الەم اپتا ىشىندە: جۇيكەسى سىر بەرگەندەر فرانسۋزدىقتاردىڭ ۇرەيىن ۇشىرۋدا

استانا. قازاقپارات - ءوتىپ بارا جاتقان اپتا ىشىندە دە عالامشار بەتىندە ادامزات بالاسىن ءوز نازارىنا اۋدارعان بىرنەشە وقيعا ورىن الدى.

ونىڭ ىشىندە فرانتسيادا ورىن العان بىرنەشە شابۋىل مەن ا ق ش-تاعى قۇقىق قورعاۋ قىزمەتكەرلەرىنىڭ قارا ءناسىلدى جاسوسپىرىمدى وققا ۇشىرۋى دا بار.

دەگەنمەن، وسى اپتادا حريستيانداردىڭ باستى مەرەكەسى - روجدەستۆونىڭ وتكەندىگىن دە ايتا كەتكەن ءجون.

فرانسياداعى شابۋىل

سونىمەن، فرانتسيا بيلىگى نانت، ديجون جانە جۋە- لە- تۋر قالالارىندا ورىن العان شابۋىلداردان كەيىن مەرەكە كەزەڭىندەگى قاۋىپسىزدىك شارالارىن كۇشەيتە ءتۇستى. ەستە بولسا، بىرنەشە شابۋىل سالدارىنان 1 ادام قازا تاۋىپ، 20 دان استام ادام، ونىڭ ىشىندە ءۇش پوليتسيا قىزمەتكەرى جاراقات العان ەدى.

اتاپ ايتقاندا، دۇيسەنبى كۇنى نانت قالاسىندا بەلگىسىز ادام «اللاح اكبار» دەپ اتتانداپ، جۇك كولىگىن كوشە بازارىنداعى ساتىپ الۋشىلارعا باعىتتادى، وسىدان كەيىن وزىنە بىرنەشە جەردەن پىشاق سالىپ العان. وسى وقيعا سالدارىنان 9 ادام جاراقات السا، ونىڭ بىرىنە ءسال كەيىنىرەك دارىگەرلەر كلينيكالىق ءولىم جاعدايىندا دەگەن دياگنوز قويدى.

ەلدىڭ ىشكى ىستەر ءمينيسترى بەرنار كازنيەۆتىڭ ايتۋىنشا، بازاردا ساتىپ الۋشىلاردى باسىپ كەتكەن ادامنىڭ جۇيكەسى اۋىتقۋعا ۇشىراعان ەكەن.

ال وسىدان ءبىر كۇن بۇرىن تاعى ءبىر جۇيكەسىندە اۋىتقۋى بار ادام ديجوندا قالانىڭ ءار قيىرىندا 13 جاياۋ جۇرگىنشىنى باسىپ كەتكەن بولاتىن. وقيعا كۋاگەرلەرىنىڭ ايتۋىنا قاراعاندا، ول دا «اللاح اكبار» دەپ ۇرانداعان كورىنەدى. ءسال كەيىنىرەك قالا پروكۋرورى ۇستالعان ادامنىڭ 2001 - جىلدان بەرى كەمىندە 157 رەت اۋرۋحاناعا جاتقىزىلعانىن جاريا ەتتى.

ال فرانسيانىڭ جۋە- لە- تۋر قالاسىندا 20 جاستاعى ازامات پوليتسيا كوميسسارياتىندا ەش سەبەپسىز كەزەكشى وفيتسەرگە پىشاق الا ۇمتىلدى. ول ءۇش پوليتسيا قىزمەتكەرىن پىشاقتاعاننان كەيىن عانا وققا ۇشتى. قازىرگى ۋاقىتتا قۇقىق قورعاۋ ورگاندارى جاس جىگىتكە «يسلام مەملەكەتى» قوزعالىسىمەن بايلانىسى بار دەگەن كۇدىك كەلتىرۋدە.

مىنە، وسىنداي وقيعالاردان كەيىن فرانسيا پرەمەر- ءمينيسترى مانۋەل ۆالس مەرەكە كەزەڭىندە قاۋىپسىزدىك شارالارىن كۇشەيتۋ تۋرالى شەشىم قابىلدادى. ەلدىڭ ءىرى ساۋدا ورتالىقتارىنداعى قاۋىپسىزدىكتى كۇشەيتۋ ماقساتىندا قوسىمشا 300 اسكەري قىزمەتشى جۇمىلدىرىلدى. سونىمەن قاتار جاندارمدار مەن پوليتسيا قىزمەتكەرلەرى حالىق شابۋىلعا ۇشىراۋى مۇمكىن كوشەلەردى ءجىتى شولعىنداي باستادى.

