باسپانالى بولۋدىڭ ءتيىمدى ادىستەرى

كەزدەسۋگە قاتىسۋشىلار ىنتىماقتاستىق تۋرالى مەموراندۋمعا قول قويدى.
«تۇرعىن ءۇي قۇرىلىس جيناق بانكىنىڭ» ىنتىماقتاستىق تۋرالى ۇسىنىسى قازاقستان ريەلتورلارىنىڭ بىرلەسكەن قاۋىمداستىعىنىڭ تاراپىنان ۇلكەن قىزىعۋشىلىق تۋدىردى.
ءوز سالىمشىلارىنا تۇرعىن ءۇي ساتىپ الۋعا نەسيە الۋدىڭ نەعۇرلىم ۇتىمدى ادىستەرىن ۇسىنىپ، تيىمدىلىگىن بۇرىنعىدان دا ارتتىرۋدى كوزدەگەن بانك، ەندىگى تاڭدا جىلجىمايتىن مۇلىك اگەنتتەرىمەن تىعىز قارىم-قاتىناستا بىرلەسە جۇمىس جاسايتىن بولادى.
جىلجىمايتىن مۇلىك اگەنتتىكتەرىمەن بىرلەسە جۇمىس ىستەۋ، بانك وكىلدەرى مەن ريەلتورلاردىڭ پىكىرىنشە، جىلجىمايتىن مۇلىكتى ساتىپ الۋ-ساتۋ مامىلەلەرىنىڭ بارلىق تاراپتارى ءۇشىن ءتيىمدى بولىپ تابىلادى.
ريەلتوردار ءوز كليەنتتەرىنە تۇرعىن ءۇي ساتىپ الۋعا نەسيەنى «تۇرعىن ءۇي قۇرىلىس جيناق بانكىنەن» الۋدى ۇسىنسا، بانك ءوز كەزەگىندە، زاەمداردى جىلدام راسىمدەۋگە قاجەتتى جاعدايلار جاساۋدى مىندەتتەنەدى.
«ريەلتورلاردىڭ كليەنتتەرگە كورسەتەر قىزمەتىنىڭ اقىسىن كىم تولەيدى؟» دەگەن ساۋالىمىزعا دا جاعىمدى جاۋاپ الدىق. باسپانا ساتىپ الۋعا قاتىستى نەسيە الۋدىڭ بار شارۋاسىن دەر كەزىندە ورىنداپ بەرۋگە قولعابىس جاسايتىن ريەلتورلاردىڭ قىزمەتىن قارجىلاندىراتىن دا «تۇرعىن ءۇي قۇرىلىس جيناق بانكى» ەكەنىن ايتا كەتكەن ورىندى.
سونىمەن الداعى تاڭدا جىلجىمايتىن مۇلىكتىڭ قايتالاما نارىعىندا ءوزىنىڭ نەسيە بەرۋ قىزمەتتەرىن بەلسەندى دامىتا وتىرىپ، «تۇرعىن ءۇي قۇرىلىس جيناق بانكى» اۋقىمدى اگەنتتەر جەلىسىن دامىتۋعا كوپ كوڭىل بولەتىن بولدى.
ەندىگى تاڭدا ساتىپ الۋشىلار، ياكي «تۇرعىن ءۇي قۇرىلىس جيناق بانكىنىڭ» كليەنتتەرى تۇرعىن ءۇي زاەمدارىن بۇگىنگى كۇنگى ەڭ ءتيىمدى تالاپتار بويىنشا الادى. «تۇرعىن ءۇي قۇرىلىس جيناق بانكىنىڭ» پايىزدىق مولشەرلەمەلەرى كەم دەگەندە ءۇش جىل جيناقتاعان جاعدايدا، جىلىنا 3,5 پايىزدان باستالاتىنىن ەستەرىڭىزگە سالا كەتكەن ءجون.
مۇنىمەن قوسا، بانك الدىن الا جيناقتاۋسىز، جىلىنا 7,5 پايىز باستالاتىن مولشەرلەمە بويىنشا زاەمدار بەرەدى. بۇل دا جىلجىمايتىن مۇلىككە نەسيە بەرۋ نارىعىنداعى ەڭ ءتيىمدى شارت بولىپ تابىلادى.
