جامبى اتۋ سپورتىن دامىتۋ ءۇشىن ساداق، جەبە جاسايتىن شەبەرحانالار سالۋ قولعا الىنباق

بۇل تۋرالى ق ر ۇلتتىق سپورت تۇرلەرى قاۋىمداستىعىنىڭ باسپا ءسوز قىزمەتى حابارلادى.

سەمينارعا ق ر ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان، ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ، ق ر مادەنيەت جانە سپورت مينسترلىگى سپورت جانە دەنە شىنىقتىرۋ ىستەرى كوميتەتىنىڭ ۇلتتىق سپورت باسقارماسىنىڭ باسشىسى ماقسات قويشىبايەۆ، موڭعوليا رەسپۋبليكاسىنىڭ ۇلتتىق ات سپورتى فەدەراتسياسىنىڭ پرەزيدەنتى روم اۋەسحان، ەتنوگراف-زەرتتەۋشى بەكەن قايرات ۇلى، جامبى اتۋ ونەرىن زەرتتەۋشى، جازۋشى ۇزبەن قۇرمانبايەۆ، ۇلتتىق سپورت مەكتەپتەرى مەن كلۋبتارىنىڭ ديرەكتورلارى، جامبى اتۋ سپورتىنىڭ جاتتىقتىرۋشىلارى، ق ر ۇلتتىق سپورت قاۋىمداستىعىنىڭ باسشىلارى، ب ا ق وكىلدەرى قاتىستى.

ق ر 2013-جىلدان باستاپ ۇلتىمىزدىڭ ۇمىت بولعان جامبى اتۋ سپورتىن قايتا جانداندىرۋدى قولعا الدى. سودان بەرى بىرنەشە رەت جاپپاي دايىندىق شارالارىن وتكىزدى. اتاپ ايتساق، وتكەن جىلدىڭ ناۋرىز ايىندا استانا قالاسىندا موڭعوليانىڭ ساداق اتۋدان چەمپيونى باتكەرىل ميچيردى شاقىرتىپ، تەوريالىق جانە تاجىريبەلىك سەمينار ۇيىمداستىردى.

مامىر ايىندا تۇركىستان قالاسىندا بارلىق وبلىستاردىڭ جامبى اتۋدى ۇيىمداستىرۋشى، جاتتىقتىرۋشى، ويىنشىلاردى شاقىرتىپ تۇركىستاننىڭ قالالىق كىتاپحاناسىندا تەوريالىق سەمينار وتكىزىپ، كەلەسى كۇنى اتشاباردا ساداق اتۋدى ءىس جۇزىندە كورسەتتى.

ودان كەيىن جامبىل وبلىسىنىڭ مەركى اۋدانىنا بارلىق ايماقتاردىڭ 28 سپورتشىلارىن 12 كۇندىك وقۋ-جاتتىعۋ جيىنىنا شاقىرىپ، ساباق وتكىزدى. ولارعا ارناپ جامبى اتۋ ويىنىن ۇيرەنۋشىگە ارنالعان شاعىن كىتاپشا شىعارىلىپ تاراتىلدى.

2014-جىلى جامبىل وبلىسىنىڭ مەركى اۋدانىندا جانە قىزىلوردا وبلىسىنىڭ جاڭاقورعان اۋدانىندا رەسپۋبليكالىق جارىستار وتكىزىلدى. بيىل دا ءبىرقاتار ءىس-شارالار جۇزەگە اسىرىلماقشى. ولار:

- «جامبى اتۋ سپورتىنان 1- حالىقارالىق تۋرنير»؛

- «قازاق حاندىعىنىڭ 550 جىلدىعىنا ارنالعان كوكپار، اۋدارىسپاق، تەڭگە ىلۋدەن ІХ، جامبى اتۋدان 2- جاستار اراسىنداعى رەسپۋبليكالىق چەمپيونات»؛

- «م. عابدۋلليننىڭ 100 جىلدىق مەرەيتويىنا ارنالعان ق ر جاسوسپىرىمدەر اراسىنداعى كوكپار، اۋدارىسپاق، تەڭگە ىلۋدەن، جامبى اتۋدان تۋرنير»؛

- كونستيتۋتسيامىزدىڭ جانە حالىقتار اسسامبلەياسىنىڭ 20 جىلدىعىنا وراي ۇلتتىق سپورت تۇرلەرىنەن وتەتىن Ⅲ فەستيۆالدا كوكپار، اۋدارىسپاق، قىز قۋۋ، تەڭگە ىلۋمەن قاتار جامبى اتۋدان دا جارىس وتكىزۋ جوسپارلانعان.

- قوعام قايراتكەرى ا. اسقاروۆتى ەسكە الۋعا ارنالعان حالىقارالىق تۋرنيردە كوكپار، اۋدارىسپاقپەن جانە جامبى اتۋدان حالىقارالىق جارىس وتكىزىلمەك.

وبلىستارداعى ۇلتتىق سپورت مەكتەپتەرى مەن كلۋبتارىنان جامبى اتۋ بولىمدەرىن اشۋ قولعا الىنۋدا.

وسىعان وراي وتكەن جىلى مونعوليادان بارلىق وبلىستاردىڭ ۇلتتىق سپورت مەكتەپتەرىنە جانە جەكەلەي سپورتشىلارعا جامبى اتۋ سپورتىن ۇيرەنۋ ءۇشىن ساداقتار مەن جەبەلەر ساتىپ الىنىپ تاراتىلدى.

جامبى اتۋ سپورتىن كوكپار، اۋدارىسپاق سپورتتارىنىڭ دارەجەسىنە جەتكىزۋ ءۇشىن العىشارتتار جاسالىپ، كوپتەگەن شارالار وتكىزىلدى.

مۇنىڭ بارلىعى ءبىر جاعىنان 2017-جىلى ەلىمىزدە وتەتىن ەكسپو-2017 حالىقارالىق كورمەسى كەزىندە جامبى اتۋ سپورتى تۇرىنەن دە حالىقارالىق ءدۇبىرلى دودا وتكىزۋگە دايىندىق بولىپ سانالادى.

جامبى اتۋ سپورتىن جەتكىلىكتى دارەجەدە ناسيحاتتاپ، دامىتۋ ءۇشىن ارنايى كەڭەس قۇرىلدى.

سەميناردا كوتەرىلگەن ماسەلەلەر بويىنشا، جامبى اتۋ سپورتىنىڭ ەلىمىزدە كەڭ قانات جايىپ بارلىق وبلىس، قالا، اۋداندارعا تاراپ، بۇقارالىق سپورتقا اينالۋىنا باسا نازار اۋدارۋعا، وبلىستار مەن استانا، الماتى قالالارىنداعى ۇلتتىق سپورت مەكتەپتەرى مەن ۇلتتىق سپورت كلۋبتارىندا جامبى اتۋ بولىمدەرىن اشىپ، ولاردى قاجەتتى قۇرالدارمەن، وقۋلىقتارمەن قامتاماسىز ەتۋگە، موڭعوليا، ۆەنگريا، تۇركيا ەلدەرىنىڭ جامبى اتۋ سپورتىنىڭ بىلىكتى ماماندارىمەن تاجىريبە الماسۋدى ۇيىمداستىرىپ، جامبى اتۋ سپورتىنا قاجەتتى قۇرال-جابىقتار: ساداق، جەبە جاسايتىن شەبەرحانالاردى دامىتۋ ماسەلەلەرى تالقىلاندى.