تۇرىكتەر قازاقستاندى جاقىن تانۋدى قالايدى
ال ونىڭ كوپشىلىگى جۋىق ارادا قازاقستانعا ساپارلاپ، اتاجۇرتتى جاقىننان تانۋعا قىزىعۋشىلىق بىلدىرۋدە.
بۇل تۋرالى احي ەۆران ۋنيۆەرسيتەتىنىڭ پروفەسسورى كيۋرشات زورلۋ ارنامىزدىڭ تىلشىسىنە بەرگەن سۇحباتىندا مالىمدەدى. تۇركيا ازاماتتارىنىڭ قاي ەلگە ساياحاتتاعىسى كەلەتىندەرىن ءبىلۋ ءۇشىن ارنايى ساۋالناما جۇرگىزىلگەن.
ءسويتىپ تۇرىكتەر قازاقستاندى جاقىننان تانۋعا قىزىعۋشىلىق بىلدىرۋدە. قازاق-تۇرىك ىنتىماقتاستىعىنىڭ ارتۋىنا تۋريزم سالاسىنىڭ ىقپالى زور. ويتكەنى باۋىرلاس ەكى ەلدىڭ بۇل سالاداعى الەۋەتى جوعارى.
احي ەۆران ۋنيۆەرسيتەتىنىڭ پروفەسسورى كيۋرشات زورلۋنىڭ پىكىرىنشە، ەجەلگى ۇلى جىبەك جولىن قايتا جاڭعىرتۋ ارقىلى قازاقستاندى تۋريزم ورتالىعىنا اينالدىرۋعا بولادى. ونىڭ ايتۋىنشا، ءار 100 تۇرىكتىڭ 80 ى اتاجۇرتىنا بارىپ، جىبەك جولى بويىمەن ءجۇرىپ وتۋگە قىزىعۋشىلىق تانىتقان.
ال ساۋالناماعا قاتىسۋشىلاردىڭ باسىم بولىگى ورتا ازيا ەلدەرى ىشىندە ەڭ اۋەلى قازاقستاندى كورۋگە ىقىلاس ءبىلدىرىپ وتىر.
كيۋرشات زورلۋ، احي ەۆران ۋنيۆەرسيتەتىنىڭ پروفەسسورى:
- قازاقستان - ورتا ازيا ەلدەرىنىڭ اراسىندا تانىمالدىعى، قوعامدىق قاۋىپسىزدىگى مەن ەكونوميكالىق ءال-اۋقاتى جونىنەن كوش ىلگەرى ەل. ال شەتەلدىك قوناقتار ساياحاتقا شىقپاستان بۇرىن، جەكە قاۋىپسىزدىككە ەرەكشە ءمان بەرەدى. قازىر قازاقستانعا جىلىنا 93 مىڭعا جۋىق تۇرىك تۋريستىك ماقساتتا قىدىرىپ بارادى. ەگەر ەكى اراداعى قارىم-قاتىناستى ەداۋىر جەڭىلدەتسەك جانە ۇشاق بيلەتىن ارزانداتساق، وندا ەلگە كەلۋشى تۋريستىڭ سانى ايتارلىقتاي كوبەيەدى دەپ ەسەپتەيمىن.
تۇركياداعى ءارتىس قانداسىمىز ءباھادۇر حاكىم ءوزىنىڭ كەزەكتى «ۋلان ىستامبۇل» سەريالىنا تۇسۋدە. ەفيردەن شىققان ساتتەن باستاپ، كوپشىلىك كورەرمەندەردىڭ كوڭىلىن اۋلاعان كومەديا تۇركياداعى ۇزدىك سەريالداردىڭ كوشىن باستاپ تۇر. جيىرمادان استام كينوعا ءتۇسىپ، ءارتۇرلى كەيىپكەردى سومداعان تاجىريبەلى اكتەر «شەتەلدە قازاقستاندى كەڭىنەن تانىتۋ ءۇشىن جارنامانىڭ بارلىق ءتاسىلىن پايدالانۋ قاجەت»، - دەيدى.
ءباھادۇر حاكىم، ءارتىس:
- مەنىڭ ويىمشا، قازاقستانعا شەتەلدىك تۋريستەردى تارتۋ ءۇشىن قازاقتىڭ كينو سالاسىن، سەريالىن، انشىلەرى مەن ارتىستەرىن تانىتۋ كەرەك. راسىن ايتقاندا، ولاردى الەمگە تانىتۋ قاجەت. ەلىمىزدىڭ جارناماسىن جاساۋىمىز كەرەك. بۇل ارقىلى مادەني بايلانىسىمىزدى ارتتىرامىز. سوندا عانا قازاقستانىمىزعا، ەلىمىزگە شەتەلدىك ازاماتتار قىدىرىپ كەلەدى. ءار جىلى 3 ميلليوننان استام تۇرىك دەمالىسىن شەتەلدە وتكىزەدى. ونىڭ كوبى گەرمانيا، گوللانديا جانە گرۋزياعا ساياحاتتاۋدى قوش كورىپ وتىر. جۋىق ارادا تۇرىكتەردىڭ ەڭ كوپ قىدىراتىن ەلىنىڭ تىزىمىنە قازاقستاننىڭ دا ەنۋى ىقتيمال. جىل سايىن جارتى ميلليوننان استام قازاقستاندىق انتاليا، الانيا، بودرۋم مەن مارماريس قالالارىنا كەلىپ، تەڭىز جاعاسىندا دەمالادى.
انادولىنىڭ تاريحىنا قىزىققاندار ىستامبۇل مەن كونياعا قاراي اسىعادى. ال وتاندىق تۋريزم ءوز ازاماتتارىمىزبەن قاتار، شەتەلدىكتەردى قارت كاسپيدىڭ بويىنا، جەر ءجانناتى جەتىسۋعا، سۇلۋ دا سىمباتتى كوكشەگە نەمەسە قازىنالى تۇركىستانعا شاقىرا الادى ما؟ ساراپشىلار وتاندىق تۋريزم دامۋى ءۇشىن باعا مەن قىزمەت كورسەتۋ سالاسى باسەكەگە قابىلەتتى بولۋ كەرەكتىگىن ايتادى. اۆتورلارى: ەرجان ءجۇنىس، سامات سۇلەي
24.kz
