سوعىس ارداگەرلەرى جالپى ۇلتتىق اكسياعا باستاماشىلىق ەتكەنى ءۇشىن مەملەكەت باسشىسىنا ريزاشىلىقتارىن ءبىلدىردى
استانا. قازاقپارات - ەلباسى نۇرسۇلتان نازاربايەۆتىڭ اتىنا ۇلى وتان سوعىسىنىڭ ارداگەرلەرى، الماتى وبلىسىنىڭ تۇرعىنى ناقىسپەك ۇمبەتايەۆ جانە پاۆلودار قالاسىنىڭ تۇرعىنى الەكساندر رۋدسكويدان حات كەلدى.
بۇل تۋرالى اقوردانىڭ باسپا ءسوز قىزمەتى حابارلادى.
اۆتورلار ءوز حاتتارىندا ارداگەرلەردى قولداۋ ماسەلەسىنە ۇدايى كوڭىل ءبولىپ وتىرعانى ءۇشىن مەملەكەت باسشىسىنا ريزاشىلىقتارىن بىلدىرگەن. ولار ەلدەگى جاسالعان جاعدايدىڭ ارقاسىندا وزدەرىنە تۇراقتى تۇردە جان-جاقتى كومەك كورسەتىلەتىنىن اتاپ وتكەن.
ن. ۇمبەتايەۆ ۇلى وتان سوعىسىنداعى جەڭىستىڭ الداعى 70 جىلدىعىنىڭ ماڭىزى جوعارى ەكەنىنە توقتالعان. ول سونداي-اق قازاقستاننىڭ دامۋى مەن وركەندەۋى جولىنداعى كەزەكتى قادام بولىپ سانالاتىن مەملەكەت باسشىسىنىڭ «نۇرلى جول - بولاشاققا باستار جول» اتتى جولداۋىنا قولداۋ بىلدىرگەن.
ا. رۋدسكوي مەملەكەت باسشىسىنا ۇوس ارداگەرلەرىن قولداۋ جونىندەگى جالپى ۇلتتىق اكسياعا باستاماشىلىق ەتكەنى ءۇشىن العىس بىلدىرە كەلىپ، جاڭا جىلعا العان قۇتتىقتاۋ مەن سىيلىقتىڭ ءوزىن جاقسى اسەرگە بولەگەنىن ايتادى.
پاۆلودار قالاسىنان حات جولداعان ارداگەر الەمدە بولىپ جاتقان وقيعالارعا قاتىستى دا الاڭداۋشىلىعىن بىلدىرگەن.
«بىزگە، سوعىستى باستان وتكەرگەندەرگە ادامدار قازا تاۋىپ جاتقان قاقتىعىستار تۋرالى ەستۋ اۋىر. ءبىز پوليەتنوستى، بەيبىتسۇيگىش ەلدە تۇرامىز، الاڭسىزبىز، وسى قۋانتادى. قۇداي بىزگە بۇدان ءارى دە تاتۋلىق پەن كەلىسىمدە ءومىر سۇرۋگە جازسىن»، - دەلىنگەن حاتتا.
