اجىراسۋعا نيەتتەنگەن جۇبايلارعا سوتتا ەكزيۋپەريدىڭ ايگىلى تۋىندىسىن وقۋ مىندەتتەلدى
سونداي-اق ولار ەتيكا مەن ادامگەرشىلىك قۇندىلىقتارىن ناسيحاتتايتىن باسقا دا ادەبي شىعارمالاردى وقۋلارى ءتيىس، دەپ جازادى ر ي ا نوۆوستي.
مۇنداي شەشىمدى روساريو قالاسىنىڭ وتباسىلىق ىستەر جونىندەگى سۋدياسى ريكاردو دۋتتو قابىلداعان. ول قانداي دا ءبىر قارىم-قاتىناس جاساۋدان باس تارتقان اتا-انالاردىڭ ارەكەتىنىڭ كەسىرىنەن ولاردىڭ بالالارى زارداپ شەگەدى، دەيدى. مۇندايدا اسىرەسە، بالالاردىڭ ءبىرى اكەسىندە، ال ەكىنشىسى شەشەسىندە قالاتىن جاعداي ولارعا اۋىر سوققى بولىپ تيەدى ەكەن.
وسىلايشا، سۋديا اجىراسۋعا نيەت بىلدىرگەن اتا-انالار ءبىر اي بويى اپتاسىنا ءبىر رەت سوتقا كەلىپ، ارنايى قىزمەتكەردىڭ قاداعالاۋىمەن «كىشكەنتاي حانزادا» شىعارماسىن، «بالالاردىڭ قۇقىقتارى تۋرالى كونۆەنتسيا» مەن يسپاندىق فيلوسوف فەرناندو ساۆاتەردىڭ «امادورعا ارنالعان ەتيكا» اتتى ادامگەرشىلىك ماسەلەلەرىنە ارنالعان كىتابىن وقۋى ءتيىس دەگەن قاۋلى شىعاردى. وسىنداي ارەكەت ارقىلى اتا-انالار ءوز بالالارىن جاقسىراق ءتۇسىنىپ، ولاردىڭ ءتالىمدى تاربيە مەن ءبىلىم الۋلارىنا ىقپالىن تيگىزە الادى دەپ سانايدى سوت وكىلى.
ايتا كەتەيىك، انتۋان دە سەنت-ەكزيۋپەريدىڭ «كىشكەنتاي حانزادا» («مالەنكيي پرينتس» - «Le Petit Prince») كىتابى العاش رەت 1946 - جىلى نيۋ-يوركتە باسىلىپ شىعىپ، بۇگىنگى كۇنگە دەيىن 265 تىلگە اۋدارىلعان، ساتىلىم مولشەرى 145 ميلليون داناعا جەتكەن. ونىڭ قازاق تىلىندەگى نۇسقاسى - «كىشكەنتاي شاحزادا» بەلگىلى جازۋشى تاكەن ءالىمقۇلوۆتىڭ اۋدارۋىمەن 1967 - جىلى «جازۋشى» باسپاسىنان جارىق كورگەن ەدى.
