قاسيەتتى دەپ نەنى اتايمىز؟

استانا. قازاقپارات - جالعان نامىس - قاسيەت ەمەس، ار ساقتاعان - قاسيەت. قازاق جۇرتى سان عاسىرلىق تاريحى بار جادىگەرلەردى جيىپ-تەرىپ، ولاردى قاسيەتتى ساناعان. مۇنىڭ بارلىعى - ۇلت قازىناسى، اتادان قالعان اسىل مۇرا.

اتامەكەن، تۋعان جەر - اركىمنىڭ اتا-باباسى، ءوزى تۋىپ وسكەن جەر. تۋعان جەردى، وسكەن ەلدى قۇرمەتتەۋ، وعان بارىپ-قايتۋ ازاماتتىلىقتىڭ بەلگىسى. «التىن بەسىك» دەپ اسپەتتەپ ايتاتىن جاڭا كەلگەن بالادان باستاپ ەرەسەك ادامدارعا دەيىن تۋعان جەرىنە اۋناتىپ الاتىن قازاق ىرىمى بار. بۇل بالا وتانشىل بولسىن، ۇلكەندەردىڭ اۋرۋ-سىرقاۋى، شەر-شەمەنى كەتسىن دەگەن ۇعىمنان تۋعان.

قاراشاڭىراق - اتا-بابادان قالعان ءۇي. اتادان بالاعا قالىپ كەلە جاتقان كيىز ءۇي (قىستاۋ) قاسيەتتى ورىن ەسەبىندە ساقتالعان. مۇنداي ءۇيدى كۇتىپ، تازا ساقتايدى؛

كيەلى ورىندار - اۋليە-انبيلەردىڭ، باتىرلار مەن بي-شەشەندەردىڭ، اتاقتى ادامداردىڭ مەكەن-جايى، قابىرى قاسيەتتى دەپ سانالادى. مۇنداي ورىندارعا حالىق ادەيى بارىپ زيرات ەتەدى، تۇنەيدى، تىلەك تىلەيدى؛

انانىڭ اق ءسۇتى - ادام بالاسى ءۇشىن قادىر-قاسيەتى ەرەكشە ۇعىم. انانىڭ اق ءسۇتىن اقتاۋ - وتە ۇلكەن پارىز. انالاردىڭ «اق ءسۇتىم اقتالدى» دەپ مارقايۋى بالالارىنا دەگەن ريزاشىلىقتىڭ بەلگىسى. انانى ريزا ەتۋ - قۇدايدى ريزا ەتۋ دەگەن ءسوز؛

قۇران كىتاپ -  مۇحاممەد پايعامبارىمىزعا تۇسكەن قاسيەتتى ءتورت كىتاپتىڭ ءبىرى. سول سياقتى حاديستەر مەن ءدىني شاريعات جيناقتارى دا كيەلى سانالادى. ءدىني كىتاپتار تازا قولمەن ۇستالىپ، تازا جەردە ساقتالادى؛

داستارحان -  تاعام، ءدام بايلىعى مەن بەرەكەنىڭ بەينەسى، سيمۆولى. جاقسى كەلىندەر مەن مىرزالاردىڭ، قولى بەرەكەلى ايەلدەردىڭ اتتارى وسى كەڭ داستارحاننان شىققان. داستارحاندى اتتامايدى، داستارحان ۇستىندە ادەپسىز ءسوز ايتىلمايدى؛

قارا قازان - توقتىق پەن مىرزالىقتىڭ ايعاعى. سونىمەن بىرگە ول اس پەن ادالدىق قازىناسى رەتىندە قاستەرلەنەدى؛

وشاق - قازان-وشاق دەپ قوسارلانا ايتىلاتىن كيەلى دە، يەلى زاتتىڭ ءبىرى. «وشاقتىڭ ءۇش بۇتىنان بەر» دەگەن قازاقتا ىزگى اق تىلەك قالىپتاسقان؛

وت ورنى - كيىز ءۇيدىڭ ورتاسىندا وشاق قۇرىلىپ، قازان اسىلىپ، وت جاعىلاتىن ورىن. وت ورنىن اتتامايدى؛

