تۇندە كوشە كەزگەن جاسوسپىرىمدەرگە تىيىم سالۋ كەرەك

استانا. قازاقپارات - ءتۇن جارىمدا بالالاردىڭ دالا كەزىپ جۇرۋىنە جول جوق.

استانانىڭ ءتارتىپ ساقشىلارى تەكسەرىسكە شىعىپ، ويىن-ساۋىق ورتالىقتارى مەن كوشەدە تەنتىرەپ جۇرگەن جەتكىنشەكتەردى جەلكەلەدى.

ءتۇن جامىلعاندا كوشە كەزگەن جاسوسپىرىمدەردى پوليتسەيلەر سۇراقتىڭ استىنا الدى. «كامەلەتتىك جاسقا تولعانبىز» دەپ جالتارعانداردا قۇجات اتىمەن جوق ەكەن. رەيد تۇنگى مەزگىلدە بالالار كوپ جۇرەتىن قوعامدىق ورىنداردا دا جالعاستى.

ءبىر ءتۇننىڭ وزىندە ويىن-ساۋىق ورتالىقتارى، ينتەرنەت كلۋبتار جانە ءدامحانالاردا اتا-اناسىنىڭ قاراۋىنسىز جۇرگەن 20 جاسوسپىرىم ۇستالدى. اتالعان شارالار كامەلەتكە تولماعاندار اراسىنداعى قىلمىستىڭ الدىن الۋعا سەپتىگىن تيگىزەدى.

يۋۆەنالدى پوليتسيا قىزمەتكەرلەرى «ءاي دەيتىن اجە، قوي دەيتىن قوجاسى جوق» جەتكىنشەكتەرگە شىلىم نەمەسە اراق-شاراپ ساۋدالايتىن ساتۋشىلاردى دا جازاسىز قالدىرمايتىنىن قاداپ ايتتى.

وتكەن جىلدىڭ وزىندە 60 قا جۋىق ساتۋشى اكىمشىلىك جازاعا تارتىلىپ، 20 ايلىق ەسەپتىك كورسەتكىش كولەمىندە ايىپپۇل تولەگەن. مۇنداي رەيدتىك تەكسەرۋلەر ەندى رەسپۋبليكا كولەمىندە قولعا الىنباق. سوندىقتان پارمەندى شارانى الداعى ۋاقىتتا دا تۇراقتى تۇردە وتكىزۋ جوسپاردا بار، - دەيدى ماماندار.