ەلباسى: شىعىس قازاقستان - اباي، شاكارىم، مۇحتار اۋەزوۆ تۋعان كيەلى مەكەن
ەلباسى مۇندا مۋزەي جادىگەرلىكتەرىمەن تانىستى جانە سەمەي قالاسىنىڭ شىعارماشىلىق زيالى قاۋىم وكىلدەرىمەن كەزدەستى.
نۇرسۇلتان نازاربايەۆ شىعىس قازاقستان وبلىسى مادەني جانە رۋحاني مۇرالارعا باي ەكەنىن، ولاردى ساقتاۋ مەن دامىتۋ مەملەكەتتىك ساياساتتىڭ باسىمدىقتارىنىڭ ءبىرى بولىپ قالا بەرەتىنىن اتاپ ءوتتى.
- شىعىس قازاقستان - اباي، شاكارىم، مۇحتار اۋەزوۆ تۋعان كيەلى مەكەن. ولاردىڭ شىعارمالارىندا تەرەڭ فيلوسوفيا تۇنىپ جاتىر. ۇلى اباي بارلىق ۇلتتار ءبىر اۋلەتتىڭ بالالارى ەكەنىن ءجۇز جىل بۇرىن ايتقان.
ءبىز بۇگىن ەلدەگى دوستىقتى، تۇراقتىلىقتى نىعايتۋدامىز. كوپتەگەن ەلدەر 100 جىلدا دا جەتپەگەن نارسەگە ءبىز نەبارى 23 جىلدا قول جەتكىزدىك. ەگەر تاۋەلسىزدىك ساقتالماسا، ەل ەكونوميكاسى دامىماسا جانە الەۋمەتتىك ماسەلەلەر شەشىمەسە، حالىققا يگىلىككە كەنەلمەيدى. بۇگىندە بارلىق باعىتتا جۇمىس جۇرگىزىلىپ جاتىر.
بۇرىن سەمەيدە جىلۋ بەرۋگە بايلانىستى پروبلەما بولدى، 200 قازاندىق قالانى تۇتىنگە ورايتىن. قازىر بۇل پروبلەمانىڭ ءبارى شەشىلدى. ءبىز سەمەي گ ە س-ىن سالۋ ماسەلەسىن ويلاستىرىپ جاتىرمىز.
جالپى، قازاقستان دۇرىس جولدا كەلەدى، ساياسي تۇراقتىلىقتى، ءوزارا تۇسىنىستىكتى جانە دوستىقتى ساقتاۋ قاجەت، - دەدى قازاقستان پرەزيدەنتى.
سوڭىندا نۇرسۇلتان نازاربايەۆ كورسەتكەن قولداۋلارى ءۇشىن كەزدەسۋگە قاتىسۋشىلارعا العىس ايتىپ، ەڭبەكتە تابىس تىلەدى.
***
ابايدىڭ «جيدەباي- ءبورىلى» مەملەكەتتىك تاريحي- مادەني جانە ادەبي- مەموريالدىق مۋزەي- قورىعى 1940 -جىلى قۇرىلعان.
20 مىڭنان استام جادىگەرلىك ساقتالىپ وتىرعان مەكەمەدە 82 ادام جۇمىس ىستەيدى. مۋزەي ەكسپوناتتارى قاتارىندا اباي ءداۋىرىن، ونىڭ قوعامدىق قىزمەتىن سيپاتتايتىن ءتۇپنۇسقا قۇجاتتار، ەتنوگرافيالىق جانە مۇراعاتتىق ماتەريالدار، شىعىس كلاسسيكتەرىنىڭ سيرەك كىتاپتارى، باتىس فيلوسوفتارىنىڭ شىعارمالارى، اقىن زامانداستارىنىڭ ەستەلىكتەرى بار.
