كۇيشى وحاب قابيعوجين

استانا. قازاقپارات - وحاب قابيعوجيننىڭ ورىنداۋىنداعى قۇرمانعازىنىڭ «سەرپەر» كۇيىن تىڭداعان دينا نۇرپەيىسوۆا: «وي شايتان بالا-اي، «سەرپەردى»، بالام، مەن وحابتاي تارتا المايمىن»، - دەپ اعىنان جارىلعان بولاتىن.

وسى سوزدەردەن-اق وحابتىڭ دومبىرادا قانشالىقتى شەبەر ويناعانىن بايقاۋعا بولادى.

وحاب قابيعوجين 1901 - جىلى ەلىمىزدىڭ باتىس وڭىرىندەگى جاڭاقالا اۋدانىندا دۇنيەگە كەلەدى.

اكەسى قابيعوجا جىگىت كەزىندە قۇرمانعازى مەن ونىڭ بالاسى قازيدى كورگەن ادام. قابيعوجا كەدەي بولىپ، قۇمارشىق تەرۋمەن كۇنەلتەدى. 1916 - جىلى قازاقتان قارا جۇمىسقا كىسى العاندا، قابيعوجا پاتشانىڭ بۇل زورلىعىنا ارناپ ءان شىعارادى.

وحاب 17 جاسىنان باستاپ جۇمىس ىستەپ، ءوز ەڭبەگىمەن كۇنەلتەدى. ول تاماق ءپىسىرۋشى دە، پەش جاعۋشى دا، بالىقشى دا بولادى. دومبىرانى كىشكەنتايىنان تارتا باستايدى. اكەسى قابيعوجا، اسىرەسە ۇلكەن اكەسى اساۋ: «وسى نەمە قۇرمانعازى اتاسىنىڭ جولىن قۋار ما!» دەپ قويادى ەكەن. وحاب سكريپكادا ويناپ، وندا قازاق، تاتار اندەرىن دە ورىندايدى.

1924 - جىلى وحاب مامەندى، دينانى، دومبىراشى تولەگەن ارشانوۆتى كورەدى. 1927 - جىلى وحاب بالىق كاسىبىن ىزدەپ استراحان جاققا كەتەدى. ودان قايتىپ ەلگە كەلىپ، 1929 - جىلعا شەيىن ءشوپ شابۋ كاسىبىندە بولادى.

كولحوز ۇيىمداسقان كەزدە وحاب بىردەن اۋىلشارۋاشىلىق ارتەلىنە مۇشە بولىپ كىرەدى. 1933 - جىلى وحاب ورتالىق قاراتوپىراقتى وبلىسقا كەتىپ قالعان ءۇي ءىشىن ىزدەپ بارىپ، تابا الماي قايتادى. 1933 - جىلدىڭ ورتاسىنان 1934 - جىلدىڭ ورتاسىنا شەيىن ورال قالاسىنداعى تەاتر-ستۋديادا قىزمەت ىستەيدى. 1934 - جىلدىڭ جازىندا الماتىعا ءبىرىنشى بۇكىل قازاقستاندىق سلەتكە كەلىپ، مۇندا حالىق اسپاپتارى وركەسترىندە قىزمەتتە قالادى.

قۇرمانعازىنىڭ باعا جەتپەس كوپتەگەن كۇيلەرىن الىپ كەلىپ بەرۋمەن قاتار، وحاب كوپ جاستاردى دومبىرا تارتۋعا باۋليدى. ءوزى نوتا ساۋاتىن اشىپ، وركەستردىڭ الدىڭعى قاتارلى ادامى بولادى. ۇلى وتان سوعىسى كەزىندە وحاب ءوزىنىڭ دەنساۋلىعىنىڭ ناشارلىعىنا قاراماي، اۋىلدىق جەرلەردەگى ەڭبەك ەرلەرى الدىندا ونەر كورسەتۋ ءۇشىن جاز دەمەي، قىس دەمەي گاسترولدە جۇرەدى. 1942 - جىلدىڭ جازىندا وحابتىڭ ەسكى دەرتى اسقىنىپ قايتىس بولدى.

وحابتىڭ رەپەرتۋارىنىڭ ءبارى دەرلىك قۇرمانعازىنىڭ كۇيلەرى بولاتىن.

ونىڭ ورىنداۋشىلىق شەبەرلىگى تىڭداۋشىنى ۇيىتاتىن. كەيبىر كۇيلەردى وحاب ورىنداعاندا دينا ونىڭ الدىندا باس يەتىن. وحابتىڭ تارتىسى پوەزياعا تولى. ونىڭ دومبىرانى ۇستاۋى، وتىرىسى، قاعىسى، باسقان قولدارىنىڭ اپپليكاتۋراسى (ساۋساق ءتارتىبىن ورىنداۋداعى بەزەندىرۋ) اقىل جەتپەيتىن دارەجەگە كوتەرىلگەن بولاتىن. سونىمەن قاتار، وحاب اڭگىمەنىڭ «مايىن تامىزىپ» ايتاتىن. ول ءوزى دە كۇي شىعارعان. ونىڭ «اداسقان» دەگەن كۇيى ءىرى شىعارما بولىپ تابىلادى.

el.kz