ەلباسى قازاقستاننىڭ بارشا مۇسىلمان قاۋىمىن قاسيەتتى رامازان ايىمەن قۇتتىقتادى

استانا. قازاقپارات - مەملەكەت باسشىسى نۇرسۇلتان نازاربايەۆ قازاقستاننىڭ بارشا مۇسىلمان قاۋىمىن ەرتەڭ باستالاتىن قاسيەتتى رامازان ايىمەن قۇتتىقتادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

 - بۇل ايدا جۇرتتار، قۇران كارىمدە وسيەت ەتىلگەندەي، ورازا ۇستايدى. قۇران قاعيداتتارىنا سايكەس، وسى ايدا ادام بالاسى اللاعا جاقىنداي تۇسەدى جانە ولار مەيىرىم، باقىت، بەرەكە- بىرلىك، تولەرانتتىلىق، وزگە جاندارعا قايىرىمدىلىق جاساۋ، كۇنالارىنان ارىلۋ جانە مەدەت تىلەۋ جونىندە ويلانۋعا ءتيىس. ەلىمىزدىڭ بارشا مۇسىلماندارىنا ۇلىق ورازا ايىنىڭ سىناعىنان سۇرىنبەي ءوتۋدى تىلەيمىن، - دەدى قازاقستان پرەزيدەنتى.

 «پريگورودنىي» تۇرعىن الابىندا، ارناساي كوشەسى مەن قابانباي باتىر داڭعىلىنىڭ قيىلىسىندا ورنالاسقان جاڭا مەشىتتى كورۋ بارىسىندا نۇرسۇلتان نازاربايەۆ ونىڭ ەلورداداعى سەگىزىنشى مەشىت ەكەنىن اتاپ ءوتتى.

- مەشىت ەلوردامىزعا كەلەتىن قوناقتار ءۇشىن قولايلى. بولاشاقتا بۇل مەشىت تەك ىزگىلىك پەن بىرلىكتىڭ قۇتتى مەكەنى بولادى دەپ سەنەمىن، - دەدى مەملەكەت باسشىسى.

 مەشىتتىڭ جالپى الاڭى - 1087,6 شارشى مەتر، جەرىنىڭ اۋماعى - 8 گەكتار، مۇناراسىنىڭ بيىكتىگى - 28,9 مەتر. عيماراتى 1500 ادامعا لايىقتالعان.