قىتايداعى قانداستارىمىز «اقىلدى قويان» جاڭا ەلەكتروندى وقۋ قۇرالىن ساتىلىمعا شىعاردى
اتالمىش ينتەللەكتۋالدىق وقۋ قۇرالى 3-12 جاس ارالىعىنداعى بالالار مەن جاسوسپىرىمدەرگە ارنالعان. كولەمى 800 شۋماقتان تۇراتىن 88 ءتۇرلى تاقپاق، قازاق حالىق ەرتەگىلەرى مەن شەتەل حالىقتارىنىڭ ەرتەگىلەرىن قامتىعان 130 ەرتەگى، قازاق حالقىنىڭ ادەت-عۇرىپ، ۇلتتىق دۇنيەتانىمىنا قاتىستى 1500 گە جۋىق اتاۋعا تۇسىنىك بەرىلگەن.
سونىمەن قاتار ماقال-ماتەل، جاڭىلتپاش، ىرىمدار مەن تىيىمدار، اباي ولەڭدەرىن قامتىعان 500-گە جۋىق ءماتىن مەن 200 دەن استام اندەر قامتىلعان.
«بۇعان دەيىن «دانا» قالامى ارقىلى وقىتىلاتىن «دىبىستى الىپپە»، «اعىلشىن ءتىلى نەگىزدەرى»، «باستاۋىش مەكتەپ وقۋلىقتارىن وقىتۋ قۇرالى» سىندى ونىمدەر شىعارعان بولاتىنبىز. «اقىلدى قويان» - وسى ماتەريالداردى بالالارعا وقىپ بەرەتىن ەلەكتروندى قۇرىلعىنىڭ اتى. قۇرىلعى ءتۇرلى-ءتۇستى جارىق شىعارا الاتىن، قۇلاقتارى بۇكتەۋگە ىڭعايلاستىرىلعان قويان فورماسىندا جاسالعاندىقتان «اقىلدى قويان» اتالىپ وتىر.
اتالمىش قۇرىلعىعا ەنگىزىلگەن دىبىستاردى قازاق راديوسىنىڭ بەلدى جۇرگىزۋشىسى جانار سايلانبەك قىزى، شىڭجاڭداعى قازاق رايوسىنىڭ «كۇمىس كومەي» ديكتورلارى قاينيكامال جولىمبەت قىزى، شىنجاڭ تەلەارناسىنىڭ بەلدى دىبىس اكتورلارى سەرعازى تولەۋحان ۇلى مەن جاينا عينايات قىزى، شىنجاڭ قازاعىنا تانىمال كومپوزيتور ، ءانشى عيزات ساكەن ۇلى دىبىستاعان. رەداكتورلارى بەلگىلى جاس اقىن، جۋرناليست ءىنىم ورازبەك ساپارحان ۇلى مەن باسپاگەر باۋىرىم قابىكەن زەينۇرالين. 80 پايىزدان استام دىبىس قازاق راديوسىندا جازىلدى، قالعاندارى عيزات ساكەن ۇلى مەن قالىسبەك بابان ۇلىنىڭ جەكە ستۋدياسىندا جازىلعان.
بۇل وقۋ قۇرالىنىڭ ساپاسى جوعارى، بالالارعا زالالسىز، باعاسى قولجەتىمدى. ءونىمىمىزدى الداعى ۋاقىتتا قازاقستان نارىعىنا شىعارۋ ماسەلەسىن دە ويلاستىرىپ وتىرمىز ، - دەيدى «مەڭتاي» ج ش س- نىڭ ديرەكتورى، جوبا اۆتورى قاناتقان ءابىلعالي ۇلى.
ۇلتتىق ەكونوميكا، ۇلتتىق ءونىم جايلى ءسوز قوزعاعاندا قىتايداعى باۋىرلارىمىزدىڭ الار ورنى ءبىر توبە. بۇگىندە ۇلتتىق ناقىشتاعى زاماناۋي كيىم-كەشەكتەر مەن تۇرمىستىق بۇيىمدار، ۇلتتىق اشەكەيلەر، سىرماق، تۇسكيىز سىندى مۇراجايلاردا عانا كەزدەسەر قۇندى قولونەر بۇيىمدارىمىز، قازاقى كىلەمدەر مەن ۇلتتىق ويۋ-ورنەكتەگى قۇرىلىس ماتەريالدارى بۇگىندە شىنجاڭنان شەكارا اسىپ، ەل اۋماعىنا دا كەلىپ جاتىر.
اتا جۇرتتان الىستا جاتسا دا، ۇلتتىڭ، «قارا دومالاقتاردىڭ» قامىن ويلاپ تەر توگىپ جۇرگەن اسىل ازاماتتارىمىز بەن ۇلتتىق ونىمدەرىمىزدىڭ سانى كوپ بولعاي!
ورازبەك ساپارحان
