ن. نازاربايەۆ پەن ۆ. پۋتين ۋكراينا داعدارىسىن رەتتەۋگە ارنالعان مينسك كەزدەسۋىنىڭ قورىتىندىلارىن تالقىلادى

بۇل تۋرالى اقوردانىڭ باسپاءسوز قىزمەتىنەن حابارلادى.

ەكى ەلدىڭ كوشباسشىلارى ۋكراينا داعدارىسىن رەتتەۋگە ارنالعان مينسك كەزدەسۋىنىڭ قورىتىندىلارىن تالقىلادى.

قازاقستان پرەزيدەنتى ناق وسى  «نورماند تورتتىگىنىڭ» جوعارى دەڭگەيدەگى كەزدەسۋى، اسىرەسە ۆلاديمير پۋتيننىڭ كەلىسسوزدەر كەزىندەگى بەلسەندى ۇستانىمى  مينسكىدە كەلىسىمگە جەتۋگە سەپتىگىن تيگىزگەنىن اتاپ ءوتتى. 

مەملەكەتتەر باسشىلارى قاقتىعىسۋشى ەكى تاراپتىڭ دا وق اتۋدى بەلگىلەنگەن ساعاتتا (2015 - جىلعى 15- اقپان، 00.00 ساعات) توقتاتۋ تۋرالى ۋاعدالاستىقتى ورىنداۋى ەرەكشە ماڭىزدى ەكەنىنە توقتالدى. 

قازاقستان مەن رەسەي پرەزيدەنتتەرى بەيبىت ۇدەرىستى قامتاماسىز ەتۋگە جۇمسالعان كۇش-جىگەر ۋكرايناداعى قاقتىعىس ماسەلەسىن شەشۋگە سەپتىگىن تيگىزەدى دەپ ۇمىتتەنەتىندەرىن جەتكىزدى.

ۆ.پۋتين سونداي-اق ەكونوميكا سالاسىنداعى بىرلەسكەن جۇمىستى تالقىلاۋ ءۇشىن بەلارۋس، قازاقستان جانە رەسەي باسشىلارىنىڭ استاناداعى ءۇشجاقتى كەزدەسۋىنە قاتىسۋعا دايىن ەكەنىن راستادى.

تەلەفون ارقىلى سويلەسۋگە رەسەي جاعى باستاماشىلىق ەتتى.