ءجيى عاشىق بولاتىنىن مويىندايتىن ءانشى، سازگەر قاجىمۇرات شەشەنقۇل

استانا. قازاقپارات - ول قوڭىر داۋىس يەسى. اندەرىن تىڭداپ وتىرىپ قازاقى ءۇندى ەستيسىز.

ءتاتتى مۇڭ ەسىلىپ جاتادى اندەرىنەن. جانە ساعىم دالا ەلەستەيتىنى تاعى بار. «ماقپالجان»، «بۇلدىرگەن قىز»، «سەنى عانا»، «مەنىڭ مۇڭىم»، «جىلاما، جانىم»، «حات» اندەرىنىڭ ورىنداۋشىسى قاجىمۇرات شەشەنقۇل ۇلى قىتاي حالىق رەسپۋبليكاسىنىڭ التاي ايماعىنداعى قابا اۋدانىندا دۇنيەگە كەلگەن.

ول بۇگىندە ءوزىنىڭ انشىلىك، سازگەرلىك دارىنىمەن قىتايداعى قانداستارىمىزدىڭ جۇرەگىنە جول تاۋىپ، ونەرسۇيەر اعايىننىڭ ىستىق ىقىلاسىنا بولەنگەن. قاجىمۇراتتىڭ اندەرى ءانشى توقتار سەرىكوۆ، قايىرباي مەن ريزا، ەرمەك مۇقاشيەۆ جانە «ارشىن»، «الاش» توپتارىنىڭ جانە ءوزىنىڭ ورىنداۋىندا دا قازاقستاندا دا كەڭ تارالىپ ءجۇر. «ال، قىزدار، جىگىتتەر «قارا جورعا» بيلەيىك» دەپ باستالاتىن «قارا جورعا» انىمەن «ءان مەن ءانشىنىڭ» ساحناسىندا العاش رەت ونەر كورسەتىپ، قازىر ءوز شىعارماشىلىعىن دامىتىپ جۇرگەن جاس انشىلەردىڭ ءبىرى.

جاستىعىنا قاراماستان ءبىرشاما بەلەستەردى باعىندىرىپ ۇلگەرگەن ءانشى جىگىتتىڭ الدا تالاي اسەم اندەردىڭ ورىنداۋشىسى بولارىنا سەنىم مول. جاستايىنان انگە ءۇيىر بولعان، اكە-شەشەسىنىڭ، ءوزىنىڭ الدىنداعى اپكەلەرىنىڭ ارقاسىندا مۋزىكاعا، اۋەنگە دەگەن قىزىعۋشىلىعى ويانعان. ۇلكەن اتاسى قيسسا، داستان جازعان اقىن ادام بولعان ەكەن. قاجىمۇرات وزىنە ونەردىڭ تەككە قونباعانىنا سەنەدى... باقىت سانايدى. ەڭ العاش ساحناعا 1- سىنىپ وقىپ جۇرگەن كەزىندە دومبىراسىن قۇشاقتاپ شىعىپ ءان ايتىپتى. ۇيىندە وزىمەن جاستى گيتارا بار ەكەن. سابالاپ ءجۇرىپ، قىزىعۋشىلىقپەن ۇيرەنگەن اسپاپتاردىڭ ارقاسىندا مەكتەپارالىق كونسەرتتەرگە قاتىسىپ جۇلدەلەرگە يە بولعان. ۇلكەن ساحناعا ۋنيۆەرسيتەت قابىرعاسىندا جۇرگەن كەزىندە «سەنى عانا» اتتى انىمەن شىققان.