ءتور - ۇيدە قوناق وتىراتىن جوعارى، ءارى قاسيەتتى ورىن. ۇيگە كەلگەن ادامعا «تورگە شىعىڭىز» دەگەن ءىلتيپات پەن اق نيەت وسىدان شىققان؛

باتىرلاردىڭ قارۋ-جاراعى - ناعىز كيەلى زاتتار دەپ باعالانادى. قابانباي، بوگەنباي، كەنەسارى، اعىباي سىندى ەرلەردىڭ قىلىش، نايزاسى، ساۋىتى مەن دۋلىعاسى، ەر-تۇرمانى، ساداعى، شوقپارلارى عاسىردان عاسىرعا ساقتالاتىن ماڭگىلىك مۇرا؛

اڭشى، شەبەر قۇرالدارى - مەرگەننىڭ مىلتىعى، اڭشىنىڭ قاقپانى، ءۇيشىنىڭ ۇكىسى، ۇستانىڭ بالعاسى، ەتىكشىنىڭ ءبىزى دە قاسيەتتى مۇلىك ەسەبىندە ساقتالادى. ول ەشكىمگە بەرىلمەيدى، ساتىلمايدى جانە ونى جوعالتپاي ۇستايدى؛

ۇلىلاردىڭ قالامى - سيرەك كەزدەسەتىن باعالى مۇرا رەتىندە مۇراجايعا، ءارى ۇيدە ساقتالادى؛

ۇستانىڭ كورىك ءۇيى - «حالىق ۇعىمىندا ساقتايتىن يەسى، سوعان كيەسى بار دەسەدى». سوندىقتان وعان جاي ادامدار، ايەلدەر كىرە بەرمەيدى؛

جىلقىشىنىڭ قارا قوسى - بەرەكە ءۇيى دەپ حالىق ونى جوعارى باعالايدى. قىستا «قارا قوستا» ءارقاشان جىلقىنىڭ سەمىز ەت-مايى، سورپاسى مەن قۇرت كوجەسى ۇزىلمەيدى. مۇندا كەلگەندەر تويىپ جولعا اتتانادى. سوندىقتان جىلقىشىنىڭ قارا قوسىندا قوناقتار كوپ بولادى؛

ەرتەدەن قالعان ەسكەرتكىشتەر - ەجەلگى قالا ورنى، اتا-بابا جۇرتى، ەسكى قورىمدىق كيەلى ورىندار. ونداي جەرگە جاي ادامدار كوپ بارا بەرمەيدى. مۇنداي ورىندار بارلىق مەملەكەتتە قامقورلىققا الىنعان؛

بۇلاق - تازالىق پەن ءنار كوزى ەسەبىندە قاسيەتتى. «بۇلاق كورسەڭ كوزىن اش» دەگەن قاعيدا ونىڭ ماڭىزدىلىعىن بىلدىرەدى؛

 ونەر يەلەرىنىڭ مۇلكى -  انشىلەر مەن كومپوزيتورلاردىڭ، اقىندار مەن جازۋشىلاردىڭ، قوبىزشىلار مەن دومبىراشىلاردىڭ ساز اسپاپتارىن، كيىمى مەن تۇتىنعان زاتتارىن حالىق ەرەكشە مۇلىك رەتىندە قاستەرلەپ ۇستاپ، ساقتاپ كەلگەن؛

باقان - شاڭىراق كوتەرەتىن كيىز ءۇي مۇلكى. «باقاندى اتتاما» دەگەن تىيىم ونىڭ وزىندىك ءمانى بارىن بىلدىرەدى؛

 مال باسى (ءتول باسى) -  ءار ۇيدە «مالىمىزدىڭ باسى قۇتتى» دەپ ايتاتىن كيەلى جانۋارى بولادى. ولار: ءۇيىرىن يت-قۇسقا بەرمەيتىن -  ايعىر، سوڭىنان ءتول ەرتكەن -  انا بيە، قوي باستايتىن -  سەركە ت. ب. قازاق مۇنداي مال باسىن ساتپايدى، ايىرباستامايدى.  

دايىنداعان: نۇربول نۇرماحان ۇلى

massaget.kz