ساحنادا قاز داۋىستىلار ەمەس، قىز داۋىستىلار قاپتاپ ءجۇر

  استانا.قازاقپارات - ءان تىڭداپ وتىرعانبىز. راديودان. قازاقتىڭ ءانىن قۇيقىلجىتا ورىنداپ تۇرعان انشىلەرگە شىنىمەن دە ريزا بولعانىمىز راس. قۇلاق قۇرىشىن قاندىرعان انشىلەرگە رازى بولعان اجەم «پاي، پاي، نە دەگەن داۋىس، قانداي ءانشى قىزدار» دەپ تامساندى.

الدەن ۋاق ديكتور «ءاندى ورىنداعاندار قايرات تۇنتەكوۆ پەن نۇرجان قالجان»، - دەدى. تاڭ قالعاننان تالىپ قالماساق دا تاڭىرقاعانىمىز راس ەندى. بۇرىندارى بۇل ەكى ءانشىنىڭ اندەرىن تىڭداپ جۇرسەك تە قازاق راديوسى قورجىنىنداعى مىنا اندەرىن قۇلاعىمىز شالماعان ەكەن. باعانالى بەرى ءانشى قىز دەپ وتىرعانىمىز جىگىت بولىپ شىققانىنا ويلانىپ قالدىق. سودان قولعا قالام الىپ شيمايىمىزدى شيىرلاپ تاستاۋعا تۇرتكى بولعان تاقىرىپتى «الاش ايناسىنا» جاريالاۋعا تىرىستىق.

 سونىمەن.. . راسىندا بۇگىنگى ەسترادادا ساحنانىڭ شاڭىن شىعارىپ جۇرگەن جىگىتتەرىمىزدىڭ بارلىعى دەپ بارىنە بىردەي توپىراق شاشپاي- اق قويايىق. ءبىراق باسىم بولىگىنىڭ داۋىسى قىز داۋىستى بولىپ بارا جاتقانى جاسىرىن ەمەس. گۇرىلدەگەن، ەركەككە ءتان داۋىس جوقتىڭ قاسى دەمەي- اق قويايىق، ءبىراق سوعان جەتەقابىل ەكەنى وتىرىك ەمەس ەندى. نازىك، ءالسىز، تاماقتانباعان ادامداي ۋىلدەگەن ءسابي ءۇندى جىگىت انشىلەردىڭ داۋىسى قۇلاقتان كىرىپ، بويدى المايتىنى انىق ەندى. ەسەسىنە ىڭىرسىپ، داۋىسى جەتپەي جاتقانىنا ايانىش تۋعىزاتىنى بار. مۋزىكا تىلىمەن ايتساق وپەرا انشىلەرى ەكى وكتاۆادا ايتا بەرەدى، ال ەستاراداداعىلار بيبىگۇل تولەگەنوۆا ايتقانداي، ءبىر وكتاۆادان اسا ال¬ماي «تاقپاقشالاپ» قالادى. جوعارى نوتاعا شىعىپ، كەڭ تىنىستى الا المايدى. قىرعا شىعا الماي ەنتىگىپ قالادى دەگەن ءسوز. كوبىنە كلاسسيكالىق اندەردى قور قىلعان پۇشىق شىركىننىڭ كەرىن كەلتىرەدى.

