تۇلكىباستان كونە قۇمىرالار تابىلدى - و ق و
ءۇيىنىڭ جانىنان جەر قازىپ جاتقان ەرعالي رىسىمبەكوۆ كۇرەگىنىڭ بەلگىسىز قاتتى زاتقا تيگەنىن اڭعارادى. اقىرىن، اينالاسىن كەڭەيتىپ، ءتۇبىن تازالاعاندا ءۇي يەسى زاتتىڭ قۇمىرا ەكەنىن كورەدى. سازدان جاسالعان ىدىس جەردىڭ استىندا ەكى مەتر تەرەڭدىككە قاتار قويىلعان. ءىشى توپىراقپەن تولتىرىلىپ، بەتى ارنايى كىرپىشپەن جابىلعان. وتاعانىڭ ايتۋىنشا، كونە ىدىس سۋ ساقتاۋعا نە بولماسا بيدايعا ارنالعان بولۋى مۇمكىن.
«باياعى زاماندا استىقتى تۇيەگە ارتىپ تاسىعان عوي. ول كەزدە كولىك بولماعان. وسىنداي ەتىپ جاسايدى دا، تۇيەگە قورجىن رەتىندە ارتىپ كەتە بەرگەن. سول كەزدە كومىپ كەتتى مە، جوق الدە وسى جەردە بولدى ما، ونى بىلمەيمىز. ەندى قازىر وسىنى ەستەلىك رەتىندە ساقتاپ قويىپ وتىرمىز»، - دەدى كەرشەتاس اۋىلىنىڭ تۇرعىنى ەسەنالى رىسىمبەكوۆ.
بايىرعى زاماندا وسى جەردەن ۇلى جىبەك جولىمەن كەرۋەنى ءجۇرىپ وتكەن. ساۋداگەرلەر مەن كوپەستەر تۇلكىباس اۋدانىنداعى ماشات شاتقالىنا توقتاپ، وسى جەردە تىنىققان دەگەن اڭگىمە دە بار. سوندىقتان رىسىمبەكوۆتەر وتباسى ولجانى سول زاماننىڭ تەبىرەگى دەپ وتىر. تابىلعان ولجانى ولار ەستەلىك رەتىندە ساقتاپ قويماق، دەپ جازادى otyrar.kz.
