ەلباسى قازاقستاننىڭ ءبىرقاتار تانىمال قايراتكەرلەرىنە مەملەكەتتىك ناگرادالار تاپسىردى - فوتو

استانا. قازاقپارات - بۇگىن اقوردادا مەملەكەت باسشىسى نۇرسۇلتان نازاربايەۆ ەلىمىزدىڭ ءبىرقاتار تانىمال قايراتكەرلەرىنە ق ر مەملەكەتتىك ناگرادالارىن تاپسىردى.

بۇدان بۇرىن حابارلاعانىمىزداي، تاۋەلسىزدىك كۇنى قارساڭىندا ق ر پرەزيدەنتىنىڭ جارلىعىمەن ەلدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى جانە بەلسەندى قوعامدىق قىزمەتى ءۇشىن ازاماتتاردىڭ ۇلكەن ءبىر توبى مەملەكەتتىك ناگرادالارمەن ماراپاتتالعان بولاتىن.

سوعان وراي، ەلباسى اقوردادا ءبىرقاتار ناگرادا يەلەرىنە ماراپاتتارىن تابىستادى.

اتاپ ايتقاندا، ناگرادا يەلەرى اراسىندا «قازاقستاننىڭ ەڭبەك ەرى» اتاعى قازاقستان رەسپۋبليكاسىن الەۋمەتتىك-گۋمانيتارلىق دامىتۋداعى اسا ۇزدىك جەتىستىكتەرى، بەلسەندى قوعامدىق قىزمەتى، مادەنيەتتى دامىتۋداعى ايرىقشا ۇلەسى ءۇشىن قازاق ۇلتتىق ونەر ۋنيۆەرسيتەتىنىڭ رەكتورى ا. ق. مۇساقوجايەۆاعا بەرىلدى.

«وتان» وردەنىمەن قازاقستان رەسپۋبليكاسى پارلامەنتى سەناتىنىڭ ءتوراعاسى ق. ك. توقايەۆ، I دارەجەلى «بارىس» وردەنىمەن «سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى» زاڭدى تۇلعالار بىرلەستىگىنىڭ ءتوراعاسى ت. ا. قۇلىبايەۆ جانە باسقالارى بار.

«سىزدەر، ءوز جۇمىس ورىندارىڭىزدا ءبىزدىڭ ەلىمىزدىڭ بىرلىگىنە، حالىقتىڭ ءال-اۋقاتىن جاقسارتۋعا ۇلەس قوسىپ وتىراسىزدار. سوندىقتان دا، سىزدەرگە تابىس ەتىلىپ وتىرعان مەملەكەتتىك ناگرادالار ۇلكەن مانگە يە. بۇل ناگرادالار سىزدەردىڭ ەڭبەكتەرىڭىزگە بەرگەن مەملەكەت باعاسى»، - دەدى ەلباسى سالتاناتتى شارا بارىسىندا.
                                         

اۆتور: قانات مامەتقازى ۇلى