ج و و بىتىرگەن جاستاردى جۇمىسقا ورنالاستىرۋ ماسەلەسىمەن اينالىسپاق

«ءبىزدىڭ جوبا ءۇش ماقساتتى توپتى قامتىپ وتىر. وسى ورايدا جوعارى وقۋ ورنىن ءتامامداعاننان كەيىن ەڭبەك ءوتىلىنىڭ بولماۋىنا بايلانىستى جۇمىسقا ورنالاسا الماي جۇرگەن جاستار ماسەلەسىنە نازار اۋدارىلادى.

بۇل جاستارعا وسى تۇستا قيىنعا سوعاتىنا بەلگىلى جانە بۇعان وقۋدى بىتىرگەن جاس ماماندار كىنالى ەمەس. ياعني، وتاندىق جوعارى وقۋ ورىندارىنان جاقسى ءبىلىم الىپ شىققاندارمەن قاتار، «بولاشاق» باعدارلاماسى ارقىلى وقىپ كەلگەندەردىڭ اراسىندا قىزمەتكە ورنالاسا الماي جۇرگەندەر بار»، - دەدى ر. سارسەمبايەۆا.

ونىڭ سوزىنە قاراعاندا، قاۋىمداستىق تاراپىنان اتالعان ماسەلەلەردىڭ سەبەپتەرى انىقتالىپ، جاستاردىڭ ءتيىستى تاجىريبيەدەن وتۋىنە مۇمكىندىك جاسالماق.

«ءبىز وتكىزگەلى وتىرعان ساۋالناما وسى باعىتتاعى ماسەلەلەردىڭ ءمان-جايىن انىقتاۋعا كومەكتەسەدى. بۇنداي پروبلەمالار تەك ءبىزدىڭ ەلىمىزدە عانا ەمەس، سونىمەن قاتار بۇكىل الەمدە كەزدەسەتىنى ءمالىم. دەگەنمەن، مەملەكەتىمىزدە ايتارلىقتاي اۋقىمدى باعدارلامالار جۇزەگە اسىرىلۋدا، سوندىقتان ونىڭ الەۋەتى جاستاردى جۇمىسپەن قامتۋعا جەتكىلىكتى»، - دەپ ءتۇيدى ءتورايىم.

ايتا كەتەيىك، دەنساۋلىق ساقتاۋ جانە الەۋمەتتىك دامۋ مينيسترلىگىنىڭ قولداۋىمەن قازاقستان ىسكەر ايەلدەرى قاۋىمداستىعى ايەلدەردىڭ الەۋمەتتىك-ەڭبەك اياسىنداعى قۇقىقتارى مەن «جۇمىسپەن قامتۋدىڭ جول كارتاسى-2020» باعدارلاماسىنا قاتىسۋ مۇمكىندىكتەرى تۋرالى اقپاراتتاندىرۋ دەڭگەيىن كوتەرۋگە، جەكە ىسكەرلىكپەن اينالىسۋ مەن جۇمىسقا ورنالاسۋ ارقىلى ەلىمىزدەگى ايەلدەردىڭ الەۋمەتتىك احۋالىن جاقسارتۋعا باعىتتالعان «الەۋمەتتىك ەڭبەك اياسىندا ايەلدەر اراسىندا اقپاراتتىق ءتۇسىندىرۋ جۇمىسى» اتتى جوبانى قولعا الىپ وتىر.

اۆتور: رۋسلان عابباسوۆ