ن. نازاربايەۆ: روجدەستۆو مەرەكەسى - ىزگىلىك پەن كەشىرىمدىلىكتىڭ، ادىلدىك پەن جاقسىلىققا سەنىمنىڭ سيمۆولى
قازاقپارات وقىرماندارعا قۇتتىقتاۋدىڭ تولىق ءماتىنىن ۇسىنادى.
قىمباتتى وتانداستار!
پراۆوسلاۆ حريستيانداردى جانە بۇكىل قازاقستاندىقتاردى جارقىن دا ىزگى روجدەستۆو مەرەكەسىمەن قۇتتىقتايمىن!
ەكى مىڭ جىل بويى روجدەستۆو مەرەكەسى ىزگىلىك پەن كەشىرىمدىلىككە، جاقسىلىق پەن ادىلدىككە سەنىمنىڭ سيمۆولى بولا وتىرىپ، ءدىندار جاماعاتتىڭ جۇرەگىن قۋانىش پەن ۇمىتكە تولتىرىپ كەلەدى.
بۇل ىزگى ويلار مەن يگىلىكتى قادامدارعا باستايتىن، كومەككە مۇقتاج ادامدارعا قامقورلىق جاسايتىن ۋاقىت. بۇل كۇندەرى پراۆوسلاۆ قاۋىمى ءوزىنىڭ جاۋاپتى ءمىناجات داستۇرلەرىن جالعاستىرۋدا. ول ادامداردىڭ سەنىمىن ارتتىرادى، رۋحاني قاينارلارعا باس قويۋعا ۇندەيدى، ءسويتىپ مورالدىق قاعيدالار مەن ءداستۇرلى وتباسىلىق قۇندىلىقتاردى نىعايتا تۇسەدى.
پراۆوسلاۆ حريستياندار ەلىمىزدە كونفەسسياارالىق كەلىسىمدى، قوعامدىق تۇراقتىلىق پەن تىنىشتىقتى ساقتاۋعا قوماقتى ۇلەس قوسۋدا.
بۇگىندە قازاقستاندىقتار قاي ءدىندى ۇستاناتىنىنا جانە قاي ۇلتقا جاتاتىنىنا قاراماستان بارلىق ماڭىزدى ءدىني مەرەكەلەردىڭ قۋانىشىن ءبىر-بىرىمەن ءبولىسىپ وتىرادى.
وسى جارقىن مەرەكەدە بارلىق ءدىندار جاماعاتقا دەنساۋلىق، رۋحاني كۇش-قۋات، ىزگى باستامالارىڭىزعا تابىس تىلەيمىن!
ءار ۇيدەن باقىت، يگىلىك، تىنىشتىق پەن مولشىلىق كەتپەسىن!
