قىز بالانىڭ ومىردەگى باستى ماقساتى نە؟

نۇر-سۇلتان. قازاقپارات - «قىز بالانىڭ وسى ومىرگە كەلگەندەگى باستى مىندەتى - وتباسىنىڭ بەرەكەسى اتانۋ» دەپ جاتامىز. ءبىراق ونىڭ تۇلعا بولىپ قالىپتاسۋى، كارەراسى، سەزىمى، قالاۋى شە؟

جالپى تۇسىنىكپەن الىپ قاراساق، قىز بالانىڭ وڭ جاقتا وتىراتىن ۋاقىتى مەكتەپ ءبىتىرىپ، ءوز الدىنا جەكە ادام رەتىندە مويىندالىپ، وقۋعا تۇسكەن ساتىنەن باستالادى. وقۋ ورنى - 4 جىل، 9 سىنىپتان كەيىن وقۋعا تۇسكەندەر ءۇشىن - 7 جىل دەسەك، وسى 4-7 جىل قىز بالانىڭ وڭ جاقتا وتىرعان ۋاقىتى بولىپ سانالۋى ءتيىس. وقۋ ءبىتىرىپ، جۇمىسقا تۇرعان سوڭ، ءارى كەتسە 1-2 جىل جۇمىس ىستەپ، ودان كەيىن ءوز تەڭىن تاۋىپ، تۇرمىسقا شىعۋى كەرەك. بۇلاي بولماعان جاعدايدا، ياعني، جاسى 25 تەن اسقان سوڭ، «وتىرىپ قالعان قىز» اتانىپ، ەلدىڭ كوزىنە كۇيىك بولادى.

ياعني قىز بالا ومىردە ءبىر نارسەگە جەتكىسى كەلسە، ماقساتىنا وسى 4-7 + 1-2 جىلدىڭ ىشىندە جەتىپ ۇلگەرۋى ءتيىس. ولاي دەيتىنىمىز - وتباسىن قۇرعان سوڭ، ول شاڭىراقتا كۇيەۋىنەن كەيىن تۇراتىن ادام بولىپ قالادى. ياعني قىز ءۇشىن ءبىرىنشى ورىنعا ءوزىنىڭ جەكە ماقساتتارى ەمەس، كۇيەۋىنىڭ جاعدايىن جاساۋ، بالا تابۋ، وتباسىنىڭ بەرەكەسىن كەلتىرۋ سياقتى دۇنيەلەر شىعادى. ال ءوزىنىڭ جەكە ماقساتتارى (مىسالى، جۇمىستا تابىسقا جەتۋ ت. ب.) ەكىنشى ساتىعا تۇسەدى.

كەرىسىنشە بولعان جاعدايدا، ياعني، قىز بالا ءوز ارمانىنا جەتكىسى كەلسە، سول ءۇشىن كۇرەسسە، وتباسىن ساقتاپ قالۋ وتە قيىنعا سوعادى. ونداي كەزدە قىز اجىراسىپ نە مۇلدە تۇرمىس قۇرماي، وتىرىپ قالۋى مۇمكىن.

ماسەلەگە جىكتەي قاراساق، ماقساتقا جەتۋ - كۇنى-ءتۇنى تىنباي جۇمىس ىستەۋ. كۇيەۋى جۇمىستان شارشاپ كەلگەندە، ايەلى ۇيدە ءوز جۇمىسىمەن اينالىسىپ وتىرسا، سايكەسىنشە، تاماق ءپىسىرىپ، كىر جۋۋعا ۇلگەرمەسە، بۇل جايتقا تۇسىنىستىكپەن قارايتىن ەركەك، اسىرەسە، قازاق جىگىتتەرى - مىڭنان بىرەۋ عانا.

ومىردە جەتىستىككە جەتكەن قاي ايەلدى الىپ قاراساڭىز دا، ول نە جالعىزباستى، نە اجىراسقان بولىپ كەلەدى. وتباسى مەن كارەرانى قاتار الىپ جۇرە بىلگەن دانىشپان ايەلدەر ساۋساقپەن سانارلىق.

مەنىڭشە، بۇل نارسە ءاۋ باستا قازاق جىگىتتەرىنىڭ مارتەبەسىن قىزدان بيىك قويۋ ءۇشىن ويلاستىرىلعان. ويتكەنى نان تابۋشى ادامنىڭ وتباسىندا مەرەيى ۇستەم بولادى. بىلاي قاراساق، قىز بالانىڭ جۇمىس ىستەۋ مۇمكىندىگى ەشبىر ەر ادامنان كەم ەمەس. ول قازىر پايدا بولعان مۇمكىندىك ەمەس، قىرىق شىراقتى قىز بالا نازىك بولسا دا، ءتوزىمدى، كەز كەلگەن جۇمىسقا يكەمدى بولىپ جارالعان. كەيدە وسى توزىمدىلىگى تاس جارىپ تا جاتادى.

كوبىنە ءبىر ماسەلە توڭىرەگىندە وتباسى بولىپ اقىلداسقاندا، اتا-ەنە، كۇيەۋى وتىرىپ، كەلىن سويلەسە، ول ماسەلەنىڭ دۇرىس شەشىمىن ايتىپ وتىرسا دا، ءسوزى قابىلدانبايدى. سوندىقتان قازاقتىڭ نەبىر پاراساتتى كەلىندەرى ءوز ءسوزىن كۇيەۋىنىڭ اۋزىمەن ايتقىزادى. ال ءوزىنىڭ قالاۋىن ىسكە اسىرعىسى كەلگەن كەلىنگە «كەسىر كەلىن» دەپ ات قويىپ، مىسىن باسىپ تاستايدى. شەتەلدە ءبىلىم الۋدى قاتتى ارمانداعان قىز وتباسىن قۇرعان سوڭ دا، بۇل ماقساتىنان تايماي، كۇيەۋىمەن بىرگە شەتەلگە كەتسە، «پالەنشەنىڭ بالاسى ايەلىنىڭ ارتىنان كەتىپتى» دەپ، حالىق وڭ قاباق تانىتپايدى.

بۇنىڭ ءبارىنىڭ استارىندا قىز بالاعا ءوز ورنىن كورسەتۋ جاتىر.

ءوز-ءوزىن قامتاماسىز ەتە الاتىن، ماتەريالدىق جاعدايىن ءوز كۇشىمەن جاساعان قىز بالا قانشا جەتىستىككە جەتسە دە، جەكە ومىردە جولى بولماسا، جۇرت وعان تولىققاندى تۇلعا رەتىندە سۇيسىنگەنىمەن، تولىققاندى باقىتتى ادام دەپ قارامايدى.

بۇل جازبانىڭ ناقتى قورىتىندىسىن شىعارمايمىز. قورىتىندى ءسوز سىزدە، وقىرمان!

massaget.kz