قازاقستان اۋعانستانعا نە ءۇشىن كومەكتەسىپ كەلەدى؟
جيىنعا جەتەكشىلىك ەتكەن كوميتەت ءتوراعاسى ماۋلەن اشىمبايەۆ ءسوز اراسىندا قازاقستاننىڭ اۋعانستانعا، سول سەكىلدى باسقا دا ەلدەرگە نە ءۇشىن رەسمي كومەك كورسەتىپ كەلە جاتقانىن ايتىپ وتكەن بولاتىن.
«ءبىز نەگە شەت مەملەكەتتەردىڭ دامۋى ءۇشىن رەسمي كومەك كورسەتۋىمىز كەرەك دەگەن ماسەلەنى جۇرت تۇسىنۋلەرى كەرەك. ويتكەنى، مەملەكەتتىك بيۋدجەتتەن وسىعان قاراجات بولىنەدى، ال ونداي قاراجاتتى ىشكى ماڭىزدى ماقساتتارعا دا جۇمساساق بولادى ەمەس پە؟ بۇل تۇرعىدان العاندا ەڭ ءبىرىنشى تۇيەتىنىمىز سىرتقى ساياسات - بۇل قاشاندا ىشكى ساياساتتىڭ جالعاسى. ىشكى ساياسات بولەك، سىرتقىسى بولەك دەگەن بولمايدى»، - دەدى ماۋلەن اشىمبايەۆ.
ونىڭ ايتۋىنشا، قازاقستاننىڭ قازىرگى تاڭدا سىرتقى ساياساتتا جۇزەگە اسىرىپ جاتقانىنىڭ بارلىعى - ىشكى ۇلتتىق مۇددەگە ساي كەلەدى. سونىڭ ىشىندە اۋعانستان دا بار. وسىعان وراي، ءماجىلىس دەپۋتاتى «نەگە ءبىز اۋعانستانعا كومەكتەسىپ كەلەمىز؟ » دەگەن ساۋالعا جان- جاقتى توقتالىپ ءوتتى. ونىڭ ايتۋىنشا، اۋعانستانعا كومەكتىڭ ۇزاق جىلدارعا ارنالعان باعدارلاماسى 50 ميلليون دوللاردى قۇرايدى. سونىڭ اياسىندا مىڭ اۋعان ستۋدەنتتەرىن وقىتۋدى ءوز مىندەتىمىزگە الدىق. ال بۇل نە ءۇشىن كەرەك؟
«بىزگە تۇراقتى اۋعانستان قاجەت. اۋعانستانداعى تۇراقتىلىق - بۇل ورتالىق ازياعا، سونىڭ ىشىندە قازاقستانعا تونگەن قاتەردىڭ ازايعانىن بىلدىرەدى. بۇل - ەسىرتكى اعىنىنىڭ، تەرروريزم مەن ەكسترەميزممەن بايلانىستى قاۋىپتىڭ تومەندەگەنىن، بوسقىندار پروبلەماسىنىڭ ازاياتىنىن بىلدىرەدى. سوندىقتان دا، ءبىز اۋعانستاندا قاشان تۇراقتىلىق بولادى دەپ قول قۋسىرىپ وتىرماي، وعان ءوز ۇلەسىمىزدى قوسۋعا ءتيىسپىز» ، - دەدى ول.
ماۋلەن اشىمبايەۆتىڭ ايتۋىنشا، شەت ەلدەرگە رەسمي كومەكتىڭ ەكىنشى ءبىر تيىمدىلىگى - قازاقستان ءۇشىن جاعىمدى يميدج قالىپتاستىرادى.
«بۇل اسىرەسە قانداي دا ءبىر حالىقارالىق ۇيىمداردا باسشىلىق ورگاندارعا ءوزىمىزدى ۇسىنۋ بارىسىندا وڭ اسەر بەرەدى. ماسەلەن، ءبىز ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە ءوتىنىش بەرىپ، سونىمەن جۇمىس ىستەپ جاتىرمىز. ال وعان سايلانعاننان نە پايدا؟ ارينە، مۇنىڭ ەلىمىزدىڭ ىشكى جاعدايىنا تيىمدىلىگى وراسان. ويتكەنى، قازاقستان ب ۇ ۇ قاۋىپسىزدىك كەڭەسىنە مۇشەلىككە وتسە، ەلىمىزدى بۇكىل الەم ودان سايىن تاني تۇسەدى، ەلىمىزدى ب ۇ ۇ اياسىندا تانىعان سايىن سەنىم دە ارتا تۇسەدى. ال سەنىم ارتسا، ينۆەستيتسيانىڭ اعىلۋىنا دا جول اشىلادى. ينۆەستيتسيا دەگەننىڭ ءوزى ۇلتتىق ەكونوميكانىڭ قارقىنىن ۇدەتەدى. قىسقاشا ايتقاندا، سىرتقى ساياساتىمىزدى وزدىرۋ ارقىلى ءبىز ىشكى جاعدايىمىزدى ونان سايىن ورنىقتى ەتەتىن بولامىز» ، - دەدى م. اشىمبايەۆ.
اۆتور: قانات مامەتقازى ۇلى
