قازاقستان مەن قىتاي مەملەكەت ارالىق بايلانىستىڭ ۇلگى بولارلىق مودەلىن قۇردى - ءماجىلىس سپيكەرى

استانا. قازاقپارات - بۇگىن پارلامەنت ءماجىلىسىنىڭ ءتوراعاسى قابيبوللا جاقىپوۆ بۇكىل قىتايلىق حالىق وكىلدەرىنىڭ جينالىسى تۇراقتى كوميتەتى ءتوراعاسىنىڭ ورىنباسارى چجان باوۆەن باستاعان دەلەگاتسيانى قابىلدادى.

جۇزدەسۋ بارىسىندا ەڭ الدىمەن سپيكەر بۇكىل قىتايلىق حالىق وكىلدەرى جينالىسىنىڭ 60 جىلدىق مەرەيتويىمەن قۇتتىقتاپ ءوتتى. بۇدان بولەك، ءتوراعا تاۋەلسىز قازاقستاننىڭ وتكەن جىلدارىنداعى قىتايمەن ەكىجاقتى قارىم-قاتىناس ستراتەگيالىق ارىپتەستىك مانگە يە بولعانىن جەتكىزدى.

«قازاقستان مەن قىتاي اراسىندا بۇگىن مەملەكەت ارالىق ءوزارا بايلانىستىڭ ۇلگى بولارلىق مودەلى قۇرىلدى. الەمدەگى ەكىنشى ەكونوميكا سانالاتىن قىتاي قارقىندى دامىپ كەلەدى، ءبىز ودان دا گۇلدەنە بەرۋلەرىڭىزگە تىلەكتەسپىز. سونىمەن قاتار، 1- قازاندا بولاتىن قىتاي حالىق رەسپۋبليكاسىنىڭ جاريالانعانىنا 65 جىلدىعىمەن قۇتتىقتاعىمىز كەلەدى»، - دەدى ق. جاقىپوۆ.

سونىمەن قاتار، ءماجىلىس ءتوراعاسى ەكى ەلدىڭ جوعارى لاۋازىمدى بايلانىستارىنا دا توقتالا كەلە، مەمەلكەت باسشىلارى تاراپىنان قابىلدانعان ەكىجاقتى كەلىسىمدەر ءىس جۇزىندە ناقتى جۇزەگە اسىپ وتىرعانىن جەتكىزدى.

«بۇگىنگى تاڭدا الەمدىك جانە وڭىرلىك ساياساتتا دا ەكى ەلدىڭ ۇستانىمدارى جاقىن. وتكەندە عانا دۋشانبەدەگى ش ى ۇ كەڭەسىندە دە بۇل باعىتتاعى اڭگىمەلەر جالعاسىن تاپتى»، - دەدى ق. جاقىپوۆ.

بۇدان بولەك، كەزدەسۋ بارىسىندا ەكونوميكالىق بايلانىستار، پارلامەنتارالىق ىنتىماقتاستىقتى ودان ءارى دامىتۋ ماسەلەلەرى تالقىلاندى.

«بۇگىنگى كۇنى قازاقستان ءۇشىن قىتاي - بارلىق قاتىناستار بويىنشا، ونىڭ ىشىندە اسىرەسە، ەكونوميكالىق باعىتتا باستى ستراتەگيالىق ارىپتەس. قازاقستان مەن قىتاي اراسىنداعى تاۋار اينالىمى وتكەن جىلى 28 ميلليارد دوللاردان استى. 2016-جىلعا قاراي بۇل كورسەتكىشتى ەڭ كەمىندە 40 ميلليارد دوللارعا جەتكىزۋ مەجەسى تۇر، ارينە بۇل جوعارى ماقسات، ءبىز سوعان ۇمتىلامىز. ال ەكسپورت پەن يمپورتتىڭ قارقىنىن ۇدەتۋ ءۇشىن سالىق، كەدەندىك سەكىلدى ءبىرقاتار ءتۇرلى كەدەرگىلەردى جويۋ قاجەت، بۇنداي ماسەلەمەن ءبىزدىڭ ەلدەرىمىز اينالىسىپ كەلەدى»، - دەدى سپيكەر ق. جاقىپوۆ.

اۆتور: قانات مامەتقازى ۇلى