قىتايدان كەلگەن قانداسىمىز قۇسنيحات كورمەسىن وتكىزدى
قازاقستان مۇسىلماندارى ءدىني باسقارماسى جاعىنان ۇيىمداستىرىلعان كالليگرافيالىق كورمەنى باس ءمۇفتي ەرجان قاجى مالعاجى ۇلى جانە قۇسمان شالابايەۆ باستاعان سىيلى قوناقتار تاماشالاپ، جوعارى باعاسىن بەردى.
كالليگرافيا دەگەنىمىز مەشىت قابىرعاسىنا قۇران سۇرەلەرىن، پايعامبارىمىزدىڭ حاديستەرىن ناقىشتاپ، اراب ارىپتەرىمەن كوركەم بەزەندىرىپ جازۋ. بۇنداي اراب ارىپتەرىن ناقىشتى جازۋ قۇسنيحات دەپ تە اتالادى.
وتكەن جىلى عانا اتاجۇرتىنا تابان تىرەگەن قانداسىمىزدىڭ نەگىزگى ماماندىعى زاڭگەر بولىپ شىقتى. «قازاقستاننىڭ زاڭ جۇيەسىن ءارى ورىس ءتىلىن بىلمەگەندىكتەن ءوز سالام بويىنشا جۇمىس تابا المادىم. قىتايدا اراب ءالىپبيى نەگىزىندەگى ا. بايتۇرسىنوۆ جازۋىن قولداناتىندىقتان قۇسنيحات ونەرىن دە قىزىعۋشى رەتىندە مەڭگەرگەنىم بار ەدى.
ەلورداداعى «ازىرەت سۇلتان» مەشىتىنە جولىم ءتۇسىپ مەشىتتى زيارات ەتۋگە بارعانىمدا، توبەسى مەن قابىرعالارىنىڭ اراب جازۋىمەن وتە ادەمى، ساپالى بەزەندىرىلگەنىن بايقادىم. ءوزىمنىڭ دە وسى ونەرگە جاقىن ءارى قولىمنان كەلەتىنىن ويلاپ، نايب يمامنان مەشىتتى كىمنىڭ بەزەندىرگەنىن سۇرادىم. ول كىسى تۇركيا مەن مىسىردان ءبىر توپ كالليگرافيا ونەرىنىڭ مايتالماندارى كەلىپ، قۇلشىلىق ءۇيىن بەزەندىرىپ شىققانىن ايتتى. سودان وسى ونەرمەن كاسىبي تۇردە اينالىسسام قالاي بولار ەكەن دەگەن ويمەن الىپ- ۇشىپ الماتىعا جەتتىم. «كاۋسار» كالليگرافيالىق ونەر ستۋدياسىن اشتىم. بۇل بەكزات ونەر قازاقستاندا كەنجەلەپ قالىپتى. ەندىگى ماقساتىم وسى سالانى دامىتىپ، ەلىمە، دىنىمە قىزمەت ەتسەم دەيمىن» ، - دەيدى اقمەيىر كارىم.
قازاق جۇرتىنىڭ ءتول ءتىلىن بۇزىلماعان ساف قالپىندا ساقتاۋ ءۇشىن قانداي تاڭبانى الۋ كەرەكتىگىنە وسىدان ءبىر عاسىر بۇرىن احمەت بايتۇرسىنوۆ بابامىز ەرەكشە ءمان بەرگەن. ۇزاق جىل اعارتۋشىلىق ەڭبەك جولىن وتكەرگەن جانە يسلامدى «ءدىن مەن ءدىلدىڭ لۇعاتى» دەپ زەردەلەيتىن عالىم 1913 - جىلى قازاق ءتىلىنىڭ تابيعي دىبىس ەرەكشەلىكتەرىن بەرە الاتىن «بايتۇرسىنوۆ جازۋىن» «قازاق» گازەتى ارقىلى جالپىعا جاريا ەتكەنى دە تاريحتان ءمالىم. قىتايداعى قانداستارىمىز كۇنى بۇگىنگە دەيىن وسى ءالىپبيدى قولدانىپ كەلەدى.
ونداعى اعايىن حۇسنيحات ۇلگىلەرىن دە ارابتار مەن پارسىلار جاعىنان قابىلداپ وتىر. اراب جازۋىنىڭ حۇسنيحات ۇلگىسى وتە كوپ. قىتاي قازاقتارى سونىڭ ىشىندەگى ديۋاني، شەكەستە، ءتالىق، ەركىن جازۋ ۇلگىسى سياقتى 11 ءتۇرىن قولدانۋدا. بۇل كۇندە قىتايدا قازاق حاتكەرلىگىن ارنايى زەرتتەپ، زەردەلەپ وتىراتىن ورتالىق - حاتكەرلىك قوعامى جۇمىس جاسايدى. 1985 - جىلى ىلە قازاق اۆتونوميالى وبلىسى ادەبيەت- كوركەمونەرشىلەر بىرلەستىگى جانىنان قۇرىلعان اتالمىش حاتكەرلىك قوعامى قازىرگە دەيىن ارنايى ماماندار جاعىنان قۇراستىرىلعان كوپتەگەن حاتكەرلىك وقۋلىقتارى مەن كىتاپتار باسپادان شىعاردى. قازاق ءتىلدى گازەت، جۋرنالداردا حۇسنيحات تۋىندىلارىن جاريالايتىن تۇراقتى ايدارلار كۇنى بۇگىنگە دەيىن ونداعى حاتكەرلەردىڭ ونەرىن جۇرتقا جاريا ەتۋدە.
