قازاقستاندا جاسالعان: الماتى اشىتقى زاۋىتى جوعارى ساپالى ونىممەن قامتاماسىز ەتەدى

الماتى. قازاقپارات - الماتىدا مەملەكەتتىك يندۋستريالدى-يننوۆاتسيالىق دامۋ باعدارلاماسى اياسىندا «الماتى اشىتقى زاۋىتى» ا ق نەگىزگى ءوندىرىسى تولىعىمەن جاڭعىرتىلدى.

بۇعان 240 ميلليون تەڭگە قارجى جۇمسالىپ، قوسىمشا 130 جۇمىس ورنى اشىلدى. بۇل تۋرالى «قازاقپارات» تىلشىسىنە «الماتى اشىتقى زاۋىتى» ا ق پرەزيدەنتى ۆلاديمير ەگۋتكين ايتتى.

«ءبىزدىڭ زاۋىت - قازاقستان بويىنشا سىعىمدالعان جانە قۇرعاتىلعان اشىتقىلار وندىرەتىن جالعىز كاسىپورىن. مەملەكەتتىك يندۋستريالدى- يننوۆاتسيالىق دامۋ باعدارلاماسى اياسىندا ءبىزدىڭ زاۋىتتا 240 ميلليون تەڭگەگە نەگىزگى ءوندىرىس تولىعىمەن جاڭعىرتىلدى. بۇل بىزگە باسەكەگە قابىلەتتى، بارلىق الەمدىك ستاندارتتارعا جاۋاپ بەرە الاتىن ونىمدەردى شىعارۋعا مۇمكىندىك بەرەدى»، - دەدى ە. ەگۋتكين.

ونىڭ ايتۋىنشا، زاۋىت 1969-جىلى ىسكە قوسىلعان. سودان بەرى قازاقستاننىڭ ورتالىق جانە وڭتۇستىك ايماقتارىن اشىتقى ونىمدەرىمەن قامتاماسىز ەتىپ كەلەدى.

«قايتا جابدىقتاۋ بارىسىندا ساعاتىنا 2000-2500 كەلى سىعىمدالعان اشىتقى جانە ساعاتىنا 80-100 كەلى قۇرعاتىلعان اشىتقى وندىرەتىن ەكى جەلى ىسكە قوسىلدى. وسىلايشا، قازاقستاننىڭ بارلىق وبلىستارىن باسەكەگە قابىلەتتى جوعارى ساپالى اشىتقى ونىمدەرىمەن قامتاماسىز ەتۋدى كوزدەپ وتىرمىز»، - دەدى ۆ. ەگۋتكين.

اۆتور: جاپپاربەرگەن ايبوتا