قوي جىلى تۋعان ونەر جۇلدىزدارى - فوتو

استانا. قازاقپارات - حالقىمىزدىڭ تۇسىنىگىندە قۇتتى جىل سانالاتىن قوي جىلى كوپتەگەن بەلگىلى ادامدار، ونەر جۇلدىزدارى دۇنيەگە كەلگەن ەكەن. «الاش ايناسى» قوي جىلى تۋعان اتاقتى ادامداردىڭ ءتىزىمىن جاسادى.

رامازان ستامعازيەۆ - ءانشى، ول 1967 الماتى وبلىسى رايىمبەك اۋدانى كوكپياز اۋىلىندا دۇنيەگە كەلگەن. قازاقستاننىڭ ەڭبەك سىڭىرگەن ءارتىسى. ستامعازيەۆ ونەرگە بالا كەزىنەن قۇشتار بولعان. 1989-جىلى الماتى ەسترادا-سيرك ۋچيليشەسىن (قايرات بايبوسىنوۆ كلاسى بويىنشا) بىتىرگەن. 1989-جىلدان «قازاق كونسەرت» بىرلەستىگى قۇرامىندا ونەر كورسەتىپ ءجۇر. 1994-1998-جىلدار ارالىعىندا ەسترادا-سيرك ۋچيليشەسىندە، 1999-جىلدان الماتى كازىرگى قازاق ۇلتتىق كونسەرۆاتورياسىندا پەداگوگيكا جۇمىسىمەن شۇعىلدانادى. امىرە قاشاۋبايەۆ اتىنداعى انشىلەر بايقاۋىنىڭ جەڭىمپازى. ستامعازيەۆتىڭ ورىنداۋىنداعى «سارى بيداي»، «داريعا داۋرەن»، «ويلاماڭدار، جىگىتتەر» سەكىلدى اندەر حالىقتىڭ ەرەكشە ءسۇيىپ تىڭدايتىن تۋىندىسىنا اينالعان. رامازان ستامعازيەۆتىڭ جۇبايى ۇلتۋ قابايەۆا دا - بەلگىلى ءانشى.

مەدەۋ ارىنبايەۆ - بەلگىلى ءانشى، ول 1967-جىلدىڭ 5- ناۋرىزىندا سارىاعاش اۋدانى، داربازا بەكەتىندە دۇنيەگە كەلگەن. ورتا مەكتەپتى ءبىتىرىپ، اسكەري بورىشىن وتەپ كەلگەننەن كەيىن ەڭبەك جولىن سارىاعاش اۋداندىق اۆتوكلۋب مەڭگەرۋشىسى بولىپ باستاعان. 1988-جىلى تاشكەنتتەگى ەسترادا-سيرك ستۋدياسىنا وقۋعا تۇسەدى. وقىپ ءجۇرىپ قىرعىزستاندا وتكەن «ىستىقكول-89» ورتا ازيا حالىقارالىق بايقاۋىنا قاتىسىپ، ديپلومانت اتاندى. 1990-1995-جىلدارى الماتىداعى اباي اتىنداعى پەداگوگيكالىق ۋنيۆەرسيتەتىنىڭ مۋزىكالىق-پەداگوگيكالىق فاكۋلتەتىندە وقىدى. 1992-جىلى رەسپۋبليكالىق «جاس قانات» بايقاۋىنىڭ جەڭىمپازى بولدى. كەلەسى جىلى مولدوۆادا وتكەن «مەلوديا پرۋتا» حالىقارالىق انشىلەر بايقاۋىندا باس جۇلدەنى جەڭىپ الدى. 1994-جىلى حالىقارالىق «ازيا داۋىسى» بايقاۋىندا ديپلومانت، ال ودان كەيىن تۇركيانىڭ پومۋكاليا قالاسىندا وتكەن بايقاۋدا لاۋرەات اتاندى. 1997-جىلى «ا ب ك» انشىلەر توبىنىڭ جەتەكشىسى بولدى. ونىڭ رەپەرتۋارىندا نۇرعيسا تىلەنديەۆتىڭ «قۇستار ءانى»، ءشامشى قالداياقوۆتىڭ «باقىت قۇشاعىندا»، «اق بانتيك»، ۇكىلى ىبىرايدىڭ «گاككۋ»، حالىق ءانى «نازقوڭىر» جانە ءوز تۋىندىلارى بار. 2002-جىلى رەسپۋبليكا سارايىندا العاشقى ەسەپ بەرۋ كونسەرتىن ءساتتى وتكىزىپ، جىل قورىتىندىسىندا «التىن ادام» جۇلدەسىن الدى. ارىنبايەۆ ءانشى عانا ەمەس، قامقور اكە، وسىدان بىرنەشە جىل بۇرىن جان جارىنان ايىرىلعان ءانشى ەكى بالاسىن ءوزى تاربيەلەپ وتىر.