 ايتپاعىمىز انشىلەردىڭ ءبارى دە اريا ورىنداپ كەتسىن دەگەن ءسوز ەمەس. نازىك تەمبرلى الت داۋىستى بولسا وندا اڭگىمە باسقا. كەزىندە الەمدى كونترتەنوردان دا بيىك الت داۋىسىمەن تاڭقالدىرعان ەرىك قۇرمانعاليەۆ سىندى تاعى دا ءبىر تۋما تالانت جارىپ شىقسا، بوركىمىزدى اسپانعا اتىپ قۋانار ەدىك. الايدا جىڭىشكە داۋىستىلاردىڭ دەنى ءوز داۋىستارىن قويىپ بەرەتىن ادامىنا جولىقپاي ما، الدە ەنجارلىق باسىپ، ورتا جودا بولدىرىپ قالا ما بەلگىسىز ىزدەنبەيدى، سۇرانبايدى. العا سۇيرەسەڭ ارتقا كەتەتىن قوتىر تايلاقتىڭ كەرىن كەلتىرەدى. «فەنومەن» دەگەن اتقا يە بولعان ەرىك قۇرمانعاليەۆ ك س ر و- داعى №1 كونترتەنور بولعان. وعان دەيىن ءدال وسى داۋىستا ءانشى بولماعان ەكەن. بۇل تۋرالى مارجان ەرشۋ ءوز ەستەلىگىندە بىلاي دەيدى: «ەرىك قۇرمانعاليەۆ فرانتسياداعى فەستيۆالدە باس جۇلدەنى جەڭىپ العاننان كەيىن كەڭەستىك ۆوكالدىق پەداگوگيكا ويلانا باستايدى. جىنىسى ەر ءانشى قالايشا ايەلدىڭ (الت نەمەسە مەتستسو- سوپرانو) جىڭىشكە داۋىسىمەن شىرقاي الادى؟ دەمەك، شىرقاۋعا بولادى ەكەن. وندا بۇل ۆوكالدىڭ پەداگوگيكالىق، مەتوديكالىق ءادىس- تاسىلدەرىن زەرتتەپ، وقۋ پروتسەسىنە ەنگىزىپ، كونترتەنورلاردى تاربيەلەۋ كەرەك دەپ شەشەدى.. . كونترتەنورلار -  جىڭىشكە بيىك داۋىستى ەر انشىلەر. كونترتەنورلاردىڭ كاستراتتاردان ايىرماشىلىعى ولار تابيعات بەرگەن سۇلۋ داۋىسقا يە جانە ەكى داۋىستا دا (ەر، ايەل) شىرقاي الاتىن شەبەرلەر. ەرىك سونىڭ ءبىرى ەمەس، بىرەگەيى ەدى. «كەڭەس وداعىنىڭ ءبىر ارتىقشىلىعى -  ول كەزدە ساحناعا تەك تالانتتار شىعاتىن. ال، قازىر اقشاسى باردىڭ ءبارى ساحنادا ويناقتاپ ءجۇر» - دەپ ماسكەۋلىك باسىلىمعا بەرگەن سۇحباتىندا اشىنا سويلەگەن ەرىكتىڭ بۇل سوزىنەن ونىڭ سىنشىل، تاكاپپار تالانت ەكەنىن تانىعاندايمىز. ەرىك قۇرمانعاليەۆ كەڭەستەر وداعىنداعى العاشقى كونترتەنور بولدى. كەڭەس وداعىندا بۇل قالىپتان تىس جاعداي دەپ ەسەپتەلدى، ال، ءبارىبىر رەسەي ءۇشىن بيىك مارتەبە بولىپ سانالدى. ەرىك قۇرمانعاليەۆ تۋرالى رەسەيلىكتەر «داۋىس»،«ءالتتىڭ ويانۋى»،« ءسالىم- مەرۋەرت» اتتى دەرەكتى فيلمدەر ءتۇسىردى. «اتى اڭىزعا اينالعان ادام» دەپ دارىپتەدى» .

.. . ارينە، مىڭجىلدىقتا ءبىراق رەت دۇنيەگە كەلەتىن مۇنداي تۋما تالانتتار تەكتى قازاقتىڭ توپىراعىندا ءالى- اق دۇنيەگە كەلەر- اق. مۋزىكانىڭ باسقا سالاسىن ءسوز ەتپەي اق قويايىق. ءبىر عانا ەسترادا جانرىندا جۇرگەن جىگىتتەرىمىزدىڭ داۋىسى نەگە جىڭىشكەرىپ بارادى؟ قىز داۋىستىلار نەگە كوپ؟ ەركەككە ءتان جۋان داۋىستىلار نەگە از؟ ەرمەك سەركەبايەۆ، الىبەك دىنىشيەۆ سىندى گۇرىلدەپ داۋىسى جەر جاراتىن جۋانداۋىستىلاردىڭ كوشى سولارمەن توقتاعانى ما؟ مەيرامبەكتىڭ قوڭىر ءۇنى، بۇركىتتىڭ اۋەزدى اۋەنى، سىرىم يسابايەۆتىڭ سىرلى ۇنىندەي جۋانداۋىستىلاردىڭ قاتارى قاشان كوبەيەدى؟

 اۆتور: باقىت شايدۋللا