پرەمەر-مينيستر: داعدارىس ءبىزدى توڭىرەكتەپ ءجۇر

استانا. قازاقپارات - داعدارىس ءبىزدى توڭىرەكتەپ ءجۇر.
None
None

بۇگىن ق ر پارلامەنتى پالاتالارىنىڭ بىرلەسكەن وتىرىسىندا ق ر پرەمەر-ءمينيسترى كارىم ءماسىموۆ وسىلاي ءمالىم ەتتى.

ەسكە سالا كەتەيىك، بىرلەسكەن وتىرىستا ۇكىمەتتىڭ بىلتىرعى جىلعى بيۋدجەتتىڭ اتقارىلۋى تۋرالى ەسەبى تالقىلانعان بولاتىن.

 «2007-2008 -جىلدارداعى، 2009-2010 - جىلدارداعى داعدارىستاردىڭ ءبىر بىرىنەن ءبىرشاما ايىرماشىلىقتارى بار.

2007-2008 - جىلعى جاھاندىق داعدارىس ەڭ الدىمەن امەريكالىق نارىقتا پايدا بولدى، ءبارىمىز سۋبستاندارتتى كرەديتتەر، قارجىلىق سەكتور تۋرالى بىلەمىز.

ودان كەيىنگى كەزەڭدەگى داعدارىس ەۋروپالىق نارىقتاعى، ەۋروپا مەمەلكەتتەرىندەگى بورىشتىق مىندەتتەمەلەرمەن تىكەلەي بايلانىستى. ال قازىرگى 2014-2015 - جىلدارى دامۋشى ەلدەردىڭ ۋاقىتى دا كەلگەن ءتارىزدى.

ەڭ ءبىرىنشى بۇل ءبىزدىڭ اينالامىزداعى ەلدەردىڭ رىنوكتارى: رەسەي، قىتايعا دا قاتىستى»، - دەدى ك. ءماسىموۆ.

بۇل رەتتە ۇكىمەت باسشىسى رەسەي ەكونوميكاسىنىڭ باسەڭدەگەنىن، قىتاي قارقىنى دا تومەندەپ تۇرعانىن العا تارتتى. پرەمەردىڭ سوزىنە قاراعاندا، بۇل داعدارىس تولقىنى اتالعان ەلدەردىڭ كومپانيالار قىزمەتىنە دە، ءىرى تاۋار وندىرۋشىلەرگە دە اسەر ەتپەي قويمايدى. «ءبىز بەس ايدىڭ قورىتىندىسىندا دا نەگىزگى تاۋار وندىرۋشىلەرىمىزدىڭ رەسەيگە، باسقا ەلدەرگە ەكسپورتىندا ءبىرشاما وزگەرىستەر ورىن الىپ وتىرعانىن بايقايمىز. ال بۇل قۇلدىراۋدىڭ جاعىمسىز سالدارىنان قۇتىلۋ ءۇشىن ءبىز ءوز جۇمىسىمىزدى ءتورت باعىت بوينىشا جوسپارلاپ وتىرمىز. ونىڭ ءبىرىنشىسى - ءبىزدىڭ ءداستۇرلى ەكونوميكا سەكتورىن قولداۋ. سوڭعى 2,5 جارىم جىلدا ءبىز ەلىمىزدىڭ بارلىق تاۋار وندىرۋشىلەرمەن كەزدەستىك. ولاردىڭ سۇراقتارىن تىڭداپ شىقتىق، شەشۋگە ءتيىستى ماسەلە دە بىزگە بەلگىلى»، - دەدى ك. ءماسىموۆ.

بۇدان بولەك، ۇكىمەت باسشىسى ەكىنشى باعىت رەتىندە وڭدەۋشى ونەركاسىپ سەكتورىن اتادى. بۇل رەتتە مەملەكەت باسشىسى ۇلتتىق قوردان 1 تريلليون تەڭگە قاراجات ءبولۋ تۋرالى تەڭدەسسىز شەشىم قابىلداعانى ەستە. بۇنىڭ باسىم بولىگى وڭدەۋشى ونەركاسىپتى قولداۋعا باعىتتالاتىن بولادى.

«ءۇشىنشى باعىت - يننوۆاتسيالىق، عىلىمي قامتىمدى ەكونوميكانى دامىتۋ. بۇل - كەلەشەك ەكونوميكاسى، ودان بىردەن ناتيجە كۇتۋگە دە كەلمەيدى. سوندىقتان دا، ونىڭ قايتارىمى دا كەلەشەكتىڭ ۇلەسىندە. ءتورتىنشى باعىت - قىزمەت كورسەتۋ سەكتورى مەن شاعىن جانە ورتا بيزنەستى دامىتۋ. بۇندا دا ءبىز وسى باعىت ءۇشىن تىڭ سەرپىن قادامدارىن جاساۋعا ءتيىسپىز. شاعىن جانە ورتا بيزنەس ءۇشىن پروتسەدۋرالاردى جەڭىلدەتىپ، قارجىلاندىرۋدىڭ قوسىمشا ارنالارىن اشا تۇسۋگە ءتيىسپىز. حالىقارلىق قارجى قۇرالدارىن دا تارتامىز، جۇمىس جالعاسۋدا. ءدال وسى ءتورتىنشى باعىت جۇمىس ورىندارىن قۇرۋدىڭ نەگىزگى فوكۋسى. شاعىن جانە ورتا بيزنەس پەن قىزمەت كورسەتۋ سالاسى دامۋعا دەم بەرە الادى»، - دەدى كارىم ءماسىموۆ.

اۆتور: قانات مامەتقازى ۇلى

سوڭعى جاڭالىقتار