ول قازاق ەستراداسىنان كەمشىلىك ەمەس، ارتىقشىلىقتاردى كوبىرەك بايقاعانىن ۇنەمى ايتىپ جۇرەدى. «جاماننان جيرەن، جاقسىدان ۇيرەن» دەگەندەي، تەك جاقسى جاقتارىن عانا ۇيرەنسەم دەگەن ويدا. انشىلەردىڭ توي-بيزنەستى قۋىپ، اندەردىڭ كوبى توي اندەرى بولىپ كەتكەنىنە ازداپ رەنجيدى. ءبىراق سول تويدىڭ ارقاسىندا نان تاۋىپ جەپ جاتقان سوڭ، تاعى ەشتەڭە ايتا المايدى... ءانشىنىڭ ءومىرى جۇرت ويلاعانداي وڭاي ەمەستىگى بەلگىلى. ءان ىزدەۋ، تابۋ، ونى جازدىرۋ، بەينەكليپ ءتۇسىرۋ، ونى اينالىمعا سالۋ، ياعني تەلەارنالارعا اقشا تولەپ شىعارۋ، ساحنالىق كوستيۋم... وسىنىڭ ءبارىن توي بولماسا، انشىلەردىڭ كۇنى نە بولاتىنىن ويلاعىسى دا كەلمەيدى...

ول رەپەرتۋارى باي ءانشى. جۇزگە جۋىق ءانى بار. باسىم بولىگى قازاقتىڭ حالىق اندەرى. ءوزىنىڭ اۆتورلىق اندەرى دە بار. گيتارا، دومبىرا اسپاپتارىندا ەركىن ويناي الادى. سۋرەت سالاتىن ونەرى دە بار. كەزىندە اعىلشىن سۋرەتشىسى ۋيليام حوگارتتىڭ، يسپاندىق فرانسيسكو گويانىڭ كەرەمەت تۋىندىلارىنا قاراپ قاتتى ەلىكتەگەن ەكەن. ءۇرىمجى قالاسى بويىنشا وتكەن سۋرەتشىلەر بايقاۋىندا ءۇشىنشى دارەجەلى ماراپاتقا يە بولعان. مەكتەپتە وقىپ جۇرگەن كەزىندە تەك سۋرەتشى بولۋدى ارمانداعان بالاعا. ۇستازدارى: «سۋرەتشىلىكپەن تانىلا المايسىڭ، ودان دا ءاندى جاقسى ايتاسىڭ عوي، انشىلىك جولدى تاڭداعانىڭ دۇرىس» دەپ مۋزىكالىق وقۋعا ەمتيحان تاپسىرۋعا سەبەپشى بولعان ەكەن. ەگەر ۇستازدارى سول اقىلدى ايتپاعاندا، قازىر ول ءانشى ەمەس، سۋرەتشى بولار ما ەدى، كىم ءبىلسىن؟..  

احمەت جۇبانوۆ «انگە، كۇيگە قۇمار بالا -  جانى تازا، ومىرگە عاشىق بولىپ وسەدى» دەمەي مە؟ ادامداردىڭ جان دۇنيەسىنە عاشىق بولا بىلمەيتىن ادامنان ونەرپاز شىقپايدى دەپ سانايدى. «قىز تۇرماق، اسەم تابيعاتقا دا، ادەمى جەرلەرگە دە، سامال جەلگە دە، ءمولدىر سۋعا دا... ءجيى عاشىق بولامىن. جالپى قازاقتىڭ قىزدارى سۇلۋ بولعاندىقتان ءجيى عاشىق بولاتىنىم راس، سول ارقىلى ماحاببات تۋرالى اندەر كوپتەپ تۋىلادى» -  دەپ ءجيى عاشىق بولاتىنىن مويىندايتىن ءانشى، سازگەر قاجىمۇراتتىڭ جانىنان شىققان تاماشا اندەر جەتەرلىك ەكەن. ورىنداۋشىسىن ءالى تاپپاعان اندەرىنىڭ بار ەكەنىن دە ايتادى. سازگەرلىكتىڭ باسقا انشىلەرگە ءان بەرۋمەن ولشەنبەيتىنىن جانە شەكتەلمەيتىنىن ايتادى.

ءومىردىڭ سىناعىنان قورىقپايدى. باسىنا تۇسكەن قيىنشىلىققا ادام بالاسىنىڭ توزەتىنىنە كوزى جەتكەن ءانشى ەندىگى جەردە توقتاماق ەمەس.

دەرەككوز: el.kz