بەرىك ايتجانوۆ - تەاتر جانە كينو اكتەرى. ول 1979-جىلى 11- ناۋرىزدا قىزىلوردا وبلىسىندا دۇنيەگە كەلگەن. بەرىك تەمىربەك جۇرگەنوۆ اتىنداعى ونەر اكادەمياسىن بىتىرگەن سوڭ مۇحتار اۋەزوۆ اتىنداعى دراما تەاترىنا قىزمەتكە كەلەدى. 2009-جىلعا دەيىن بەرىك «چاس ۆولكا»، «مۇستافا شوقاي» جانە «ماحامبەت» كارتينالارىندا دەبيۋت رول وينادى. الايدا ونى كورەرمەن تەاتر اكتەرى رەتىندە جاقسى بىلەتىن. ءبىرشاما ۋاقىتتان كەيىن بەرىك ەكرانعا اقان ساتايەۆتىڭ «اعايىندىلار» سەريالى ارقىلى شىعىپ، كينودا دا ءوزىنىڭ مىقتى اكتەر ەكەنىن دالەلدەدى. از سەريالى حيكايادا ايتجانوۆ نەگىزگى رولدەردىڭ بىرىندەگى كەيىپكەر. 2011-جىل ايتجانوۆتىڭ مانسابىندا ۇلكەن ساتتىلىك اكەلدى. ول ەگور كونچالوۆسكيدىڭ «ا»- عا ورالۋ» جانە ساتايەۆتىڭ «ليكۆيداتور» كينوسىندا وينادى. سونداي-اق، ول اقان ساتايەۆتىڭ «جاۋجۇرەك مىڭ بالا» فيلمىندە ءابىلقايىردىڭ رولىندە ويناسا، بىلتىر «تراكتورشىنىڭ ماحابباتى» سەريالىندا جاسۇلان اتتى كەيىپكەردىڭ كەيپىنە ەندى.

بەيبىت سەيدۋاليەۆا - ءانشى، ول 1979-جىلى جامبىل وبلىسى، جامبىل اۋدانى بىرلەسۋ - ەڭبەك اۋىلىندا دۇنيەگە كەلگەن. بەيبىت تاراز قالاسىنداعى دۋلاتي اتىنداعى مەملەكەتتىك ۋنيۆەرسيتەتتى بىتىرگەن. ءانشى - «جامبىل جۇلدىزدارى»، «جاڭا عاسىرعا جاڭا ءان»، «جاس قانات»، «التىن سامۇرىق» بايقاۋلارىنىڭ لاۋرەاتى. ءشامشى قالداياقوۆ اتىنداعى حالىقارالىق بايقاۋدىڭ ديپلوماتى. بەيبىت سەيدۋاليەۆا - بەلگىلى ءانشى توقتار سەرىكوۆتىڭ جۇبايى. ول - سۇيىكتى جار، يبالى كەلىن، اياۋلى انا.

تۇرسىنبەك قاباتوۆ - قازاقستاندىق تانىمال اكتەر، كوڭىلدى تاپقىرلار كلۋبىنىڭ جارقىن جۇلدىزى. ول 1979-جىلدىڭ 10- قازانىندا ورال قالاسىندا دۇنيەگە كەلگەن. تۇرسىنبەك العاش رەت ۇلكەن ساحنادا ك ت ك (ك ۆ ن) ارقىلى تانىلدى، «اگراركا ساربازدارى» كومانداسىنىڭ جەتەكشىسى بولدى. رەسپۋبليكالىق «تازشا بالا»، حالىقارالىق «شابىت» بايقاۋىنىڭ جەڭىمپازى، قازاقستاننىڭ بۇرىنعى استانا.kz، قازىرگى «قازاقتار» قۇراما كومانداسىنىڭ بەلدى ويىنشىسى بولعان. بۇگىندە تۇرسىنبەك «ءازىل الەمى» - كوڭىلدى تاپقىرلار تەاترىنىڭ جەتەكشىسى. قازاقستانداعى ەڭ كوپ سۇرانىسقا يە اسابا. قاراپايىم حالىق اراسىنداعى ازىلدەر ارقىلى جۇرتتى قىران-توپان كۇلدىرەتىن تۇرسىنبەك پەن ونىڭ جۇبايى ءمولدىر ەكەۋى ءتورت بالا تاربيەلەپ وتىر.

