ءماجىلىس ەلباسىنا ۇندەۋ جولداپ، كەزەكتەن تىس پرەزيدەنت سايلاۋىن وتكىزۋ تۋرالى باستامانى قولداۋدى جانە سايلاۋ ۋاقىتىن بەلگىلەۋدى سۇرادى

ول بويىنشا پالاتا دەپۋتاتتارى مەملەكەت باسشىسى نۇرسۇلتان نازاربايەۆتىڭ اتىنا ۇندەۋ جولداپ، وندا پرەزيدەنتتىك سايلاۋ وتكىزۋ تۋرالى ۇسىنىستى قولداۋدى جانە سايلاۋ مەرزىمىن بەلگىلەۋدى سۇرادى.

جالپى وتىرىستاعى تالقىلاۋدان سوڭ ق ر تۇڭعىش پرەزيدەنتى ەلباسى نۇرسۇلتان نازاربايەۆقا ارنالعان ۇندەۋدى ءماجىلىس ءتوراعاسى قابيبوللا جاقىپوۆ وقىدى. «كونستيتۋتسياعا سايكەس ءبىز، دەپۋتاتتار مەملەكەت باسشىسى نۇرسۇلتان ءابىش ۇلى نازاربايەۆقا قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنت سايلاۋىن وتكىزۋ ۇسىنىسىن قولداۋ وتىنىشىمەن شىعۋىمىز قاجەت»، دەگەن تومەنگى پالاتا سپيكەرى دەپۋتاتتار اتىنان ەلباسىنا جولدانعان ۇندەۋىن وقىپ بەردى.

ۇندەۋدە كەزەكتەن تىس سايلاۋ وتكىزۋ باستاماسىن بارشا قوعام قولداپ وتىرعاندىعىنا نازار اۋدارىلعان.

«ءماجىلىس دەپۋتاتتارى، قازاقستان حالقى اسسامبلەياسى كەڭەسىنىڭ مۇشەلەرى، كەزەكتەن تىس پرەزيدەنتتىك سايلاۋ وتكىزۋ تۋرالى باستاما جاسادى. وسىعان ۇقساس ۇسىنىستار پارلامەنتكە ەلىمىزدىڭ بارلىق وڭىرلەرىندە تۇرىپ جاتقان سايلاۋشىلاردان جانە حالىقتىڭ ءتۇرلى الەۋمەتتىك توپتارىنان بىرنەشە مارتە تۇسكەن بولاتىن. بۇل باستاما ەلىمىزدەگى ساياسي پارتيالار تاراپىنان، ازاماتتىق قوعام ينستيتۋتتارىنان، جاستار مەن كاسىپكەرلەر قاۋىمداستىعىنان دا قولداۋ تاپتى. كەزەكتەن تىس سايلاۋ وتكىزۋ تۋرالى قوعامدىق پىكىر قازاقستانعا دا اسەر ەتپەي قويمايتىن وبەكتيۆتى گەوساياسي جانە سىرتقى ساياساتتاعى جاعدايلارعا بايلانىستى بولىپ تابىلادى»، - دەدى ق. جاقىپوۆ.

ۇندەۋدە ءماجىلىس دەپۋتاتتارىنىڭ كەزەكتەن تىس سايلاۋ قازاقستان مەملەكەتتىگىنىڭ ودان ءارى نىعايتۋعا سەپتىگىن تيگىزەتىنىنە سەنىم بىلدىرەدى.

«قۇرمەتتى نۇرسۇلتان ءابىش ۇلى! قازاقستان حالقى اسسامبلەياسى كەڭەسىنىڭ ۇسىنىسىن قولداۋدى جانە كونستيتۋتسياسىنىڭ 41-بابىنىڭ 3/1-تارماعىنا سايكەس كەزەكتەن تىس پرەزيدەنت سايلاۋىن وتكىزۋ مەرزىمىن بەلگىلەۋدى قاراستىرۋدى سۇرايمىز»، - دەدى ءماجىلىس سپيكەرى.

وسىعان بايلانىستى دەپۋتاتتار ءماجىلىستىڭ ۇندەۋىن ءبىراۋىزدان قولدادى.

اۆتور: قانات مامەتقازى ۇلى