر ءمينيسترى ەلباسىنا «التىلىق» ەلدەرىمەن يادرولىق ماسەلەدە كەلىسسوزدەرگە كومەكتەسكەنى ءۇشىن ريزاشىلىعىن ءبىلدىردى
بۇل تۋرالى اقوردانىڭ باسپا ءسوز قىزمەتى حابارلادى.
كەزدەسۋ بارىسىندا قازاقستان پرەزيدەنتى ءبىزدىڭ ەل يراندى جاقىن ساياسي جانە ەكونوميكالىق سەرىكتەس رەتىندە قاراستىراتىنىن، ءتۇرلى قيىندىقتارعا قاراماستان قارىم- قاتىناسىمىز ءاردايىم جاقسى دامىپ كەلگەنىن ايتتى.
- مەن يراننىڭ بارلىق مەملەكەت باسشىلارىمەن ءوزارا سەنىسىپ جۇمىس ىستەدىم. قازىرگى پرەزيدەنت ح. رۋحانيمەن ءبىز بىلتىر ءتورت رەت كەزدەستىك. ەلدەرىمىزدىڭ اراسىندا ىنتىماقتاستىق ءۇشىن مول الەۋەت بار.
ۇلى جىبەك جولىن جاڭعىرتۋ اياسىندا كوپ جۇمىستار اتقارىلۋدا. قازاقستاننان پارسى شىعاناعىنا باراتىن تەمىرجول ەكونوميكالىق بايلانىستاردى نىعايتۋعا ۇلەس قوسادى. سونداي-اق ەلدەرىمىزدىڭ اراسىندا كاسپي تەڭىزى بويىنشا دا ءوزارا ىقپالداستىق جولعا قويىلعان، سول ارقىلى بۇل ماسەلە دە ءوز شەشىمىن تابۋى ءتيىس، - دەدى مەملەكەت باسشىسى.
سونىمەن قاتار، نۇرسۇلتان نازاربايەۆ م. ءزاريفتى يران سىرتقى ساياساتىنىڭ جەمىستى جۇمىسى ارقىلى قول جەتكەن لوزاننادا وتكەن كەلىسسوزدەر ناتيجەسىمەن قۇتتىقتادى.
- بۇل ماسەلەنى شەشۋ ءۇشىن قازاقستان دا كۇش- جىگەر جۇمسادى. بالكىم، ءالى بارلىق ماسەلە شەشىلمەگەن بولار، ءبىراق كەلىسسوز قورىتىندىلارى بولاشاقتان زور ءۇمىت كۇتتىرەدى، - دەدى قازاقستان پرەزيدەنتى.
م. زاريف ەلباسىعا يران يسلام رەسپۋبليكاسىنىڭ پرەزيدەنتى ح. رۋحانيدىڭ سالەمىن جەتكىزدى.
يران سىرتقى ىستەر ءمينيسترى سونداي-اق نۇرسۇلتان نازاربايەۆقا «التىلىق» ەلدەرىمەن يراننىڭ يادرولىق ماسەلەسى بويىنشا كەلىسسوزدەر وتكىزۋگە كومەكتەسكەنى ءۇشىن ايرىقشا ريزاشىلىعىن ءبىلدىردى.
م. زاريف ەكى ەل اراسىنداعى قارىم-قاتىناستىڭ دەڭگەيى جوعارى ەكەنىن اتاپ ءوتتى.
- قازاقستان مەن يران - ورتاق تاريحي جانە مادەني بايلانىستارى بار دوستاس مەملەكەتتەر. ەلدەرىمىزدىڭ اراسىندا كوپتەگەن حالىقارالىق جانە وڭىرلىك ماسەلەلەرگە قاتىستى كوزقاراس جاقىندىعى بار.
پرەزيدەنت ح. رۋحانيدىڭ قازاقستانعا ساپارىنان بەرى ەلدەرىمىزدىڭ ساۋدا- ەكونوميكا سالاسىنداعى ءوزارا ىقپالداستىق دەڭگەيى ايتارلىقتاي ءوستى. ءبىز نۇرسۇلتان نازاربايەۆتىڭ يرانعا جاۋاپ ساپارى ەكونوميكالىق قارىم- قاتىناستارعا جاڭا سەرپىن بەرەدى دەپ ۇمىتتەنەمىز، - دەدى موحامماد دجاۆاد زاريف.
سىرتقى ساياسات ۆەدومستۆوسىنىڭ باسشىسى قازاقستان مەن يراننىڭ ءبىرقاتار سالالاردا ىنتىماقتاستىقتى دامىتۋ پەرسپەكتيۆالارى زور ەكەنىنە توقتالدى.
- بىزدە شيكىزات جانە پايدالى قازبالار ترانزيتىنە، ونەركاسىپ پەن جول قۇرىلىسىنا بايلانىستى ودان ءارى ىنتىماقتاسۋعا جاقسى نەگىز بار. يران وسى جانە باسقا سالالاردا قازاقستانمەن ىنتىماقتاستىقتى بۇدان ءارى تەرەڭدەتە تۇسۋگە نيەتتى. ءبىز قازاقستانمەن قارىم- قاتىناستارىمىز نۇرسۇلتان نازاربايەۆتىڭ قولداۋىمەن نىعايا بەرەتىنىنە سەنىمدىمىز، - دەدى يران سىرتقى ىستەر ءمينيسترى.
