شەتەلدەگى قانداستار دا قازاق ەلىنىڭ ابىرويىن ويلايدى - ۆ. تاشپەكوۆ

ورال. قازاقپارات - قازاقستان پرەزيدەنتى ءوز ەلىنىڭ الدىنا ۇنەمى ناقتى مىندەتتەر قويادى. قازاق ەلى الەمنىڭ الدىڭعى قاتارلى مەملەكەتتەرىنىڭ قاتارىنان تابىلىپ جاتسا، ول شەتەلدەگى ءبىز سياقتى قانداستار ءۇشىن دە ۇلكەن ابىروي.

ەلباسى جۋىردا ۇلىتاۋ تورىندەگى سۇحباتىندا ەلدىڭ وتكەنى مەن بۇگىنى، بىرلىك پەن تاتۋلىق، ءتىل تۋرالى ورەلى ويلارىن ايتتى. ونىمەن عالامتور ارقىلى تانىستىم. بۇل تۋرالى ساراتوۆ قالاسىندا تۇراتىن ەدىل بويى قازاقتارى قاۋىمداستىعىنىڭ پرەزيدەنتى، ساراتوۆ مەملەكەتتىك ۋنيۆەرسيتەتى پ. يابلوچكوۆ اتىنداعى راديوەلەكترونيكا كوللەدجى ديرەكتورىنىڭ ورىنباسارى ۆلاديمير تاشپەكوۆ ءمالىم ەتتى.

ونىڭ ايتۋىنشا، باتىس قازاقستانمەن ەجەلدەن اۋىلى ارالاس، قويى قورالاس ساراتوۆ وبلىسىندا 80 مىڭداي قازاقتار تۇرادى، بۇل ءوڭىر حالقىنىڭ 3 پايىزى بولعانىمەن، سانى جونىنەن ورىستاردان كەيىن ەكىنشى ورىن الادى. ونداعى قازاقتار دا ءوز مادەنيەتىن، سالت- ءداستۇرىن ساقتاۋعا تىرىسادى. بۇل رەتتە ناۋرىز مەيرامى سياقتى مەرەكەلەردىڭ ماڭىزى زور. دەگەنمەن وزەكتى ماسەلەلەر دە جوق ەمەس. ەڭ باستىسى - ءتىل.

تىلدىك ورتانىڭ بولماۋى سالدارىنان قازاقشا سويلەيتىندەر ازايىپ بارادى. شەتەلدەگى قازاقتارعا لايىقتالعان باعدارلاما بولعانى دۇرىس. ادىستەمەلىك ماتەريالدار، ادەبيەتتەر دە جەتىسە بەرمەيدى. ماماندار دا جوقتىڭ قاسى. ارينە، دۇنيەءجۇزى قازاقتارى قاۋىمداستىعى تاراپىنان بارىنشا كومەك كورسەتىلىپ تۇرادى. باتىس قازاقستان وبلىسىنىڭ باسشىلىعى دا ەدىل بويى قازاقتارى قاۋىمداستىعى ۇيىمداستىرعان شارالاردى بارىنشا قولداپ وتىرادى.

شەتەل قازاقتارى ءۇشىن ەكى جول بار. ءبىرى - اتاجۇرتقا ورالۋ. ەكىنشىسى - سول مەكەن ەتكەن جەرىندە تۇرىپ، قازاق حالقىنىڭ بەدەلىن جوعارى ۇستاي ءبىلۋ. دۇنيە جۇزىنە تارالىپ كەتكەن قازاقتار اۆستراليا سىندى الىس ەلدەرگە دەيىن بارىپ، تۇرىپ جاتىر. دەگەنمەن قىتاي، رەسەي، وزبەكستاندا قازاقتاردىڭ كوپ ەكەنى جاسىرىن ەمەس. ولاردىڭ جاعدايىن ءبىلىپ وتىرۋ ارتىقتىق ەتپەيدى.

«ءبىز قايدا جۇرسەك تە، تۋعان ەلگە بۇيرەگىمىز بۇرىپ تۇرادى. مەنىڭ ءوزىمنىڭ اتا- بابالارىم باتىس قازاقستاننىڭ جانىبەك اۋدانىندا تۇرعان. وتكەن عاسىردىڭ جيىرماسىنشى جىلدارىنىڭ اياعىندا بايلاردى تاركىلەۋ كەزىندە باس ساۋعالاپ، اۋەلى ۆولگوگراد وبلىسىنا كوشكەن. كەيىن ساراتوۆقا كەلىپ تۇراقتاعان. نەگىزى مەنىڭ ازان شاقىرىپ قويعان اتىم فايزوللا. ۆلاديمير الەكساندروۆيچ بولىپ كەتكەنمىن. ايتەۋىر قازاق ەكەنىمىزدى ۇمىتپايمىز، ماقتان ەتەمىز. تاۋەلسىز قازاق ەلىنىڭ تابىستارىنا قۋانىپ وتىرامىز. رەسەي مەن ەكىجاقتى ءتيىمدى قارىم- قاتىناستىڭ بولعانىن ءبىز دە قالايمىز. سوندىقتان وسى جولداعى قازاقستان پرەزيدەنتىنىڭ ارىدەن ويلايتىن ساياساتىن تولىق قولدايمىز» ، دەدى ۆ. تاشپەكوۆ.

اۆتور: ەلجان ەرالى