ايباتىر جۇماعۇلوۆ، «قازاقستاننىڭ تۇرعىن ءۇي قۇرىلىس جيناق بانكى» ا ق باسقارما ءتوراعاسى:
«ءوز كليەنتتەرىنە بارىنشا جاقىن بولا ءتۇسۋ ءۇشىن، «تۇرعىن ءۇي قۇرىلىس جيناق بانكى» ىشكى قايتا ۇيىمداستىرۋ جۇمىستارىن جۇرگىزىپ، ۇردىستەردى اۆتوماتتاندىردى. مىسالى، 1 - شىلدەدەن باستاپ ءبىز دەپوزيت اشۋ ۋاقىتىن ايتارلىقتاي قىسقارتۋعا مۇمكىندىك بەرەتىن جاڭا قىزمەتتى ىسكە قوسامىز. ءبىز جىلجىمايتىن مۇلىكتى ساتىپ الۋ-ساتۋ مامىلەلەرىن راسىمدەۋ پروتسەدۋرالارىن وڭتايلاندىردىق. جانە مۇنىمەن توقتالىپ قالماي، العا جىلجي بەرەمىز. بانك بولىمشەلەرىنىڭ الماتى جانە استانا قالالارىنداعى وپەراتسيالىق زالدارىندا ءبىز حالىققا قىزمەت كورسەتۋ ورتالىعى بولىمشەلەرىن اشتىق جانە نوتاريۋستارعا ارنالعان كابينەتتەر بولەمىز.
وزدەرىڭىز ءتۇسىنىپ وتىرعانداي، بۇل جاعدايدا جىلجىمايتىن مۇلىكتى ساتىپ الۋ-ساتۋ مامىلەلەرىن جاساۋعا، زاەم الۋدى قوسا العاندا، مەيلىنشە از عانا ۋاقىت ىشىندە جانە «تۇرعىن ءۇي قۇرىلىس جيناق بانكىنەن» شىقپاي-اق قول جەتكىزۋگە بولادى.
جانە ءبىز مۇنىمەن دە شەكتەلىپ قالايىق دەپ وتىرعانىمىز جوق. بايلانىس جانە اقپاراتتاندىرۋ كوميتەتىمەن بىرلەسە وتىرىپ، بارلىق قاجەتتى بانكتىك وپەراتسيالاردى ەلەكتروندى تۇردە جۇرگىزۋگە مۇمكىندىك بەرەتىن، مامىلەلەردى قاشىقتان تىركەۋ جۇيەسىن قۇرۋ ماسەلەلەردى تالقىلاۋدامىز» .
وسىلايشا «تۇرعىن ءۇي قۇرىلىس جيناق بانكىندە» جىلجىمايتىن مۇلىكتى ساتىپ الۋ مامىلەلەرىن جاساۋ ءۇردىسى 20 جۇمىس كۇنىنەن 3 جۇمىس كۇنىنە دەيىن قىسقاردى. مۇنىمەن قاتار، بانك يپوتەكالىق تۇرعىن ءۇي زاەمى بويىنشا الىنعان قاراجات ەسەبىنەن جىلجىمايتىن مۇلىك ساتىپ الۋ ماقساتىندا مامىلە جاساۋ ءۇشىن الىناتىن كوميسسيانى قىسقارتۋ جايلى كەلىسىمگە قول جەتكىزدى.
قازىرگى ۋاقىتتا «تۇرعىن ءۇي قۇرىلىس جيناق بانكى» جىلجىمايتىن مۇلىكتىڭ قايتالاما نارىعىندا ءوز قىزمەتتەرىن بەلسەندى دامىتا باستادى. بانك تۇرعىن ءۇي ساتىپ الۋ، باسپانا جاعدايلارىن جاقسارتۋ، قۇرىلىس سالۋ مەن جوندەۋ جۇرگىزۋ، جەر تەلىمىن ساتىپ الۋ ماقساتتارىنا زاەم الۋدىڭ ءتيىمدى تالاپتارىن ۇسىنادى.
«تۇرعىن ءۇي قۇرىلىس جيناق بانكى» تەك قانا مەملەكەتتىك باعدارلامالار بويىنشا جۇمىستارمەن جانە مەملەكەتتىك قىزمەتشىلەرگە زاەم بەرۋمەن شەكتەلىپ قالمايدى. قازىرگى ۋاقىتتا بارلىق تالاپتاردى ساقتاعان جاعدايدا، قازاقستاننىڭ بارلىق ازاماتتارىنىڭ، ءتىپتى تابىسى ورتا جانە تومەن بولعان جاعدايدا دا، تۇرعىن ءۇي قۇرىلىس جيناق قاراجاتتارىنا پاتەر ساتىپ الۋعا نەمەسە ءۇي سالۋعا مۇمكىندىكتەرى بار. ول «تۇرعىن ءۇي قۇرىلىس جيناق بانكى» اق تاراپىنان تولىقتاي قاراستىرىلعان.
اۆتور: ايتولەن ۇلبوسىن
«ايقىن»