سەنت- لۋيستە پوليتسيا قارا ءناسىلدى جاسوسپىرىمدى اتىپ تاستادى

ا ق ش- تىڭ ميسسۋري قالاسىنا قاراستى سەنت- لۋيس قالاسىندا پوليتسيا قىزمەتكەرى قارا ءناسىلدى ءجاسوسپىرىمدى اتىپ تاستادى. وقيعا سەنت- لۋيس شەتىندەگى بەركلي قالاشىعىندا ورىن الدى. ەستە بولسا، وسى جىلدىڭ تامىز ايىندا بەركلي قالاشىعىنا تاياۋ قونىستانعان فەرگيۋسون ەلدى مەكەنىندە پوليتسيا قىزمەتكەرى تاعى ءبىر قارا ءناسىلدى مايكل براۋن ەسىمدى ءجاسوسپىرىمدى اتىپ تاستاپ، بۇل جاپپاي نارازىلىق شارالارىنا ۇلاسقان بولاتىن.

رەسمي دەرەكتەرگە قاراعاندا، پوليتسيا قىزمەتكەرلەرى 18 جاستاعى انتونيو مارتيندى كەشقۇرىم جانارماي قۇيۋ بەكەتتەرىنىڭ ءبىرىنىڭ جانىندا قۇجاتتارىن تەكسەرۋ ءۇشىن توقتاتقان. ال بۇل كولىكتەگى جاس جىگىتتىڭ اشۋ-ىزاسىن تۋدىرعان. ءتىپتى، ول قارۋىن پوليتسيا قىزمەتكەرلەرىنىڭ بىرىنە كەزەنگەن. وسىدان كەيىن ءوز قاۋىپسىزدىكتەرىن ويلاعان پوليتسەيلەر ا. مارتيندى اتىپ تاستاعان.

وسىدان كەيىن وقيعا ورنىنا 100 دەن استام ادام جينالعان. ولاردىڭ اراسىندا جەرگىلىكتى بيلىك وكىلدەرى، م. براۋن ءولىمى كەزىندە جاپپاي تارتىپسىزدىكتەر ۇيىمداستىرعان بەلسەندىلەر بولدى. نارازىلىق تانىتۋشىلار پوليتسيا كولىگىن، كورشىلەس دۇكەندەردىڭ سورەلەرىن تالقاندادى. ولاردى تاراتۋ ءۇشىن پوليتسيا قىزمەتكەرلەرى ارنايى قۇرالدار، كوزدەن جاس اعىزاتىن گاز قولدانۋلارىنا تۋرا كەلدى.

كاتوليكتەر مەن پروتەستانتتار باستى مەرەكەلەرىن اتاپ وتۋدە

وسى اپتادا دۇنيە ءجۇزىنىڭ 145 مەملەكەتىندە تويلاناتىن پروتەستانتار مەن كاتوليكتەردىڭ ءدىني مەيرامى - روجدەستۆو باستالدى. بۇل كۇندەرى بارشا حريستياندار شىركەۋلەر مەن عيباداتحانالاردا شوقىنۋمەن وتكىزەدى. ايتا كەتەرلىگى، روجدەستۆو مەيرامىن بارلىق حريستياندار اتاپ وتەدى، دەگەنمەن، كاتوليكتەر ونى 25 جەلتوقسان كۇنى، ال پراۆوسلاۆتار 7 - قاڭتاردا تويلايدى. باتىس ەلدەرى بۇل مەرەكەنى وتباسى مەرەكەسى دەپ ەسەپتەيدى.

ەرتە زاماندا ريم يمپەرياسى وزدەرى جارتىلاي قۇداي، جارتىلاي ادام دەپ تابىناتىن ميترانىڭ تۋعان كۇنىن كەيىنەن تويلايتىن. ولاردىڭ جالعان دىنىنە سايكەس ميترا 25 - جەلتوقسان كۇنى ۇڭگىردە جانۋارلار اراسىندا دۇنيەگە كەلگەن- مىس. ەل اراسىندا كەڭىنەن ەتەك جايعان بۇل مەرەكەنى ىعىستىرۋ ماقساتىندا ІV عاسىردا ميترانىڭ باس تابىنۋشىسى بولعان، كەيىننەن حريستيان دىنىنە باس ۇرعان ۆيزانتيا يمپەراتورى كونستانتين 25 - جەلتوقساندى ييسۋستىڭ تۋعان كۇنى دەپ جاريالاعان.

اۆتور: مارلان جيەمباي