ن. نازاربايەۆ: «قازاقستان- تۇركىمەنستان- يران» تەمىر جولىنىڭ ىسكە قوسىلۋى ەۋرازيالىق ايماق ءۇشىن ماڭىزدى قۇبىلىس بولماق
بۇل تۋرالى بۇگىن ەلباسى نۇرسۇلتان نازاربايەۆ تۇركىمەنستان پرەزيدەنتى گۋربانگۋلى بەردىمۇحامەدوۆپەن كەلىسسوزدەر جۇرگىزۋ كەزىندە ايتتى.
«كولىك سالاسىندا ىنتىماقتاستىق ورناتۋ مۇمكىندىگى زور. قازاقستان- تۇركىمەنستان- يران تەمىر جول ماگيسترالىنىڭ ىسكە قوسىلۋىنا ۇلكەن ءمان بەرەمىز. ەرتەڭ ءبىز يراندىق ارىپتەسىمىز حاسان رۋحانيمەن ەۋرازيالىق كونتينەنت ءۇشىن ماڭىزدى وقيعا بولىپ تابىلاتىن تەمىر جولدىڭ اشىلۋ سالتاناتىنا قاتىسامىز» ، - دەدى ن. نازاربايەۆ.
ەلباسى بۇل جولدىڭ ىسكە قوسىلۋى ەلدەرىمىز ءۇشىن سولتۇستىك جانە وڭتۇستىك باعىتتاردا جۇك تاسىمالداۋ كولەمىن ارتتىراتىنىن اتاپ ءوتتى.
ەسكە سالا كەتەيىك، قازاقستان 2007 - جىلى 16 - قاراشادا قازاقستان، تۇركىمەنستان جانە يران پرەزيدەنتتەرى قول قويعان دەكلاراتسيانىڭ جانە جوباعا قاتىسۋشى ەلدەردىڭ ۇكىمەتتەرى قول قويڭعان ءۇش جاقتى كەلىسىمنىڭ بارلىق تالاپتارىن ورىندادى. تۇركىمەنستان اۋماعىنداعى قازاقستانعا باعىتتالعان تەمىر جول ۋچاسكەسىنىڭ 444 ك م قۇرىلىسى اياقتالدى. يران باعىتىنا قاراي جول ۋچاسكەسىندەگى (256,5 ك م) جۇمىستار 2013 - جىلدىڭ قاڭتارىندا باستالدى. وندا تۇركىمەنستان تەمىر جول كولىگى مينيسترلىگى ءوز كۇشىمەن 1,5 جىل قۇرىلىس جۇمىستارىن جۇرگىزدى.
تەمىر جولدىڭ يران اۋماعىنداعى ۋچاسكە (82 ك م) 2013 - جىلدىڭ مامىر ايىندا اياقتالعان. قازىرگى ۋاقىتتا ستانسا جولدارىنىڭ جانە قىزمەتتىك- تەحنيكالىق مەكەمەلەر مەن عيماراتتاردىڭ قۇرىلىسى جۇرگىزىلۋدە (4 ستانسا جولى سالىندى، تاعى تورتەۋىندە جۇمىستار اياقتالۋعا جاقىن) .
2014 - جىلدىڭ 3 - جەلتوقسانىندا «قازاقستان- تۇركىمەنستان- يران» تەمىر جولىنىڭ (928 ك م) تۇركىمەن- يراندىق (بەرەكەت - گورگان) بولىگىنىڭ اشىلۋ سالتاناتى وتەدى. وعان ءۇش مەملەكەتتىڭ باسشىلارى قاتىسپاق. قازاقستاندىق (146 ك م) جانە يراندىق (82 ك م) تەمىر جول ۋچاسكەلەرىندەگى قۇرىلىس جۇمىستارى اياقتالدى.
