قازاقستاندا جاسالعان: ەلىمىز كەمەدەن باستاپ حالىق كەڭ تۇتىناتىن تاۋارلارعا دەيىن وندىرە الادى - ۆ. ۆاليەۆ

ورال. قازاقپارات - ەلباسى كەشە ۇكىمەتتىڭ كەڭەيتىلگەن وتىرىسىندا داعدارىسقا قارسى شارالاردى اتقارۋدا ناقتى مىندەتتەر قويدى.

ەڭ الدىمەن، ءىرى كومپانيا بولسىن، ءوز ءىسىن جاڭا باستاعان شاعىن كاسىپورىن بولسىن، مەملەكەت قولداۋىنا يەك ارتا الادى.

شىن مانىسىندە قازاقستان كەمەدەن باستاپ حالىق كەڭ تۇتىناتىن تاۋارلارعا دەيىن وندىرە الادى. بۇعان ءبىزدىڭ زاۋىتتىڭ تىنىس-تىرشىلىگى دالەل. بۇل تۋرالى «ورال «زەنيت» زاۋىتى» ا ق باس ديرەكتورى ۆياچەسلاۆ ۆاليەۆ ءمالىم ەتتى.

ونىڭ ايتۋىنشا، «زەنيت» زاۋىتى قورعانىستىق ماقساتتاعى عانا ەمەس، سونىمەن قاتار قاراپايىم تۇرعىندارعا قاجەتتى ونىمدەر وندىرۋگە دە ماماندانعان. اسىرەسە، ەلىمىز تاۋەلسىزدىك العاننان كەيىنگى قيىن كەزەڭدەردىڭ وزىندە ەلباسىمىزدىڭ قولداۋ كورسەتۋىنىڭ ناتيجەسىندە كاسىپورىن اياعىنا نىق تۇردى.

اسىرەسە، كاسپي تەڭىزىندە شەكارا كۇزەتۋگە ارنالعان ۇلكەندى-كىشىلى كەمە، كاتەرلەردى شىعارىپ كەلەدى. بۇلاردىڭ ءجۇزۋ جىلدامدىعى، جاراقتاندىرىلۋى، سىيىمدىلىعى ۇنەمى جەتىلدىرىلىپ كەلەدى.

ەلباسى اتاپ وتكەندەي، رەسەيدە سۇرانىستىڭ قىسقارۋىنا بايلانىستى قازاقستاندىق ەكسپورتتى ديۆەرسيفيكاتسيالاۋدى كۇشەيتۋگە مۇمكىندىك تۋىپ وتىر. ارزانداعان قۋات كوزدەرىن، قۇراستىرۋ جانە قوسالقى بولشەكتەردى ءوز ەكونوميكامىزدى، سونىڭ ىشىندە وڭدەۋ ونەركاسىبىن دامىتۋ ءۇشىن پايدالانىپ قالۋىمىز كەرەك.

«قازىر ناعىز جۇمىس جاسايتىن كەز. جەر قويناۋىن پايدالانۋشىلاردان، ۇلتتىق كومپانيالاردان تاپسىرىس كەرەك. ەڭ باستىسى، جۇمىس ورىندارىن قىسقارتپاۋ ءۇشىن ءوندىرىس كولەمىن كەمىتپەۋىمىز قاجەت.

ايتالىق، ءبىزدىڭ زاۋىت باسقا كاسىپورىندار قاتارىندا جۇمىس ورىندارىن ساقتاۋ جونىندە وبلىس اكىمدىگىمەن، كاسىپوداق ۇيىمىمەن مەموراندۋمعا قول قويدى. كۇنى بۇگىن «زەنيتپەن» بىرگە وبلىستاعى تاعى ءتورت كاسىپورىن بيىلعى جىلى مەملەكەتتىك قورعانىستىق تاپسىرىس العالى وتىر. بۇل - ۇلكەن قولداۋ- كومەك. مەملەكەت قولداۋىن سەزىنە وتىرىپ، ءوزىمىز دە جاڭاشىلدىقپەن جۇمىستانا ءبىلۋىمىز كەرەك»، - دەدى ۆ. ۆاليەۆ.

اۆتور: ەلجان ەرالى