نۇرلان قويانبايەۆ - ك ت ك (ك ۆ ن) جۇلدىزى، شوۋمەن، پروديۋسەر، تەلەجۇرگىزۋشى. ول 1979-جىلدىڭ 19- شىلدەسىندە قىزىلوردا وبلىسىندا دۇنيەگە كەلگەن. نۇرلان - 2003-جىلدىڭ ۇزدىك ويىنشىسى. نۇرلان قويانبايەۆ ءوزىنىڭ ۇيىمداستىرۋشىلىق قابىلەتى مەن اكتەرلىگىنىڭ ارقاسىندا تەلەارنالاردا بىرنەشە جوبالار جاساپ، ءازىل-سىقاق باعدارلامالاردى جۇرگىزدى. بۇگىندە نۇرلان وتاندىق جانە شەتەلدىك ونەر جۇلدىزدارى، «قازاقستان» ۇلتتىق ارناسىنداعى بەلگىلى تۇلعالار قاتىساتىن «تۇنگى ستۋديا» باعدارلاماسىن جۇرگىزەدى.

ءمادينا ءسادۋاقاسوۆا - ءانشى، ول 1979-جىلدىڭ 8- قىركۇيەگىندە دۇنيەگە كەلگەن. 1992-جىلى ون ءۇش جاسار قىز «ءانشى بالاپان» بايقاۋىنا قاتىسادى. العاشقى ءارى ءىرى بايقاۋى - «مۋزىكالنىي ۆوياج» بايقاۋى. كوپتەگەن بايقاۋلاردا باس جۇلدەنى يەلەنىپ، جۇلدەگەر اتانادى. 1999-جىلى ءمادينا «جاس قانات» بايقاۋىندا ءساتتى ونەر كورسەتتى، ودان كەيىن «ازيا داۋىسى» بايقاۋىندا ءوزىنىڭ باعىن سىنايدى. سول جىلى ءمادينا، وبلىستا «جىل ادامى» دەپ تانىلدى. ودان كەيىن پرەزيدەنت وركەسترىندە، «گۇلدەر» انسامبىلىندە ءان شىرقايدى. 2004-جىلى ەرمەك ەلگەزەكتىڭ «ماحاببات جالىنى» اتتى انىنە العاشقى بەينەبايانىن تۇسىرەدى. سەزىمگە تولى، كەرەمەت ءان حالىق اراسىندا كەڭىنەن تارالىپ كەتتى. اراعا كوپ ۋاقىت سالماي «اڭساعانىم» دەپ اتالاتىن ءوزىنىڭ تۇڭعىش ءان جيناعى جارىق كوردى. بيىل ءمادينا ولجاس اتتى سەرى جىگىتتىڭ جارى اتاندى، جاقىندا ۇلدى بولدى.

ەرنار ايدار - ءانشى، ول 1991-جىلدىڭ 13- ناۋرىزىندا دۇنيەگە كەلگەن. وتكەن جىلدارى حيت بولعان «جارىعىم-اي» ءانى ارقىلى ەرناردىڭ تانىمالدىعى ارتتى. ونەرگە كەلگەنىنە كوپ بولماسا دا ەرنار ءوزىنىڭ جەكە كونسەرتىن دە بەرىپ ۇلگەردى. بۇگىندە ەرناردىڭ «تىم بولماسا»، «جاراي ما»، «سوندا دا سۇيەم»، «بوتاگوزىم» سياقتى كوپتەگەن اندەرى تىڭدارماندارىنىڭ كوڭىلىنەن شىعىپ، حيت انگە اينالعان. ەرنار قازىر بويداق، وزىنە ومىرلىك جار بولارلىق، كوركىنە اقىلى ساي قىز ىزدەپ جۇرگەن كورىنەدى.

جانداربەك بۇلعاقوۆ - ايتىسكەر اقىن. ول 1991-جىللدىڭ 25- ساۋىرىندە دۇنيەگە كەلگەن. جانداربەكتىڭ اكەسى ايتاقىن بۇلعاقوۆتا - بەلگىلى ايتىسكەر اقىن. انانىڭ سۇتىمەن، اكەنىڭ قانىمەن بويىنا اقىندىق دارىعان جانداربەك جاستايىنان الامان ايتىستارعا قاتىسىپ، جۇلدەگەر اتانىپ كەلەدى. ول وت اۋىزدى، وراق ءتىلدى اقىندارمەن ايتىسىپ، ءوزىنىڭ ۇشقىر ويىمەن، ۇتىمدى ۇيقاستارىمەن تالايدىڭ الدىن ورادى. جانداربەك - «التىن دومبىرا» جۇلدەسىنىڭ يەگەرى.

ءالي وقاپوۆ - ءانشى، ءبيشى. ول 1991-جىلى 22- شىلدەدە الماتى قالاسىندا دۇنيەگە كەلدى. ءالي - قازاقستاننىڭ حالىق ءارتىسى روزا رىمبايەۆا مەن بەلگىلى مۋزىكانت تاسقىن وقاپوۆتىڭ بالاسى. ول بۇگىندە ونەردەگى ءوز شىڭىن باعىندىرۋعا تالپىنىپ ءجۇر. ءالي - كاسىبي مۋزىكانت، فورتەپيانو سىنىبىندا 7 جىل وقىعان. ونىڭ «بيلە» اتتى ءانى حيت بولدى.